ಅಂತರಂಗದಾ ಮೃದಂಗ

ಅಲ್ಪನಿಗೆ ಐಸಿರಿ

2012-02-12T10:19:00.000-08:00

ಈಗ ನಾನಿರುವ ಗ್ರೆನೋಬಲ್ಲಿನಲ್ಲಿ ಅಕ್ಷರಶ 'ಅಲ್ಪನಿಗೆ ಐಸಿರಿ' ಬಂದಿದ್ದಾಳೆ. ಅಲ್ಪನ - ಫ್ರೆಂಚ್ alp ಸರಣಿಯ ಬಸ್ಟಿಲ್ಲೇ ಬೆಟ್ಟದ- ಹತ್ತಿರ ಐಸಿರಿ - isere ನದಿ - ಬಂದ ಚಿತ್ರ ಇಲ್ಲಿದೆ :

lock ಆಯುಕ್ತ

2011-10-16T01:17:00.000-07:00

ಲೋಕಾಯುಕ್ತ ಪೋಲಿಸರು ಇಷ್ಟು ಜನರನ್ನು ಒಳಗೆ ಹಾಕ್ತಾ ಇರೋದನ್ನ ನೋಡಿದರೆ, ಅವರನ್ನು lock ಆಯುಕ್ತ ಪೋಲಿಸರು ಎಂದು ಕರೀಬೇಕು ಎನಿಸುತ್ತೆ...

(ತ)ಲೆನೋವೊ ಯಾರಿಗಾಗಿ?

2011-10-14T10:55:00.000-07:00

ಲೆನೋವೊ ನಾವು ನೀವುಗಳಿ್ಗೆಲ್ಲಾ ಅಲ್ಲ. ಯಾಕೆ ಅಂದ್ರಾ ? ಅವರ ಆಫೀಸಿನ ಮುಂದೆಯೇ ಬರಕೊಂಡಿದ್ದಾರೆ ನೋಡಿ - Lenovo for those who do Car parking.

ಸಾಹಿತ್ಯ ಸೇವೆಯಲ್ಲಿ ಹತ್ತಾರು ವರುಷ, ಇಂದು ಕಂಬಾರನಿಗೆ ಜ್ಞಾನಪೀಠದ ಹರುಷ

2011-09-19T07:01:00.000-07:00

ಕನ್ನಡದ ಹೆಮ್ಮೆಯ ಕವಿ, ಕಾದಂಬರಿಕಾರ, ನಾಟಕಕಾರ ಚಂದ್ರಶೇಖರ ಕಂಬಾರರ ಮುಡಿ ಏರಿ ಜ್ಞಾನಪೀಠ ತನ್ನ ಹಿರಿಮೆ ಹೆಚ್ಚಿಸಿಕೊಂಡಿದೆ.

ನಿರ್ಮಾಪಕರ ಸಂಘ ನಿಷೇಧ "ಏರಿದ್ದು" ತಪ್ಪಾ ?

2011-09-15T10:48:00.000-07:00

ಗೊತ್ತಿಲ್ಲಾ .. ಆದರೆ ಅವರೇ ತಮ್ಮದು ತಪ್ಪಾಯ್ತು ಎಂದು ಪತ್ರ ಬರೆದಿದ್ದಾರೆ. ತಪ್ಪೊಪ್ಪಿಗೆಯ ಪತ್ರದಲ್ಲಿ ಹಲವಾರು ತಪ್ಪುಗಳಿವೆ... ಚುರುಮುರಿಯಲ್ಲಿ ನಾನು ನೋಡಿದ ಆ ಪತ್ರದಲ್ಲಿ ಲಾಜಿಕ್ ಅನ್ನುವುದೇನು ಇಲ್ಲ - "ಅವರು ನಿರ್ಮಿಸಿದದ ಚಿತ್ರಗಳಲ್ಲೇ ಲಾಜಿಕ್ ಇರೋಲ್ಲ, ಅವರು ವಿಧಿಸಿದ ಆ ನಿಷೇಧದಲ್ಲಿಯೂ ಯಾವುದೇ ಲಾಜಿಕ್ ಇರಲಿಲ್ಲ, ಈ ಪತ್ರದಲ್ಲಿ ಯಾಕಿರಬೇಕು?" ಅಂದಿರಾ ? ಅದೂ ಸರಿಯನ್ನಿ.

ಉಳಿದಿದ್ದೆಲ್ಲಾ ಹಾಳಾಗಿ ಹೋಗಲಿ, ಪತ್ರವನ್ನು ಒಂಚೂರು ಕನ್ನಡ ಗೊತ್ತಿರುವವರಿಂದ ಬರೆಸಿದ್ದರೆ...

ಇರಲಿ, ತಪ್ಪು ಮಾಡದವರು ಎಲ್ಲವ್ರೆ? ತಪ್ಪೇ ಮಾಡದವರು ಎಲ್ಲವ್ರೆ?. ಪತ್ರ ಬರೆದ ನಿರ್ಮಾಪಕರೂ ಕೂಡ ನಮ್ಮವರೇ ಆದ 'ಕನ್ನಡದ ಉತ್ತಮ ಸಂಪ್ರದಾಯಸ್ತ , ಸುಸಂಸ್ಕೃತ, ಗೌರವಸ್ತ ಸಾದ್ವಿ, ಸದ್ಗುಣ ಸಂಪನ್ನ, ಕಳಂಕ ರಹಿತ ಹಾಲಿನಂತ ಮನಸ್ಸುಳ್ಳವರ ಸಮಾನರಾದ' ಬಂಧುಗಳಲ್ಲವೇ ?

ಹೇರಲಿ ಆರಲಿ ಕನ್ನಡ ಚಿತ್ರರಂಗದ ಬಾವುಟ ..

ಅನ್ತಃಪುರ ಗೀತೆಗಳು

2011-09-05T07:23:00.000-07:00

ಇವರು ಬೇಲೂರಿನ ಜಗತ್ಪ್ರಸಿದ್ಧ ಚನ್ನಕೇಶವ ದೇವಸ್ಥಾನದಲ್ಲಿ ನಿತ್ಯ ನಲಿಯುವ ಶಿಲಾಬಾಲಿಕೆಯರು. ಇವರ ಬಗೆಗೆ ದಾರ್ಶನಿಕ ಕವಿ ಡಿವಿಜಿ 'ಅನ್ತಃಪುರ ಗೀತೆಗಳು..' ಎಂಬ ಕವನ ಸಂಕಲನವನ್ನೇ ಪ್ರಕಟಿಸಿದ್ದಾರೆ. ಇದೇ ಸಂಕಲನದಿಂದ ಆಯ್ದ ಸಾಲುಗಳನ್ನು ಇಲ್ಲಿ ಅಡಿಬರಹಗಳಾಗಿ ಉಪಯೋಗಿಸಲಾಗಿದೆ. 'ಅನ್ತಃಪುರ ಗೀತೆಗಳು'ದ ಪ್ರಕಾಶಕರು ಕಾವ್ಯಾಲಯ, ಮೈಸೂರು.

'ಅನ್ತಃಪುರ ಗೀತೆಗಳು' ಧ್ವನಿ ಸುರುಳಿಯಲ್ಲೂ ಲಭ್ಯವಿದೆ. ಒಮ್ಮೆ ಕೇಳಿ ನೋಡಿ..

ಸುತ್ತೋಣ ಈ ನಾಡನು..

2011-08-26T06:13:00.000-07:00

ಬಹಳ ದಿನಗಳ ಹಿಂದಿನಿಂದ ನಾನು ಹೇಳಿಕೊಳ್ಳುತ್ತ ಬಂದ ಪ್ರವಾಸಕ್ಕೆ ಅಂತೂ-ಇಂತೂ ಕಾಲಕೂಡಿ ಬಂದಿದೆ. ನಾಳೆ ನಾವು ನಮ್ಮ ಪ್ರವಾಸ ಶುರುಮಾಡಲಿದ್ದೇವೆ. ನಮ್ಮ ಪ್ರವಾಸದ ಸ್ಥೂಲ ಯೋಜನೆ ಹೀಗಿದೆ:

ನಿಮ್ಮ ಶುಭಾಶಯಗಳು ನಮ್ಮೊಂದಿಗಿರಲಿ..

punಚಾಮೃತ

2011-08-25T21:44:00.000-07:00

¿ ಸ್ಟೀವ್ ಜಾಬ್ ಯಾಪಲ್ ಕಂಪನಿಗೆ ರಾಜೀನಾಮೆ ನೀಡಿದ್ದಾರೆ...

✔ಇದೂ ಒಂದು ರೀತಿಯ ಜಾಬ್ ಲಾಸೇ ಸರಿ..

ಒಂದು muliple-choice ಪ್ರಶ್ನೆ:

2011-08-11T10:50:00.000-07:00

¿ ಮಾಮುಮಂ ಯಡ್ಯೂರಪ್ಪನವರು ಯಾವಾಗಲೂ - ತಾವೂ ಪದತ್ಯಾಗ ಮಾಡುವಾಗಲೂ ಕೂಡ- ಎರಡು ಬೆರೆಳೆತ್ತಿ ತೋರಿಸುತ್ತಾರೆ. ಯಾಕೆ ?

ಅವರಿಗೆ ಯಾವಾಗಲೂ ಸಂಡಾಸು ಬಂದಿರುತ್ತದೆ..
ಅವರು ವಿಕ್ಟರಿ ಸಂಜ್ಞೆ ತೋರಿಸುತ್ತಿರುತ್ತಾರೆ.
ಅವರು ತಮ್ಮ ಎರಡು ಮಕ್ಕಳ ಬಗ್ಗೆ ಕರ್ನಾಟಕದ ಜನತೆಗೆ ವಾರ್ನಿಂಗ್ ಕೊಡುತ್ತಿರುತ್ತಾರೆ..

ನಿಮ್ಮ ಉತ್ತರ:

#1 ಆಗಿದ್ದರೆ: ಒಳ್ಳೆಯ ಉತ್ತರ.. ತನ್ನಂತೆ ಪರರ ಬಗೆದೊಡೆ ಕೈಲಾಸ ಬಿನ್ನಾಣವಕ್ಕು ಸರ್ವಜ್ಞ....
#2 ಆಗಿದ್ದರೆ: ಏನು ನಿಮ್ಗೆ ಇದಕ್ಕಿಂತ ಬೇರೆ ಉತ್ತರ ಹೋಳೆಯೋದೇ ಇಲ್ವಾ ?
#3 ಆಗಿದ್ದರೆ: ಹಾಗಂತೀರಾ ? ಇದ್ದರೂ ಇರಬಹುದು.. ನಮಗ್ಯಾಕೆ ದೊಡ್ಡವರ ಸುದ್ದಿ..

ಅಪ್ಪನಿಲ್ಲದ ಈ ಸಲದ ಅಪ್ಪಂದಿರ ದಿನ..

2011-07-11T10:15:00.000-07:00

ಜೂನ್ ತಿಂಗಳ ಮೂರನೆ ಭಾನುವಾರವನ್ನು 'ಅಪ್ಪಂದಿರ ದಿನ' ಎಂದು ಆಚರಿಸುತ್ತಾರೆ ಎಂದು ನನಗೆ ತಿಳಿದಿದ್ದೇ ಮೂರೋ-ನಾಲ್ಕೋ ವರುಷಗಳ ಹಿಂದೆ. ಆ ಸಲದ ಜೂನ ಮೂರನೆ ಭಾನುವಾರ ಗೆಳೆಯನೊಂದಿಗೆ ಯಾವುದೋ ಮಾಲಿಗೆ ಹೋಗಿದ್ದ ನಾನು, ಅಲ್ಲಿನ ಜಾಹೀರಾತಿನಿಂದ ಅಪ್ಪಂದಿರ ದಿನದ ಬಗ್ಗೆ ತಿಳಿದು ಅಪ್ಪನಿಗೆ ಒಂದು ಟಿ-ಷರ್ಟು ಕೊಂಡು ತಂದಿದ್ದೆ. ಅದಾದ ನಂತರ ಪ್ರತೀ ಅಪ್ಪಂದಿರ ದಿನಕ್ಕೂ ಅಪ್ಪ ಬೆಂಗಳೂರಿನಲ್ಲಿದ್ದರೆ ಯಾವುದೋ ಚಿಕ್ಕ ಕಾಣಿಕೆ ಕೊಟ್ಟು, ಊರಲ್ಲಿದ್ದರೆ ಫೋನು ಮಾಡಿ ಶುಭಾಶಯ ಹೇಳುತ್ತಿದ್ದೆ. ಆದರೆ ಈ ಸಲದ ಅಪ್ಪಂದಿರ ದಿನಕ್ಕೆ ಅಪ್ಪನಿಗೆ ಕಾಣಿಕೆಯೂ ಇಲ್ಲ, ಶುಭಾಶಯವೂ ಇಲ್ಲ, ಯಾಕೆಂದರೆ ಈ ಸಲ ಅವನೇ ಇಲ್ಲಾ.. ಮೊನ್ನೆಯ ಫೆಬ್ರುವರಿಯಲ್ಲಿ ಈ ಲೋಕದ ವ್ಯಾಪಾರ ಮುಗಿಸಿಹೋಗಿದ್ದಾನೆ ಆತ. ನೀರುಗಣ್ಣು ಮಾಡಿಕೊಂಡು ಅವನನ್ನು ನೆನಪಿಸಿಕೊಳ್ಳುವುದೊಂದೇ ನಾನು ಈ ಸಲದ ಅಪ್ಪಂದಿರ ದಿನದಿಂದ ಮಾಡಬಹುದಾದದ್ದು..

--------------------------------------------------------------------------------------

ಅಪ್ಪನ ವೃತ್ತಿ ಮಾಸ್ತರಿಕೆ. ಪ್ರವೃತ್ತಿ ಕೂಡ ಮಾಸ್ತರಿಕೆಯೇ.. ಮುಂಜಾನೆ ಶಾಲೆಯಲ್ಲಿ ಮಾಸ್ತರಿಕೆ.. ಸಾಯಂಕಾಲದಲ್ಲಿ ಮನೆಯಲ್ಲಿ ಮಾಸ್ತರಿಕೆ.. ಹೇಳಿ ಕೇಳಿ ನಾವಿದ್ದುದು ಒಂದು ಹಳ್ಳಿ. ಅದೂ ಜಿಲ್ಲಾ ಸ್ಥಳವಾದ ಧಾರವಾಡದಿಂದ ನೂರು ಕಿಲೋಮೀಟರ ದೂರವಿದ್ದ ಕುಗ್ರಾಮ. ವಿದ್ಯಾಭ್ಯಾಸದ ಬಗ್ಗೆ ಆವಾಗ ಅಷ್ಟೊಂದು ಜಾಗ್ರತಿ ಊರಲ್ಲಿ ಆಗಿರಲಿಲ್ಲ. ನನ್ನ ಅಪ್ಪನಂತವರಷ್ಟು ಬೇರೆ ಊರಿಂದ ಮಾಸ್ತರ್ರಾಗಿ ಬಂದವರನ್ನು ಬಿಟ್ಟರೆ, ಉಳಿದ ಮಾಸ್ತರುಗಳು ಊರಲ್ಲಿಯೇ ಹೊಲ-ಮನೆ ನೋಡಿಕೊಂಡು, ಅಂಗಡಿ-ವ್ಯಾಪಾರ-ವ್ಯವಹಾರ ಮುಖ್ಯ ಉದ್ಯೋಗ ಮಾಡಿಕೊಂಡು ಮಾಸ್ತರಿಕೆಯನ್ನು ಸೈಡ್ ಬಿಸಿನೆಸ್ ಮಾಡಿಕೊಂಡಿರುವವರು. ಹೀಗಾಗಿ ಕಲಿಕೆಯ ಬಗ್ಗೆ ಅಷ್ಟಿಷ್ಟು ಆಸಕ್ತಿ ಇದ್ದ ಕೆಲ ಹುಡುಗರಿಗೂ ಅವಕಾಶವಿರಲಿಲ್ಲ. ಅದಕ್ಕಾಗಿ ಅಪ್ಪ ಅಂತಹ ವಿದ್ಯಾರ್ಥಿಗಳನ್ನು ಸಂಜೆ ನಮ್ಮ ಮನೆಯಲ್ಲಿ ಕೂಡಿಸಿಕೊಂಡು ಶಾಲೆಯಲ್ಲಿ ತಾನು ಕಲಿಸದ ಗಣೀತ-ವಿಜ್ಞಾನ-ಹಳೆಗನ್ನಡಗಳನ್ನು ಯಾವುದೇ ಫೀ ಇಲ್ಲದೇ ಹೇಳಿ ಕೊಡುತ್ತಿದ್ದ. ಅವರನ್ನು ವಿವಿಧ ಸ್ಕಾಲರ್‌ಷಿಪ್ ಪರೀಕ್ಷೆಗಳಿಗೆ ತಯಾರು ಮಾಡುತ್ತಿದ್ದ. ಅಪ್ಪನ ಗರಡಿಯಲ್ಲಿ ತಯಾರಾದ ಹಲವಾರು ವಿದ್ಯಾರ್ಥಿಗಳು ಕಿತ್ತೂರಿನ ಬಾಲಕಿಯರ ವಸತಿ ಶಾಲೆ, ಸಂಡೂರಿನ ವಸತಿ ಶಾಲೆ, ನಂತರ ನವೋದಯ ಶಾಲೆಗಳ ಪ್ರವೇಶ ಪರೀಕ್ಷೆಗಳಲ್ಲಿ ಪಾಸಾಗಿದ್ದರು.

ಇಂತಹ ವಿದ್ಯಾರ್ಥಿ ವೃಂದ ಹೆಚ್ಚು ಕಡಿಮೆ ನಮ್ಮ ಮನೆಯಲ್ಲಿಯೇ ಇರುತ್ತಿತ್ತು. ಮೂರು ಸಂಜೆಗೆ ಕೈಯಲ್ಲಿ ಕಂದೀಲು ಹಿಡಿದು ನಮ್ಮ ಮನೆಗೆ ಬರುತ್ತಿದ್ದ ಅವರಿಗೆ ಅಪ್ಪ ದಿನದ ಪಾಠ ಹೇಳಿಕೊಡುತ್ತಿದ್ದ. ಪಾಠ ಮುಗಿದ ಮೇಲೆ ಮನೆಗೆ ಹೋಗಿ ರಾತ್ರಿ ಊಟ ಮಾಡಿ ವಾಪಸು ನಮ್ಮ ಮನೆಗೆ ಬರುತ್ತಿದ್ದ ಅವರು ರಾತ್ರಿ ಓದಿಕೊಳ್ಳುತ್ತ, ತಮಗೇನಾದರೂ ಸಮಸ್ಯೆ ಇದ್ದರೆ ಅಪ್ಪನ ಹತ್ತಿರ ಕೇಳಿ ತಿಳಿದುಕೊಳ್ಳುತ್ತಿದ್ದರು. ರಾತ್ರಿ ನಮ್ಮ ಮನೆಯಲ್ಲಿಯೇ ಮಲಗಿಕೊಳ್ಳುತ್ತಿದ್ದರು. ಬೆಳಗೂ ಮುಂಜಾನೆ ಎದ್ದು, ಅಪ್ಪನ ಜೊತೆಗೆ ನದಿಗೆ ಸ್ನಾನಕ್ಕೆ ಹೋಗಿ ಬಂದು ವಿದ್ಯಾರ್ಥಿ ಗಣ ತಮ್ಮ ಮನೆಗೆ ಹೋಗಿ, ಅಲ್ಲಿಂದಲೇ ಶಾಲೆಗೆ ಹೋಗುತ್ತಿದ್ದರು. ಹೀಗಾಗಿ ವಿದ್ಯಾರ್ಥಿಗಳ ಹಾಸಿಗೆ ಕಟ್ಟು, ಅವರ ಪುಸ್ತಕಗಳ ಕಟ್ಟು ಮತ್ತು ಅವೆರಡರಲ್ಲಿ ಸೇರಿಕೊಂಡು ನಮ್ಮ ಮನೆ ಸೇರಿದ ಅಗಾಧ ಸಂಖ್ಯೆಯ ತಗಣಿಗಳ ಸೈನ್ಯ ಯಾವಾಗಲೂ ನಮ್ಮ ಮನೆಯಲ್ಲಿರುತ್ತಿದ್ದವು!

ಜೋಳಿಗೆ ಅನ್ನುವುದು ಈಗಿನ ರೆಸಾರ್ಟುಗಳಲ್ಲಿರುವ ಹ್ಯಾಮಕ್‌ಗಳ ಪ್ರಾಚೀನ ರೂಪವೆನ್ನಬಹುದು. ಆಗ ಅವುಗಳನ್ನು ಸಣ್ಣ ಕೂಸುಗಳನ್ನು ಮಲಗಿಸಲು ಉಪಯೋಗಿಸುತ್ತಿದ್ದರು. ನನಗೆ ತಕ್ಕ ಮಟ್ಟಿಗೆ ದೊಡ್ಡವನಾದರೂ ಜೋಳಿಗೆಯಲ್ಲಿಯೇ ಮಲಗುವ ಅಭ್ಯಾಸವಿತ್ತು. ನಮ್ಮ ಪಡಸಾಲೆಯಲ್ಲಿದ್ದ ಜೋಡು ಕಂಬಗಳಿಗೆ ಒಂದು ಹಗ್ಗ ಕಟ್ಟಿ ಅದಕ್ಕೆ ಒಂದು ಕಂಬಳಿ ಮಡಿಚಿ ಹಾಕಿ ಜೋಳಿಗೆ ಮಾಡಿಕೊಂಡು ಅದರಲ್ಲಿ ಜಿಗಿದು ಏರಿ ನಾನು ಮಲಗಿರುತ್ತಿದ್ದೆ. ಪಡಸಾಲಿಯಲ್ಲಿ ತನ್ನ ವಿದ್ಯಾರ್ಥಿಗಳಿಗೆ ಅಪ್ಪ ಹೇಳುತ್ತಿದ್ದ ಪಾಠಗಳನ್ನು ಜೋಳಿಗೆಯಿಂದಲೇ ಕೇಳುತ್ತಲೇ ನಿದ್ದೆಗೆ ಜಾರಿಕೊಳ್ಳುತ್ತಿದ್ದೆ. (ಹೀಗಾಗಿ ಮುಂದೆ ದೊಡ್ಡವನಾಗಿ ಕಾಲೇಜುಗಳಲ್ಲಿ ಮೇಷ್ಟ್ರುಗಳು ಪಾಠಮಾಡುವಾಗ ನಿದ್ದೆ ಮಾಡುವುದು ನನಗೆ ಸಹಜವಾಗಿ ಬಂತು. ಇರಲಿ..:-) ) ನಾಟಕ ರಚನೆ- ನಿರ್ದೇಶನದಲ್ಲಿ ಅಷ್ಟಿಷ್ಟು ಪರಿಶ್ರಮವಿದ್ದ ಅಪ್ಪ, ತನ್ನ ವಿದ್ಯಾರ್ಥಿಗಳಿಗೂ ಅದರಲ್ಲಿ ಪ್ರೋತ್ಸಾಹಿಸುತ್ತಿದ್ದ. ಅಪ್ಪನ ವಿದ್ಯಾರ್ಥಿಗಣ ತಿಂಗಳಿಗೊಂದು ಸಲ ಸಂಜೆ ತಮ್ಮ ಪಾಠವೊಂದನ್ನೋ, ಆಗಿನ ವರ್ತಮಾನ ಪತ್ರಿಕೆಗಳಲ್ಲಿ ಬಂದಿದ್ದ ಮುಖ್ಯ ಘಟನೆಯನ್ನೋ ನಾಟಕವಾಗಿ ಪರಿವರ್ತಿಸಿ, ತಮ್ಮ-ತಮ್ಮಲ್ಲಿ ಪಾತ್ರ ಹಂಚಿಕೆ ಮಾಡಿಕೊಂಡು ನಟಿಸಿ ತೋರಿಸುತ್ತಿದ್ದರು. ಆ ನಾಟಕ ನೋಡಲು ನಮ್ಮ ಓಣಿಯ ಜನರೆಲ್ಲ ನಮ್ಮ ಮನೆಗೆ ಬಂದಿರುತ್ತಿದ್ದರು. ಬಹುತೇಕ ಆ ಎಲ್ಲ ನಾಟಕಗಳನ್ನು ನಾನು ನನ್ನ ಪಡಸಾಲಿಯ ಜೋಳಿಗೆಯಂಬ ಬಾಲ್ಕನಿಯಿಂದ ನೋಡಿ ಖುಷಿ ಪಟ್ಟಿದ್ದೆ. ಸ್ವಲ್ಪ ದಿನ ತನ್ನ ಕೆಲ ಆಸಕ್ತ ಸ್ನೇಹಿತರಿಗೆ ಅಪ್ಪ ಪ್ರತೀ ಸಂಜೆ ಕುಮಾರವ್ಯಾಸ ಭಾರತದ ಒಂದೋಂದು ಭಾಗವನ್ನು ಓದಿ, ವಿವರಿಸಿ ಹೇಳುತ್ತಿದ್ದ. ನನ್ನ ಭಾರತ ಶ್ರವಣವಾಗುತ್ತಿದ್ದುದು ಕೂಡ ಕೇರ್ ಆಫ್ ಜೋಳಿಗೆಯಿಂದಲೇ ! ( ನಾನು ಕೆಲಸ ಹಿಡಿದ ಮೇಲೆ, ಆಗಾಗ ಬೆಂಗಳೂರಿಗೆ ಬಂದಾಗ ಕೂಡ ನನ್ನ ಕೋರಿಕೆಯಂತೆ ಅಪ್ಪ ಭಾರತವಾಚನ ಮಾಡುತ್ತಿದ್ದ. ಅದೄಷ್ಟವಶಾತ್ ಅಪ್ಪನ ಭಾರತವಾಚನದ ಬಹುತೇಕ ಭಾಗವನ್ನು ನಾನು ರಿಕಾರ್ಡ ಮಾಡಿಟ್ಟಿದ್ದೇನೆ. )

ನನ್ನ ಬಾಲ್ಯದ ಆ ಕಾಲದಲ್ಲಿ ನನಗೆ ಅಪ್ಪನ ನೇರ ಸಹವಾಸ ಸಿಕ್ಕಿದ್ದೇ ಕಡಿಮೆ. ಏನಾದರೂ ಸಿಕ್ಕಿದ್ದರೆ ಅದು ನಾನು ಹಟಮಾಡಿ, ಶಟಗೊಂಡಾಗ ಅವನು ಕೊಟ್ಟ ಬಿಸಿ-ಬಿಸಿ ಕಜ್ಜಾಯ ಮಾತ್ರ. ಅದೂ ಒಂದು ಸಲ ಅಜ್ಜಿ ನನಗೆ ಸ್ನಾನ ಮಾಡಿಸುತ್ತಿರಬೇಕಾದರೆ ನನಗೆ ಹಟ ಬಂದು, ನಾನು ಬಚ್ಚಲಲ್ಲೇ ಅಡ್ಡ ಮಲಗಿ ಸ್ನಾನ ಸತ್ಯಾಗೃಹ ಮಾಡುತ್ತಿದ್ದಾಗ ಅಪ್ಪ ನನ್ನ ಕುಂಡಿಗೆ ಬಿಸ್ಕೀಟು ಕೊಟ್ಟದ್ದು ಇನ್ನೂ ನೆನಪಿದೆ!

ನಾನು ಶಾಲೆಗೆ ಹೋಗಲು ಶುರುಮಾಡಿದ ಮೇಲೆ ಅಪ್ಪ ನನ್ನ ಜೀವನದಲ್ಲಿ 'ಅಪ್ಪ' ಪಾತ್ರದ ಜೊತೆಗೆ 'ಗುರು' ಪಾತ್ರವನ್ನೂ ನಿಭಾಯಿಸತೊಡಗಿದ. ನನಗೂ, ಮತ್ತು ನನ್ನ ಜೊತೆಯಲ್ಲಿ ಓದುತ್ತಿದ್ದ ನನ್ನ ಕೆಲ ಗೆಳೆಯರನ್ನು ಸೇರಿಸಿಕೊಂಡು ಮನೆಯಲ್ಲಿ ಪಾಠ ಶುರುಮಾಡಿದ. ಪಾಠದ ಸಮಯದಲ್ಲಿ, ಆಗಿನ ಹೆಚ್ಚು ಕಡಿಮೆ ಎಲ್ಲಾ ಮಾಸ್ತರುಗಳಂತೆ, ಮಗನಾದ ನನಗೆ ಅಪ್ಪ ಯಾವುದೇ ರಿಯಾಯತಿ ತೋರಿಸುತ್ತಿರಲ್ಲ. ಇನ್ ಫ್ಯಾಕ್ಟ್ ಏನಾದರೂ ಸ್ವಲ್ಪ ತಪ್ಪಾದರೂ ಉಳಿದವರಿಗಿಂತ ಒಂಚೂರು ಹೆಚ್ಚೆ ಬಯ್ಯುತ್ತಿದ್ದ. ಆದರೂ ಈ ಕಾಲದಲ್ಲಿ ನಾನು ಅಪ್ಪನ ಜೊತೆಗೆ ಬಹಳ ಫಲಯುಕ್ತವಾದ ಸಮಯ ಕಳೆದ ಸಮಾಧಾನವಿದೆ. ಆಗ ಅಪ್ಪ ಕಲಿಸಿದ ‘ಲೋಹಿತಾಶ್ವನ ಸಾವು’ ಕಾವ್ಯ ಖಂಡದ ಸಾಲುಗಳು ಈಗಲೂ ಕಣ್ಣೀರು ತರಿಸುತ್ತವೆ. ಆಗ ಅಪ್ಪ ಪ್ರವಾಸ ಕರೆದುಕೊಂಡು ಹೋಗಿ ತೋರಿಸಿದ್ದ ಬದಾಮಿ-ಬನಶಂಕರಿ- ಐಹೊಳಿ- ಪಟ್ಟದಕಲ್ಲು - ಮಹಾಕೂಟಗಳು ನನ್ನ ಮನಸ್ಸಿನ ಮೇಲೆ ಅಚ್ಚಳಿಯದೇ ಉಳಿದಿವೆ. ಕೊಣ್ಣುರಿನ ತೋಟಗಾರಿಕಾ ಇಲಾಖೆಯ ತೋಟಕ್ಕೆ ಕರೆದುಕೊಂಡು ಹೋಗಿ ಅಪ್ಪ ಗಿಡಗಳಿಗೆ ಕಸಿ ಮಾಡುವುದನ್ನು ತೋರಿಸಿದ್ದ. ಮನೆಯಲ್ಲಿಯೇ ನಮ್ಮ ವಿಜ್ಞಾನದ ಪಠ್ಯದಲ್ಲಿದ್ದ ಪ್ರಯೋಗಗಳನ್ನು ಮಾಡಿತೋರಿಸುತ್ತಿದ್ದ. 'ಬಾಲವಿಜ್ಞಾನ' ಎಂಬ ಹೆಸರಿನ ಮಕ್ಕಳ ವಿಜ್ಞಾನ ಪತ್ರಿಕೆಯನ್ನು ನಮ್ಮಿಂದ ಓದಿಸುತ್ತಿದ್ದ. ಅಪ್ಪ ಮಾಡಿತೋರಿಸಿದ ವಿಜ್ಞಾನದ ಪ್ರಯೋಗಗಳಿಂದ / ಓದಿಸಿದ ಪತ್ರಿಕೆಗಳಿಂದ ನಾನು-ನನ್ನ ಸಹಪಾಠಿಗಳು ವಿಜ್ಞಾನಿಗಳಾಗಗದಿದ್ದರೂ, ಅಂದು ಅವು ನಮ್ಮಲ್ಲಿ ವಿಜ್ಞಾನದ ಬಗ್ಗೆ ಸಾಕಷ್ಟು ಕುತೂಹಲ ಹುಟ್ಟಿಸಿದ್ದಂತೂ ಸುಳ್ಳಲ್ಲ.

ಮುಂದೆ ಅಪ್ಪ ಮಾಡಿಸಿದ ತಯಾರಿಯಿಂದಾಗಿ ನವೋದಯ ಶಾಲೆಯ ಪ್ರವೇಶ ಪರೀಕ್ಷೆಯಲ್ಲಿ ಪಾಸಾಗಿ ನಾನು ಧಾರವಾಡ ಸೇರಿದರೂ ಅಪ್ಪ-ನನ್ನ ಸಹವಾಸವೇನು ಕಡಿಮೆಯಾಗಲಿಲ್ಲ. ಪ್ರತೀ ಸೋಮವಾರ ಅಪ್ಪ ನನಗೊಂದು ಪತ್ರ ಬರೆಯುತ್ತಿದ್ದ. ಒಂದೊಂದು ವಾರ ಒಂದೊಂದು ವಿಷಯದ ಬಗ್ಗೆ ಒಂದೊಂದು ಭಾಷೆಯಲ್ಲಿ - ಕನ್ನಡ, ಇಂಗ್ಲೀಷು ಮತ್ತು ಹಿಂದಿ- ಯಲ್ಲಿ ಪತ್ರ ಬರೆಯುತ್ತಿದ್ದ. ಪ್ರತಿ ತಿಂಗಳ ಮೊದಲ ಭಾನುವಾರದ ಪಾಲಕರ ಭೇಟಿಗೆ ಬರುವಾಗ ಅವ್ವ ಕಟ್ಟಿಕೊಟ್ಟಿರುತ್ತಿದ್ದ ತಿಂಡಿಯ ಚೀಲವನ್ನು ಕೊಡುತ್ತ "ಇದು ಹೊಟ್ಟಿಗೆ" ಎಂದು, ಸಮಾಜ ಪುಸ್ತಕಾಲಯದಲ್ಲೋ, ಮನೋಹರ ಗ್ರಂಥಮಾಲೆಯಲ್ಲೋ, ಇಲ್ಲವೇ ಹುಬ್ಬಳ್ಳಿಯ ಸಾಹಿತ್ಯ ಭಂಡಾರದಿಂದ ಕೊಂಡು ತಂದ ಯಾವುದಾದರೂ ಆಸಕ್ತಿಕರ ಪುಸ್ತಕವನ್ನು ಕೊಡುತ್ತ "ಇದು ನೆತ್ತಿಗೆ" ಎಂದು ಹೇಳುತ್ತಿದ್ದ. ನಮ್ಮ ರಜೆ ಬಿಟ್ಟಾಗ ಊರಿಗೆ ಕರೆದುಕೊಂಡು ಹೋಗಲು ಬರುತ್ತಿದ್ದ ಅಪ್ಪ ಆಗ ಧಾರವಾಡವನ್ನು ಸುತ್ತಿಸುತ್ತಿದ್ದ. ಅಪ್ಪನೊಂದಿಗೆ ಧಾರವಾಡ ಸುತ್ತುವುದೇ ಒಂದು ದಿವ್ಯ ಅನುಭೂತಿಯಾಗಿರುತ್ತಿತ್ತು - ಹೆಜ್ಜೆಗೊಂದು ಇತಿಹಾಸದ ಕುರುಹುಗಳನ್ನು ಹೊಂದಿರುವ ಧಾರವಾಡ ಪಟ್ಟಣದ್ದೇ ಅಷ್ಟು ದಿವ್ಯತೆಯೋ, ಅಥವಾ ಅಪ್ಪ ಕೊಡುತ್ತಿದ್ದ ವಿವರಣೆ ಧಾರವಾಡವನ್ನು ಅಷ್ಟು ದಿವ್ಯವಾಗಿಸಿತ್ತೋ ನನಗಿನ್ನೂ ಬಗೆಹರಿದಿಲ್ಲ. ಕರ್ನಾಟಕ ಕಾಲೇಜಿಗೆ ಕರೆದುಕೊಂಡು ಹೋದ ಅಪ್ಪ, ಉತ್ತರ ಕರ್ನಾಟಕ, ದಕ್ಷಿಣ ಮರಾಠಾ ಪ್ರಾಂತ ಎಂದು ಕರೆಸಿಕೊಂದು ಶಿಕ್ಷಣ ಕ್ಷೇತ್ರದಲ್ಲಿ ಹಿಂದುಳಿದಿದ್ದಾಗ ಅರಟಾಳ ರುದ್ರಗೌಡರು, ರೊದ್ದ ಶ್ರೀನಿವಾಸರಾಯರು ಹೇಗೆ ವಂತಿಗೆ ಕೂಡಿಸಿ ಕರ್ನಾಟಕ ಕಾಲೇಜು ಶುರುವಾಗುವಂತೆ ಮಾಡಿದರು ಎಂದು ಹೇಳುತ್ತಿದ್ದಾಗ ನಾನು ಮುಕ್ಕಾಲು ಶತಮಾನ ಹಿಂದಿನ ಧಾರವಾಡಕ್ಕೆ ಹೋಗಿರುತ್ತಿದ್ದೆ. ಮುಂದೆ ರೊದ್ದ ಶ್ರೀನಿವಾಸರಾವ ರಸ್ತೆ ( ಕಾಲೇಜು ರಸ್ತೆ)ಯಲ್ಲಿ ಬರುತ್ತಾ ಕಾಣುವ ಟೀಚರ್ಸ್‌ ಟ್ರೇನಿಂಗ್‌ ಕಾಲೇಜು ತೋರಿಸುತ್ತಾ ಡೆಪೂಟಿ ಚನ್ನಬಸಪ್ಪರ ಬಗ್ಗೆ ಹೇಳುತ್ತ, ಅದರೆದುರಿನಲ್ಲಿ ರೊದ್ದ ಶ್ರೀನಿವಾಸರಾಯರು (ಇಂಗ್ಲಂಡಿನ ಮಹಾರಾಣಿಯ ಪಟ್ಟಾಭಿಷೇಕದ ಬೆಳ್ಳಿಹಬ್ಬದ ಸಂದರ್ಭದಲ್ಲಿ ?) ನೆಟ್ಟ ಅರಳಿಮರವನ್ನು ತೋರಿಸಿ ಆಲೂರು ವೆಂಕಟರಾಯ ವೄತ್ತಕ್ಕೆ ಬರುವುದರಲ್ಲಿ ಧಾರವಾಡ ಉತ್ತರ ಕರ್ನಾಟಕದ ಶೈಕ್ಷಣಿಕ ಕೇಂದ್ರವಾದ ಪೂರ್ತಿ ಇತಿಹಾಸ ಹೇಳಿರುತ್ತಿದ್ದ.

ಅಲೂರು ವೆಂಕಟರಾಯ ವೄತ್ತದ ‘ಕರ್ನಾಟಕ ಇತಿಹಾಸ ಸಂಶೋಧನಾ ಸಂಸ್ಥೆ’ಯ ಕಟ್ಟಡ ನೋಡಿದೊಡನೆ ಅಪ್ಪನ ಮಾತು ಕರ್ನಾಟಕ ಏಕೀಕರಣದ ಕಡೆಗೆ ಹರಿಯುತ್ತಿತ್ತು. ಕನ್ನಡ ಕುಲಪುರೋಹಿತ ಆಲೂರರ ಕರ್ನಾಟಕದ ದರ್ಶನ ಬರೀ ಭಾವನಾತ್ಮಕವಾಗಿರದೇ, ವಾಸ್ತವಿಕ ನೆಲೆಗಟ್ಟಿನ ಮೇಲೆ ನಿಂತು ಪರಿಪೂರ್ಣವಾಗಿತ್ತು ಎಂದು ವಿವರಿಸಿ , ಅವರ ಪ್ರೇರಣೆಯಿಂದ ಕೆಲಸಮಾಡಲು ಶುರು ಮಾಡಿದ ರಾ.ಸ್ವಾ. ಪಂಚಮುಖಿ, ನಾ.ಶ್ರೀ ರಾಜಪುರೋಹಿತ ಮುಂತಾದವರು ಮಾಡಿದ ಇತಿಹಾಸ ಸಂಶೋಧನೆಯನ್ನು ನೆನಸಿಕೊಂಡು, ಆ ಕಟ್ಟಡದಲ್ಲಿದ್ದ ಪ್ರಾಚ್ಯವಸ್ತು ಸಂಗ್ರಹಾಲಯದಲ್ಲಿ ಒಂದು ಸುತ್ತು ಹೊಡಿಸಿ, ಕರ್ನಾಟಕ ವಿದ್ಯಾವರ್ಧಕ ಸಂಘಕ್ಕೊಂದು ರೌಂಡು ಹೊಡೆದು ಬರುವಷ್ಟರಲ್ಲಿ ಏಕೀಕರಣದ ಉಜರಣೆ ಆಗಿರುತ್ತಿತ್ತು. ಜಕಣಿ ಭಾವಿ ಹತ್ತಿರದಲ್ಲಿದ್ದ ವೀರಗಲ್ಲನ್ನು ತೋರಿಸುವುದರೊಂದಿಗೆ ಖಿಲಾಫತ ಚಳುವಳಿಯ ಕಥೆ ಶುರುಮಾಡಿ ಒಟ್ಟು ಸ್ವಾತಂತ್ರ್ಯ ಚಳುವಳಿಯ ಅವಲೋಕನವನ್ನು ಅಪ್ಪ ಮಾಡಿಸುತ್ತಿದ್ದ.

ಅದಾಗಲೇ ಇಪ್ಪತ್ತು-ಇಪ್ಪತ್ತೈದು ವರುಷ ಮಾಸ್ತರಿಕೆ ಮಾಡಿದ್ದ ಅಪ್ಪ, ಹುಡುಗರನ್ನು ಹಿಡಿದಿಡುವಂತೆ ಮಾತನಾಡುವ ಕಲೆಯನ್ನು ಕೈಗತಮಾಡಿ ಕೊಂಡಿದ್ದರಲ್ಲಿ ಯಾವುದೇ ವಿಶೇಷವಿರದೇ ಇರಬಹುದು, ಆದರೆ ಗೂಗಲ್‌ ಇರದ ಆ ದಿನಗಳಲ್ಲಿ ಅಷ್ಟೆಲ್ಲಾ ಮಾಹಿತಿ ಸಂಗ್ರಹಿಸಿ, ಉತ್ಸಾಹದಿಂದ ಹುಡುಗರಿಗೆ ಹೇಳುತ್ತಿದ್ದುದು ಅಪ್ಪನ ಹಿರಿಮೆಯೆಂದೇ ಹೇಳಬೇಕು.

12ನೇ ಈಯತ್ತೆ ಮುಗಿದ ಮೇಲೆ ನಾನು ಧಾರವಾಡದಲ್ಲಿಯೇ ಇಂಜನೀಯರಿಂಗ ಓದಲು ತೊಡಗಿದ ನಂತರ ಅಪ್ಪ ನನ್ನ ಜೀವನದಲ್ಲಿ ಮೂರನೇ ಪಾತ್ರ- ಗೆಳೆಯನಾಗಿ ನಿಭಾಯಿಸತೊಡಗಿದ. ಧಾರವಾಡಕ್ಕೆ ನನ್ನ ಭೇಟಿಗೆ ಬಂದಾಗ ಮೊದಲಿನಂತೆ 'ಹೊಟ್ಟಿಗೆ' ಎಂದು ಅವ್ವ ಕಟ್ಟಿದ ತಿನಿಸು, 'ನೆತ್ತಿಗೆ' ಎಂದು ಪುಸ್ತಕ ತರುತ್ತಿದ್ದನಾದರೂ, ಆಗಾಗ ನನ್ನನ್ನೂ ಪುಸ್ತಕ ಅಂಗಡಿಗಳಿಗೆ ಕರೆದುಕೊಂಡು ಹೋಗುತ್ತಿದ್ದ. ಹಾಗೇಯೆ 'ಭಾಳ ದಿವಸಾತು ಉಪವನ್ದಾಗ ದ್ವಾಸಿ ತಿಂದು… ಹೋಗುಣು ನಡಿಯಲೆ' ಎಂದು ಆಜಾದ ಪಾರ್ಕ ಬದಿಯಲ್ಲಿದ್ದ ‘ಹೋಟಲ್‌ ಉಪವನ’ಕ್ಕೆ ದಬ್ಬಿಕೊಂಡುಹೋಗುತ್ತಿದ್ದ. ಅಜಾದ್‌ ಪಾರ್ಕಿಗೆ ಒಂದು ಬದಿಯಿಂದ ತೆರೆದುಕೊಂಡಿದ್ದ ಉಪವನ ಹೋಟಲು ಅಪ್ಪನ ಪ್ರೀತಿಯ ಜಾಗಗಳಲ್ಲಿ ಒಂದು. ಆಗೀಗ ಕಾಲಿಗೆ ತೊಡರುತ್ತಿದ್ದ ಐತಿಹಾಸಿಕ ಕುರುಹುಗಳು ಅಪ್ಪನಿಗೆ ತನ್ನ 'ಗುರು' ಪಾತ್ರವನ್ನು ನೆನಪಿಸುತ್ತಿದ್ದವು. ಕಿಟ್ಟಲ್‌ ಕಾಲೇಜು ಮುಂದೆ ಹೋಗುತ್ತಿದ್ದಾಗ ಅಪ್ಪ ಯುರೋಪಿನಲ್ಲಿ ಧಾರ್ಮಿಕ ಅಂಧಕ್ಕಾರ ಜಾರಿಯಲ್ಲಿದ್ದಾಗ, ಅದನ್ನು ವಿರೋಧಿಸಿ ಪ್ರೊಟೆಸ್ಟಂಟರು ಬಂಡೆದ್ದುದು, ನಂತರ ಕ್ಯಾಥೋಲಿಕ್ಕರು ಜಾಗ್ರತಿಗೊಂಡಿದ್ದರಿಂದ ಶುರುಮಾಡಿ, ಕಿಟ್ಟೆಲ-ಮೋಗ್ಲಿಂಗ ಇತ್ಯಾದಿ ಮಹಾನುಭಾವರ ಕನ್ನಡ ಸೇವೆಯವರೆಗೆ ಅಪ್ಪನ ವಿವರಣೆಯಿರುತ್ತಿತ್ತು. ಹಾಗೆಯೇ ಕಲಾಭವನದ ಆವರಣದಲ್ಲಿರುವ ಬೇಂದ್ರೆ ಮೂರ್ತಿ ನೋಡಿ ಬೇಂದ್ರೆಯವರ ಸರಳವಾಗಿ ಅರ್ಥವಾಗದ, ಸರಳವೆನಿಸಿದರೂ ಸಂಕೀರ್ಣ ಅರ್ಥದ ಕವಿತೆಗಳು ನೆನಪಿನಿಂದಲೆ ಹೇಳಿ, ಅವುಗಳನ್ನು ವಿವರಿಸುತ್ತಿದ್ದ. ಬೇಂದ್ರೆಯವರನ್ನು ತಾನು ಭೇಟಿಯಾದ, ಅವರನ್ನು ತಮ್ಮ ಶಾಲೆಯ ಕಾರ್ಯಕ್ರಮಕ್ಕೆ ಕರೆದುಕೊಂಡು ಹೋದದ್ದು ( 1970?) ನೆನಪುಮಾಡಿಕೊಳ್ಳುತ್ತಿದ್ದ. ಅಂದಹಾಗೆ, ಬೇಂದ್ರೆ ಕಾವ್ಯದ ಬಗ್ಗೆ ಹುಚ್ಚು ಎನ್ನುವಷ್ಟರ ಮಟ್ಟಿಗೆ ಆಸಕ್ತಿ ಹೊಂದಿದ್ದ ಅಪ್ಪ, ಬೇಂದ್ರೆ ಕಾವ್ಯ ಮತ್ತು ಮತ್ತೊಬ್ಬ ಹಿಂದಿ ಕವಿ(ಯಾರು ??) ಕಾವ್ಯದ ನಡುವಿನ ಹೋಲಿಕೆಗಳ ಬಗ್ಗೆ ಪಿ ಎಚ್ ಡಿ ಮಾಡಲು ರಜಿಸ್ಟರ್ ಮಾಡಿಸಿದ್ದನಂತೆ. ಆದರೆ ಮಕ್ಕಳು ಮರಿಗಳಾಗಿ ಸಂಸಾರದ ಭಾರ ಹೆಚ್ಚಾದ ಮೇಲೆ ಅದನ್ನು ಅರ್ಧಕ್ಕೆ ಬಿಟ್ಟಿದ್ದನಂತೆ.

ನಾನು ಕಾಲೇಜು ಮುಗಿಸಿ ಬೆಂಗಳೂರು ಸೇರಿದ ಮೇಲೂ ಅಪ್ಪ-ನನ್ನ ಸ್ನೇಹ ಬಹಳವೇನು ಬದಲಾಗದೇ ಮುಂದುವರಿದಿತ್ತು. ಮನೋಹರ ಗ್ರಂಥಮಾಲೆ / ಸಮಾಜ ಪುಸ್ತಕಾಲಯಗಳ ಬದಲು ಅಂಕಿತ ಪುಸ್ತಕ/ ಸಪ್ನಾ ಬುಕ್ ಹೌಸ್‌ಗಳು, ಹೋಟಲ್‌ ಉಪವನ ಬದಲು ವಿದ್ಯಾರ್ಥಿ ಭವನ/ ಕಾಮತ ಯಾತ್ರಿನಿವಾಸ ಬಂದಿದ್ದವು. "ನಾನು ಒಂದ್ಸಲ ಪೇಪರ್‌ ಚೆಕ್ಕಿಂಗಿಗೆ ಬಂದಾಗ, ಇಲ್ಲೇ.. " ಎಂದು ಅಪ್ಪ ಬೆಂಗಳೂರಿನ ಹಳೆಯ ಬೇರುಗಳನ್ನು ತಡಕಲು ಪ್ರಯತ್ನಿಸುತ್ತಿದ್ದನಾದರೂ ನಿತ್ಯ ಬದಲಾಗುವ ಬೆಂಗಳೂರಿನಲ್ಲಿ ಹಳೆಯ ಕುರುಹುಗಳು ಅಳಿಸಿರುತ್ತಿದ್ದರಿಂದ ಗಾಡಿ ಮುಂದುವರಿಯುತ್ತಿರಲಿಲ್ಲ.. !

--------------------------------------------------------------------------------------

ಅಪ್ಪನ ವ್ಯಕ್ತಿತ್ವದಲ್ಲಿ ಹಲವು ಕುಂದುಗಳಿದ್ದವು- ಪ್ರಶ್ನೆಯೇ ಇಲ್ಲ. ಆದರೆ ಎಷ್ಟೇ ವಯಸ್ಸಾದರೂ ಏನಾದರೂ ಹೊಸತನ್ನು ಕಲಿಯುವ ಅಪ್ಪನ ಬಾಲಕುತೂಹಲ ಯಾರಿಗಾದರೂ ಅನುಕರಣೀಯ. ಹಾಗೆಯೇ ಅವನ ಆರ್ಥಿಕ ಶಿಸ್ತು ಕೂಡ- ಸೊನ್ನೆಯಿಂದ ಜೀವನ ಶುರುಮಾಡಿ, ತನ್ನ ಚಿಕ್ಕ ಪಗಾರದಲ್ಲಿಯೇ , ಸಾಲ ಮಾಡದೇ, ಆರು ಜನರ ಸಂಸಾರ ಸಾಗಿಸಿ, ಮಕ್ಕಳಿಗೆಲ್ಲ ಅವರು ಓದುತ್ತೇನೆಂದ ಕೋರ್ಸ್ ಓದಿಸಿ, ನಡುವೆ ಸಂಬಂಧಿಗಳ ಮಕ್ಕಳನ್ನು ಮನೆಯಲ್ಲಿಟ್ಟುಕೊಂಡು ಸಾಲಿ ಕಲಿಸಿದ್ದು ಅಪ್ಪನ ಆರ್ಥಿಕ ಶಿಸ್ತಿಗೆ ಸಾಕ್ಷಿ.

ಸುಮಾರು ಮೂವತ್ತೈದು ವರುಷ ನನಗೆ ತಂದೆಯಷ್ಟೇ ಅಲ್ಲ, ಗುರುವಾಗಿ, ಸ್ನೇಹಿತನಾಗಿ, ಮಾರ್ಗದರ್ಶಿಯಾಗಿ ಅಪ್ಪ ಒದಗಿಸಿದ ದಿವ್ಯ ಸಾಂಗತ್ಯದ ಋಣವನ್ನು ಹೇಗೆ ತೀರಿಸಲಿ ಎಂದು ಯೋಚಿಸುತ್ತೇನೆ. 'ನಾವಿಬ್ಬರು, ನಮಗೊಬ್ಬನೆ' ತತ್ವಕ್ಕೆ ನಾನು- ನನ್ನ ಶ್ರೀಮತಿ ಬದ್ಧರಾಗಿರುವುದರಿಂದ, ಮತ್ತು ನಮಗೀಗಾಲೆ ಒಬ್ಬ ಮಗನಿರುವುದರಿಂದ, ಅಪ್ಪನಿಗೆ 'ಮತ್ತೆ ನನ್ನ ಮಗನಾಗಿ ಹುಟ್ಟಿ ಬಾ' ಎಂದು ಬೇಡಿಕೊಳ್ಳುವಂತಿಲ್ಲ. ನನ್ನ ಮಗನಿಗೆ ಇನ್ನೂ ಒಳ್ಳೆಯ ತಂದೆಯಾಗುವುದೇ ಬಹುಷಃ ನಾನು ಅಪ್ಪನ ಋಣವನ್ನು ತೀರಿಸುವ ಏಕೈಕ ಮಾರ್ಗ....

punಚಾಮೃತ

2011-07-09T21:12:00.000-07:00

ರಾಜಕಾರಣಿಗಳು ಉಪವಾಸ ಮಾಡದಿದ್ದರೂ ಸರಿ, ಆದ್ರೆ "ತಿನ್ನುವುದು" ಬಿಟ್ಟರೆ ಒಳ್ಳೆಯದು..

ಏನಿದು ಕರ್ಮ, ವೀರಾ ?

2011-07-04T10:56:00.000-07:00

(ಕರ್ಮವೀರದ ಸಂಪಾದಕರಿಗೊಂದು ಪತ್ರ ಬರೆದಿದ್ದೆ. ಅದು ಅವರ ಕ.ಬು.ಗೆ ಸೇರಿರಬೇಕೆಂಬ ಅಧಮ್ಯ ವಿಶ್ವಾಸದಿಂದ ಅದರ ಸಾಫ್ಟ್ ಕಾಪಿಯನ್ನು ಇಲ್ಲಿ ಪ್ರಕಟಿಸುತ್ತಿದ್ದೇನೆ)

ಮಾನ್ಯರೆ,

ನನ್ನ ಪ್ರೀತಿಯ ಕರ್ಮವೀರದ ಮೊನ್ನೆಯ ಸಂಚಿಕೆ ( ಸಂಪುಟ ೬೮, ಸಂಚಿಕೆ ೨೯) ಮುಖಪುಟ ನೋಡಿ ಈ ಪತ್ರ ಬರೆಯುತ್ತಿದ್ದೇನೆ. ಕರ್ಮವೀರದ ಬಹುದಿನಗಳ ಓದುಗನಾದ ನನಗೆ ಕರ್ಮವೀರದ ಬಗೆಗಿನ ನನ್ನ ತಕರಾರನ್ನು ನಿವೇದಿಸಿಕೊಳ್ಳುವ ಹಕ್ಕಿದೆ ಎಂಬ ಭಾವನೆಯಿಂದ ಈ ಪತ್ರ ಬರೆಯುತ್ತಿದ್ದೇನೆ.

"ಮುಖ ಮನಸ್ಸಿನ ಪರಿವಿಡಿ" ಎಂದು ದೊಡ್ಡವರು ಹೇಳುತ್ತಾರೆ. ಅದೇ ಮಾತನ್ನು ಪತ್ರಿಕೆಗಳಿಗೂ ಅನ್ವಯಿಸಿ, "ಮುಖಪುಟ ಪತ್ರಿಕೆಯ ಹೂರಣಕ್ಕೆ ಪರಿವಿಡಿ" ಎಂದು ಹೇಳಬಹುದಾದರೂ ಅದು ತಮ್ಮ ಪತ್ರಿಕೆಗೆ ಅನ್ವಯಿಸುವುದಿಲ್ಲ. ಯಾಕೆಂದಿರಾ ? ನೀವೆ ಮೊನ್ನೆಯ ಸಂಚಿಕೆಯನ್ನು ನೋಡಿ ಅದರಲ್ಲಿರುವುದು "ಕೃತಿ ಚೋರರಿದ್ದಾರೆಂಬ ಎಚ್ಚರಿಕೆ" ಮತ್ತು ಬೆಕ್ಕುಗಳ (ಕ್ಯಾಟ್ಸ್) ಜಾಗಕ್ಕೆ ಹೋದವಳಾದ ಸೋನಾಕ್ಷಿ ಎಂಬಾಕೆಯ ಚಿತ್ರ. ಈ ಸೋನಾಕ್ಷಿ ಯಾರು ? ಈಕೆ ಬೆಕ್ಕುಗಳ ಜಾಗಕ್ಕೆ ಯಾಕೆ ಹೋದಳು ? ಆಕೆ ಯಾವುದಾದರೂ ಸುಡುಗಾಡಿಗೆ ಹೋಗಲಿ, ಅದಕ್ಕೆ ನಮ್ಮ ಕರ್ಮವೀರದ ಮುಖಪುಟದ ಪ್ರಾಶಸ್ತ್ಯ ಯಾಕೆ ಸಿಕ್ಕಿತು ? ಎಂದು ತಲೆಕೆಡಿಸಿಕೊಂಡು ಕರ್ಮವೀರ ತಿರುವಿ ಹಾಕಿದರೆ ಕೊನೆಯ ಪುಟದ ಕೊನೆಯ ಪರಿಚ್ಛೇದದ ತನಕ ಓದಬೇಕಾಯಿತು. ಆದರೂ ಈಕೆಯ ಸುದ್ದಿಗೆ ಮುಖಪುಟದ ಪ್ರಾಶಸ್ತ್ಯ ಯಾಕೆ ಸಿಕ್ಕಿತು ? ಎಂದು ಅರ್ಥವಾಗಲಿಲ್ಲ.

ಸೂರ್ಯಕಾಂತ ಕಾಮತರಿಗೆ ಎಪ್ಪತ್ತೈದಾಗಿದ್ದು ತಮಗೆ ಮುಖಪುಟ ಯೋಗ್ಯ ಸಂಗತಿ ಎನಿಸಲಿಲ್ಲ, ಹಂಪೆಯ ಬಂಡೆಗಳು ಮುಖಪುಟ ಸಿಂಗರಿಸಬಹುದೆನ್ನಿಸಲಿಲ್ಲ, ಅಥವಾ ಯುರೋಪ್ ಪ್ರವಾಸಕ್ಕೂ ಮುಖಪುಟದ ಪ್ರಾಧಾನ್ಯತೆ ಕೊಡಬೇಕು ಎನ್ನಿಸಲಿಲ್ಲ, ಬದಲಿಗೆ ಈ ಸೋನಾಕ್ಷಿ ಎಂಬ ಬಾಲಿಕೆಯನ್ನೇ ಮುಖಪುಟದಲ್ಲಿ ಕೂಡಿಸಬೇಕೆಂಬ ತಮ್ಮ ಬಾಲಿವುಡ್ ಕುರುಡುಪ್ರೀತಿಗೆ ನನ್ನ ಧಿಕ್ಕಾರವಿದೆ. ಈ ಸಂಚಿಕೆಯೊಂದೆ ಅಲ್ಲ, ಇತ್ತೀಚಿಗೆ ತಮ್ಮ ಪತ್ರಿಕೆಯಲ್ಲಿ ಅನಗತ್ಯವಾಗಿ ಬಾಲಿವುಡ್ಡು ಪುಟ ಮಾಲಿನ್ಯಮಾಡುತ್ತಿದೆ ಎಂಬುದು ನನ್ನ ಅನಿಸಿಕೆ. ಕನ್ನಡಿಗರ ಅಭ್ಯುದಯದ ಕನಸನ್ನು ಹೊತ್ತ ಮಹನೀಯರು ಆರಂಭಿಸಿದ ನಮ್ಮ ಪ್ರೀತಿಯ ಕರ್ಮವೀರದಲ್ಲಿ ಕನ್ನಡಿಗರಿಗೆ ಯಾವುದೇ ರೀತಿಯಲ್ಲೂ ಅನಿವಾರ್ಯವಲ್ಲದ ಬಾಲಿವುಡ್ಡು ಮೆರೆಯುವುದು ನೋಡಿ ನೋಡಿ ಬೇಜಾರಾಗಿ ತಮ್ಮಲ್ಲಿ ಕೆಲ ಪ್ರಶ್ನೆ ಕೇಳಬಯಸುತ್ತೇನೆ:

ಏನಕೇನ ಪ್ರಕಾರೇಣ ಪ್ರಸಿದ್ಧರಾಗುವುದು ಹಿಂದೆಂದಿಗಿಂತಲೂ ಇಂದು ಹೆಚ್ಚು ಲಾಭಕರ. ನಿಮ್ಮ ಪತ್ರಿಕೆಯಲ್ಲಿ ಒಂದು ಬಾಲಿವುಡ್ ಸಿನೇಮಾದ ಬಗ್ಗೆ ಬರೆದರೆ ಕಾಸಿಲ್ಲದೇ ಅದಕ್ಕೆ ಪ್ರಚಾರ ಸಿಕ್ಕು ಕನ್ನಡ ಚಿತ್ರದ ಗಲ್ಲಾಪೆಟ್ಟಿಗೆಗೆ ಹೊಡೆತ ಕೊಡುತ್ತದೆ. ಬಾಲಿವುಡ್ಡಿನ ನಟಿಯ ಬಗ್ಗೆ ಬರೆದರೆ, ಆಕೆ ನೀವು ಕನ್ನಡ ಜನಸಮುದಾಯದಲ್ಲಿ ಕೊಟ್ಟ ಖ್ಯಾತಿಯನ್ನು ಎನ್ಕ್ಯಾಷ್ ಮಾಡಿಕೊಳ್ಳಲು, ಯಾವುದೋ ಪ್ರಾಡಕ್ಟಿಗೆ ರಾಯಭಾರಿಯಾಗಿ, ಕನ್ನಡ ನಟಿಯ ಅವಕಾಶವನ್ನು ಕಿತ್ತುಕೊಳ್ತಾಳೆ. ಕನ್ನಡ ಸಿನೇಮಾದ ಗಲ್ಲಾಪೆಟ್ಟಿಗೆಗೆ, ಕನ್ನಡ ನಟಿಯ ಅವಕಾಶಕ್ಕೆ ಪೆಟ್ಟು ಬಿದ್ದರೆ ನಿಮಗೇನು ಲಾಭ ? ನಿಮ್ಮ ಓದುಗ ದೊರೆಯಾದ ನನಗೇನು ಲಾಭ ?

ಇಲ್ಲಿ ಒಂದು ಗುಟ್ಟಿನ ಪ್ರಶ್ನೆ : ಇತ್ತೀಚೆಗೆ ಪತ್ರಿಕೆಗಳು ಕಾಸಿಗಾಗಿ ತಮ್ಮ ನಿಯತ್ತನ್ನು ಮಾರಿಕೊಳ್ತವೆಯಂತೆ. ಎಡಿಟರ್ಸ್ ಗಿಲ್ಡ್ಗೆ ಹೇಳೋಲ್ಲ, ನಿಜ ಹೇಳಿ - ನೀವು ಬಾಲಿವುಡ್ ಜನರಿಂದ ಕಾಸು ಪಡೆದು ಅವರ ಸುದ್ದಿ ಪ್ರಕಟಿಸಿ ಅವರ ಜನಪ್ರಿಯತೆಯನ್ನು ಕನ್ನಡ ಜನಮಾನಸದಲ್ಲಿ ಹೆಚ್ಚಿಸಲು ಸಹಾಯ ಮಾಡ್ತೀರಾ ? ಹೌದುಎಂದಿರಾದರೆ, ಕನ್ನಡ ಚಿತ್ರೋದ್ಯಮ ಹಾಳಾಗಿ ಹೋಗಲಿ, ನೀವಾದರೂ ಕಾಸು ಮಾಡ್ತಾ ಇದ್ದೀರಲ್ಲಾ, ಸಂತೋಷ. ಶಾಂತಂ ಪಾಪಂ.. ನಾವು ನಿಯತ್ತಿನ ಜನ ಎಂದಿರಾ ? ಹಾಗಾದರೆ ಬಾಲಿವುಡ್ಡಿನ ಬಾಡಿಗೆ ಬಂಟರಂತೆ ಬರೆಯೋದು ಯಾಕೋ...

ಜನಕ್ಕೆ ಬೇಕಾಗಿರೋದು ಬಾಲಿವುಡ್ ಮಸಾಲಾ, ಅಲ್ಲಿಯ ತೊಗಲು ಪ್ರದರ್ಶನ s ಅದಕ್ಕೆ ಅದನ್ನು ನಾವು ಪ್ರಕಟಿಸೋದು ಎನ್ನುವುದು ನಿಮ್ಮ ಸಮಜಾಯಿಷಿಯೇ ? ಕನ್ನಡದ ಸುಸಂಸ್ಕೃತ ಓದುಗರು ಬಾಲಿವುಡ್ ಮಸಾಲಾನೇ ಬೇಕು ಎಂದು ನಿಮಗೆ ಯಾವಾಗ ಹೇಳಿದರು ಸ್ವಾಮೀ ? ಅವರಿಗೆ ಏನು ಬೇಕು ಎಂದು ಸರ್ವೇ ಏನಾದರೂ ನೀವು ಮಾಡಿದ್ದಿರಾ ? ನಾವು ನಮ್ಮ ಪತ್ರಿಕೆಯಲ್ಲಿ ಇನ್ನು ಮುಂದೆ ಬಾಲಿವುಡ್ ಮಸಾಲಾ, ಅಲ್ಲಿಯ ತೊಗಲು ಪ್ರದರ್ಶನ ಪ್ರಕಟಿಸುವುದಿಲ್ಲ. ಅದರಿಂದ ನಿಮಗೇನಾದರೂ ಬೇಜಾರಿದೆಯಾ? ಎಂದು ನೀವು ಕೇಳಿದ್ದು ನೆನಪಿಗೆ ಬರತಾ ಇಲ್ಲ...

ಬಾಲಿವುಡ್ ಬಗ್ಗೆ ಓದುವುದರಿಂದ ನಮ್ಮ ಪತ್ರಿಕೆ ಓದುವ ಕನ್ನಡಿಗರ ಜ್ಞಾನ ದಿಗಂತ ವಿಸ್ತಾರಗೊಂಡು, ಕನ್ನಡಿಗರ ಮೋಕ್ಷ ಸಾಧನೆಯ ಮಾರ್ಗ ಸರಳವಾಗುತ್ತದೆ ಎಂದಿರಾ ? ಅಥವಾ ಬಾಲಿವುಡ್ ಬಗ್ಗೆ ನಾವು ಬರೆಯೋದು ಕನ್ನಡಿಗರಲ್ಲಿ ಜನರಲ್ ನಾಲೇಜ್ ಹೆಚ್ಚಿಸೋದಕ್ಕಪ್ಪಾ ಎಂದಿರಾ ? ಸ್ವಾಮಿ ನಾನು ಇಷ್ಟು ಗಂಭೀರವಾಗಿ ಹೇಳ್ತಿರಬೇಕಾದರೇ ನೀವು ಹೀಗೆ ಜೋಕ್ ಮಾಡ್ಬಹುದಾ ? ಬಾಲಿವುಡ್ಡಿನ ಸ್ಮಾಲ್ಮ್ಯಾನ್ ಖಾನ ಎಂಬ ನಟ ಅದ್ಯಾವಳೋ ಹಳೇ ಗರ್ಲ್ಫ್ರೆಂಡನ್ನು ಗೋಳುಹೊಯ್ಕೋತಿದಾನೆ ಎಂದು ನೀವು ಬರೆದದ್ದನ್ನು ಓದಿ ನಾನೇನು ಗಳಿಸುತ್ತೇನೆ ? ಮೋಕ್ಷ ? ರಂಭೆ-ಮೇನಕೆಯರ ಮ್ಯಾಟನಿ ಶೋಗೆ ಫುಕ್ಕಟೆ ಟಿಕೀಟು ?

ಹಿಂದಿ ನಮ್ಮ ರಾಷ್ಟ್ರಭಾಷೆ, ಬಾಲಿವುಡ್ಡು ಸಿನೆಮಾಗಳು ಕನ್ನಡಿಗರಿಗೆ ಹಿಂದಿಯ ದೀಕ್ಷೆ ತೊಡಿಸಿಸುವ ಮಿಷನರಿಗಳಿದ್ದಂತೆ. ಹಿಂದಿ ಪ್ರಸಾರದಿಂದ ದೇಶ ಬಲಿಷ್ಠವಾಗುತ್ತದೆಯಾದ್ದರಿಂದ, ಬಾಲಿವುಡ್ ಸಿನೇಮಾಗಳಿಗೆ ಸಹಾಯ ಮಾಡುವುದು ದೇಶಕ್ಕಾಗಿ ನನ್ನ ಅಳಿಲು ಸೇವೆ ಎಂದಿರಾ ? ಸ್ವಾಮಿ ತಮಾಷೆ ಮಾಡಬೇಡಿ ಎಂದು ಹೇಳ್ತಾನೇ ಇದಿನಿ.. ನೀವು ಮತ್ತೂ ಹಾಗೆ ಮಾಡೋದಾದರೆ ನನಗೆ ಕೋಪ ಬಂದ್ ಬಿಡುತ್ತೆ !!

ಅಂದಹಾಗೆ, ಹಿಂದಿಯೊಂದೇ ನಮ್ಮ ರಾಷ್ಟ್ರಭಾಷೆಯಾದರೆ ಕನ್ನಡವೇನು ಪಾಕಿಸ್ತಾನದ ರಾಷ್ಟ್ರಭಾಷೆಯೇ ?

ಕನ್ನಡಿಗರಾಗಿ ನೀವು ಇಷ್ಟು ಸಂಕುಚಿತ ಬುದ್ಧಿಹೊಂದಿರುವುದು ತಪ್ಪು. ದೊಡ್ಡ ಮನಸ್ಸಿನವರಾಗಿ, ವಿಶ್ವಮಾನವರಾಗಿ ಎಂದು ಬುದ್ಧಿ ಹೇಳ್ತಾ ಇದೀರಾ ? ನಮಗಿಂತಾ ನಿಮ್ಮ ಉಪದೇಶಕ್ಕೆ ಅರ್ಹರಾದ ಜನರು ಬಹಳ ಇದ್ದಾರೆ ಅನಿಸುತ್ತದೆ. ಬೇರೆ ಭಾಷೆಯ ಪತ್ರಿಕೆಗಳು ಕನ್ನಡ ಸಿನೇಮಾಗಳ ಬಗ್ಗೆ ಬರಹ ಪ್ರಕಟಿಸುತ್ತಾರಾ ? ಕನಿಷ್ಟ ಬೆಂಗಳೂರಿನಿಂದ ಪ್ರಕಟವಾಗುವ ಪತ್ರಿಕೆಗಳು ? ನಿಮ್ಮ ವಿಶ್ವಮಾನವ ಸಂದೇಶದ ಪ್ರಭಾವವಾಗಿ, ಬೆಂಗಳೂರಿನಿಂದ ಪ್ರಕಟವಾಗುವ ಅನ್ಯ ಭಾಷಾ ಪತ್ರಿಕೆಗಳು ತಮ್ಮ ಪುಟಗಳಲ್ಲಿ ಕನ್ನಡದ ಪಾಠಗಳನ್ನು ಪ್ರಕಟಿಸಿದರೆ, ನಿಮ್ಮ ಪತ್ರಿಕೆಗಳಿಗೆ/ಪುಸ್ತಕಗಳಿಗೆ ಇನ್ನಷ್ಟು ಓದುಗರಾದರೂ ಸಿಕ್ಕಾರು..

ಹಾಗೆ ಒಂದ್ಮಾತು, ನನಗೆ ತಿಳಿದ ಮಟ್ಟಿಗೆ ವಿಶ್ವಮಾನವನಾಗುವುದು ಎಂದರೆ 'ನನ್ನ' ಹಿತವನ್ನು ತ್ಯಾಗಮಾಡುವುದೇ ಹೊರತು 'ನಮ್ಮ' (ಕನ್ನಡ ಜನ ಸಮುದಾಯದ) ಹಿತತ್ಯಾಗವಲ್ಲ. ಅಲ್ವಾ ?

ಬಾಲಿವುಡ್ಡಿನ ಸುದ್ದಿಗಳನ್ನು ಪ್ರಕಟಿಸುವುದು ಕನ್ನಡ ಪತ್ರಿಕೆಗಳ ಸಿದ್ಧ-ಸೂತ್ರವೇ ಆಗಿ ಹೋಗಿದೆ ಎಂಬ ಹಳೇರಾಗವನ್ನೇ ಹಾಡ್ತಾ ಇದೀರಾ ? ಸಿದ್ಧ-ಸೂತ್ರಗಳನ್ನು ಮುರಿಯುವುದೇ ಮಾಧ್ಯಮ ಲೋಕದ ಏಕೈಕ ಸೂತ್ರ ಅಲ್ಲವೇ ? ಮೊನ್ನೆ-ಮೊನ್ನೆ ಬೆಂಗಳೂರಿನ ಎಪ್ಫೆಮ್ ರೇಡಿಯೋಗಳು ಬಾಲಿವುಡ್ಡಿನ ತುತ್ತೂರಿ ಊದುತ್ತಿದ್ದಾಗ, ಹೊಸದಾಗಿ ಬಂದ ವಾಹಿನಿಯೊಂದು ಬಾಲಿವುಡ್ಡಿನ ಹಾಡುಗಳಿಗೆ ಗೇಟ್ಪಾಸ್ ಕೊಟ್ಟು ಹೊಸ ಟ್ರೆಂಡ್ ಶುರು ಮಾಡಲಿಲ್ಲವೇ ? ಹಾಗೆಯೇ ಬಾಲಿವುಡ್ಡಿನ ಬಿಟ್ಟಿ ಸುದ್ದಿಗಳಿಗೆ ಬೈ ಬೈ ಹೇಳುವ ಸತ್ಸಂಪ್ರದಾಯವನ್ನೂ ಕರ್ಮವೀರ ಯಾಕೆ ಶುರುಮಾಡಬಾರದು ?

ಹಾಗೆ ನಿಮಗೆ ಗೊತ್ತಿರಲಿ ಅಂತ:

o ಹಲವಾರು ಜನರಿಗೆ ನನಗನಿಸಿಂದತೆಯೇ ಅನಿಸಿರಬಹುದು, ಆದರೆ "ಹಾಳಾಗಿ ಹೋಗ್ಲಿ ಬಿಡು" ಎಂದು ನಿಮಗೆ ತಿಳಿಸದೇ ಸುಮ್ಮನಾಗಿರಬಹುದು. ನಾನು ಮಾತ್ರ ಪತ್ರ ಬರೆದು ನಿಮ್ಮ ತಲೆ ತಿನ್ನುತ್ತಿದ್ದೇನೆ, ಯಾಕಂದರೆ ನನ್ನಂತಹ ಓದುಗ ದೊರೆಯ ಅಭಿಪ್ರಾಯವನ್ನು ನೀವು ಗಂಭೀರವಾಗಿ ಪರಿಗಣಿಸುತ್ತೀರಿ ಎಂಬ ನಂಬಿಕೆ ಇದೆ.

o ಬೈದು ಬರೆಯುವ ಬಹುತೇಕರು ಪತ್ರವನ್ನು ಅನಾಮಿಕರಾಗಿ ಬರೆದಿರುತ್ತಾರೆ. ನಾನು ಮಾತ್ರ ನನ್ನ ಹೆಸರು-ವಿಳಾಸಗಳನ್ನು ಸ್ಪಷ್ಟವಾಗಿಯೇ ನಮೂದಿಸಿದ್ದೇನೆ. ಯಾಕೆಂದರೆ ನಾನು ಬರೆದದ್ದು ಬೈಗುಳವಲ್ಲ, ರಚನಾತ್ಮಕ ವಿಮರ್ಶೆ ಎಂದು ಅರ್ಥಮಾಡಿಕೊಳ್ಳುವ ಮನಸ್ಸು ನಿಮಗಿದೆ ಎಂಬ ವಿಶ್ವಾಸವಿದೆ.

o ನನ್ನ ಕೆಲ ಗೆಳೆಯರು ಶುಕ್ರವಾರದ ರಾತ್ರಿಯಾದ ಈ ಸಮಯದಲ್ಲಿ ಪಬ್ಬುಗಳಲ್ಲಿ ಮಜಾ ಮಾಡುತ್ತಿದ್ದರೆ, ಇನ್ನು ಕೆಲವರು ಟೀವಿ ಮುಂದೆ ಕುಳಿತು ಐಪಿಎಲ್ ನೋಡುತ್ತಿದ್ದಾರೆ. ನಾನು ಮಾತ್ರ ಈ ಪತ್ರಕ್ಕಾಗಿ ಕೀಬೋರ್ಡ್ ಕುಟ್ಟುತ್ತಿದ್ದೇನೆ, ಯಾಕೆಂದರೆ ಕರ್ಮವೀರ/ಕನ್ನಡದ ಬಗ್ಗೆ ನನಗೆ ಕಾಳಜಿ ಇದೆ.

punಚಾಮೃತ

2011-06-21T09:25:00.000-07:00

ಕರ್ನಾಟಕದ ನಸಿಬೇ ಸುಮಾರಿದೆ ಅನಿಸುತ್ತೆ.. ಮೊನ್ನೆ ಕರ್ನಾಟಕದಲ್ಲಿ ಆನೆ ಕಾಟವಾಗಿದ್ದರೆ, ಈಗ ಆಣೆ ಕಾಟ ಶುರುವಾಗಿದೆ...

ಮುಂಡೆ ಮಕ್ಕಳು

2011-06-18T09:06:00.000-07:00

¿ ಮುಂಡೆ ಮಕ್ಕಳು ಎಂದರೆ ಯಾರಿಗೆ ಸಿಟ್ಟು ಬರೋದಿಲ್ಲಾ ?

✔ ಮತ್ತ್ಯಾರಿಗೆ, ಗೋಪಿನಾಥ ಮುಂಡೆ ಮಕ್ಕಳಿಗೆ..

ಸಮಾಪ್ti

2011-04-01T02:50:00.000-07:00

ಟೆಕ್ಸಾಸ್ ಇನ್ಸ್ ಟ್ರುಮೆಂಟ್ಸ್ (ಟಿಆಯ್) ಕಂಪನಿಯಲ್ಲಿ ವಿವಿಧ ವಿಭಾಗಗಳಿಗೆ, ಪ್ರಾಜೆಕ್ಟುಗಳಿಗೆ ti ಅಕ್ಷರಗಳಿಂದ ಅಂತ್ಯಗೊಳ್ಳುವ ಭಾರತೀಯ ಭಾಷಾ ಮೂಲದ ಹೆಸರುಗಳನ್ನು ಕೊಡುವುದು ಸಂಪ್ರದಾಯ. ಉದಾಹರಣೆಗೆ ಪ್ರಗti ಎನ್ನುವುದು ಕಲಿಕೆಯ ಕಾರ್ಯಕ್ರಮವಾದರೆ, ಯುಕ್ti ಎನ್ನುವುದು ಪ್ರಾಜೆಕ್ಟಿನ ಹೆಸರು.

ಅದೇ ಸಂಪ್ರದಾಯ ಪಾಲಿಸಿ ಇನ್ನಷ್ಟು ಹೆಸರು ಬದಲಿಸಲು ಅವರು ಬಯಸಿದರೆ, ನನ್ನ ಕಡೆಯಿಂದ ಅವರಿಗೆ ಕೆಲವು ಹೆಸರುಗಳ ಸಲಹೆಗಳು:

Ethics office: ನೀti
payroll office: ಪ್ರಾಪ್ti
job openings system : ನಿಯುಕ್ti
IT Department: ಮಾಹಿti

ಇನ್ನು ತಮ್ಮ ಉದ್ಯೋಗಿಗಳಿಗೆ ಕೆಲ ಪದವಿಕೊಡಬೇಕೆಂದು ಅವರು ಬಯಸಿದರೆ, ಇವುಗಳನ್ನು ಉಪಯೋಗಿಸಬಹುದು

ಅತೀ ಜಾಣ ಪುರುಷ ಉದ್ಯೋಗಿಗೆ: ಬ್ರಹಸ್ಪti
ಅತೀ ಜಾಣ ಸ್ತ್ರೀ ಉದ್ಯೋಗಿಗೆ: ಸರಸ್ವti
ಅತೀ ಸುಂದರ ಸ್ತ್ರೀ ಉದ್ಯೋಗಿಗೆ: ರti
ಅತೀ ಕಿಡಿಗೇಡಿ ಪುರುಷ ಉದ್ಯೋಗಿಗೆ: ಕೋti

"ಟೆಕ್ಸಾಸ್ ಇನ್ಸ್ ಟ್ರುಮೆಂಟ್ಸನಲ್ಲಿ ಕೆಲಸಮಾಡುವ ನೀನೆ ಅವರಿಗೆ ನೇರವಾಗಿ ಸಲಹೆ ಕೊಡಬಹುದಲ್ಲಾ ? ಬ್ಲಾಗಿನಲ್ಲಿ ಯಾಕೆ ಬರೆಯಬೇಕು?" ಎಂದಿರಾ ? ಹಾಗಾದರೆ ನಿಮಗೆ ವಿಷಯ ಗೊತ್ತಿಲ್ಲ ಅನಿಸುತ್ತೆ, ನಾನು ಈಗ ಟಿಆಯ್ ಉದ್ಯೋಗಿಯಲ್ಲ. ನಿನ್ನೆಯೇ ಆಗಿದೆ ನನ್ನ ಟಿಆಯಿನ ಇನ್ನಿಂಗ್ಸ್ ಸಮಾಪ್ti.

ಇಂti ನಿಮ್ಮ,

ಗುರು

punಚಾಮೃತ

2010-11-06T07:20:00.000-07:00

ಒಬಾಮ 'ಬರಾಕ್' ಹತ್ತ್ಯಾರ..

ಸ್ಪಂದನ ೨೦೧೦

2010-11-04T22:36:00.000-07:00

ಸ್ಪಂದನ ೨೦೧೦ ಇಲ್ಲಿದೆ : https://docs.google.com/fileview?id=0B5j7ch9t3ZMdMGEwOGFkZWQtYTkzYS00ZTI1LTg1YWUtYTk1OGM4MWI1NWNh&hl=en

ಕೀಪ್ ಇಟ್ ಅಪ್ !

2010-10-23T22:40:00.000-07:00

ಕೀಪ್ ಶಬ್ದದ ಬಗ್ಗೆ ಕೆಲವರಿಗೆ ಆಕ್ಷೇಪವಿದೆ ಎಂದು ವರದಿಯಾಗಿದೆ : http://thatskannada.oneindia.in/news/2010/10/23/keep-in-sc-ruling-poor-taste-indira.html. ಇರಲಿ, ಆ ಪದವನ್ನು ಬಹಿಷ್ಕರಿಸುವ ಮುನ್ನ ಈ ಪೋಸ್ಟನ್ನು ಓದಿಕೊಂಡುಬಿಡಿ..

ಕೀಪ್ ಅಂದರೆ ಇಟ್ಟುಕೊಂಡವಳು, ಉಪಪತ್ನಿ, ಸಾಮಾನ್ಯ ಜನರ ಮಾತಿನಲ್ಲಿ "ಆಕಿ"..ಅದೇ ಅರ್ಥದಲ್ಲಿ ಕೆಳಗಿನ ಕೆಲ ಭಾಷಾಂತರಗಳನ್ನು ನೋಡಿ:

keep silence – ಆಕಿ ಶಾಂತಿ
keep distance- ಆಕಿ ಅಂತರಾ
keep change- ಆಕಿ ಚಿಲ್ಲರೆ (ಹೆಂಗಸು)
keep left -ಆಕಿ ಬಿಟ್ಟೋದ್ಳು..:-)

punಚಾಮೃತ

2010-10-16T10:42:00.000-07:00

ಈಗ ನಡೆಯುತ್ತಿರುವ ರಾಜಕೀಯ ಪ್ರಹಸನದ ಮಾಧ್ಯಮ ವರದಿಗಳ ಬಗ್ಗೆ ನನ್ನದೂ ಒಂದು ತಕರಾರಿದೆ. ಬರೀ ಆ ಹದಿನಾರು ಜನರಿಗೆ "ಅನರ್ಹ ಶಾಸಕರು" ಎಂದು ಕರೆದು ಉಳಿದವರ ಬಗ್ಗೆ ತಪ್ಪು ಕಲ್ಪನೆ ಮೂಡಿಸುತ್ತಿವೆ :-)

punಚಾಮೃತ

2010-10-15T11:04:00.000-07:00

¿ Drunken brawl - ಕುಡಿದವರ ಹೊಡೆದಾಟಕ್ಕೆ ಇನ್ನೋಂದು ಪದ-

✔ ಅಲ್ ಕೋಲಾಹಲ..

ಹಂಸಗೀತೆ

2010-10-14T11:04:00.000-07:00

ಹಂಸಗೀತೆ ಎನ್ನುವುದು ಒಂದು ಪ್ರಸಿದ್ಧ ಕವಿಸಮಯ. ಹಂಸ ಪಕ್ಷಿ ತನ್ನ ಕೊನೆ ಸಮೀಪಿಸಿದಾಗ ಹಾಡು ಹಾಡುತ್ತದೆ ಎಂಬುದು ನಂಬಿಕೆ. ಅದು ಎಷ್ಟು ನಿಜವೋ, ಎಷ್ಟು ಸುಳ್ಳೋ ಗೊತ್ತಿಲ್ಲ, ಆದರೆ ಅನಾದಿ ಕಾಲದಿಂದ ಕವಿಗಳು ’ಹಂಸಗೀತೆ’ ಯನ್ನು ಒಂದು ಸಿದ್ಧ ಉಪಮೇಯವಾಗಿ ಉಪಯೋಗಿಸುತ್ತಾ ಬಂದಿದ್ದಾರೆ. ’ಹಂಸಗೀತೆ’ ಎಂದು ಹೆಸರಿನ ತರಾಸು ಕಾದಂಬರಿ ಸಿನೇಮಾ ಆಗಿಯೂ ಪ್ರಸಿದ್ಧವಾಗಿತ್ತು.

ರಾಜಭವನದಿಂದ ಬರುತ್ತಿರುವ ದನಿಗಳನ್ನು ಕೇಳಿ ’ಹಂಸ’ಗೀತೆ ಎಂಬ ಕವಿಸಮಯ ನೆನಪಾಯಿತು..:-)

ಛಡಿ ಛಮ್-ಛಮ್ ...

2010-10-04T10:36:00.000-07:00

ಕೃತಯುಗದಲ್ಲಿ ಶ್ರೀಗುರು ಶಿಷ್ಯಂಗೆ ಬಡಿದು
ಬುದ್ಧಿಯ ಕಲಿಸಿದರೆ -ಆಗಲಿ ಮಹಾಪ್ರಸಾದವೆಂದೆನಯ್ಯಾ
ತ್ರೇತಾಯುಗದಲ್ಲಿ ಶ್ರೀಗುರು ಶಿಷ್ಯಂಗೆ ಬೈದು
ಬುದ್ಧಿಯ ಕಲಿಸಿದರೆ -ಆಗಲಿ ಮಹಾಪ್ರಸಾದವೆಂದೆನಯ್ಯಾ
ದ್ವಾಪರಯುಗದಲ್ಲಿ ಶ್ರೀಗುರು ಶಿಷ್ಯಂಗೆ ಝಂಕಿಸಿ
ಬುದ್ಧಿಯ ಕಲಿಸಿದರೆ -ಆಗಲಿ ಮಹಾಪ್ರಸಾದವೆಂದೆನಯ್ಯಾ
ಕಲಿಯುಗದಲ್ಲಿ ಶ್ರೀಗುರು ಶಿಷ್ಯಂಗೆ ವಂದಿಸಿ
ಬುದ್ಧಿಯ ಕಲಿಸಿದರೆ -ಆಗಲಿ ಮಹಾಪ್ರಸಾದವೆಂದೆನಯ್ಯಾ

ಅಲ್ಲಮನ ಈ ವಚನವನ್ನೋದಿ ನನಗೆ ಕೊಂಚ ಅನುಮಾನ ಬಂದಿತ್ತು - ನಾವು ಶಾಲೆ ಕಲಿತದ್ದು ಯಾವಾಗ ? ಕೃತಯುಗದಲ್ಲಿಯೋ, ಇಲ್ಲವೇ ತ್ರೇತಾಯುಗದಲ್ಲಿಯೋ ಅಥವಾ ದ್ವಾಪರದಲ್ಲಿಯೋ ? ಕಲಿಯುಗವಂತೂ ಇರಲಿಕ್ಕಿಲ್ಲ - ನಮ್ಮ ಗುರುಗಳು ನಮಗೆ ಬಡಿಯುತ್ತಿದ್ದರು, ಬಯ್ಯುತ್ತಿದ್ದರು ಮತ್ತು ಝಂಕಿಸುತ್ತಿದ್ದರೂ ಕೂಡ. ’ಇತಿಹಾಸ ಮರುಕಳಿಸುತ್ತದೆ’ ಎಂಬ ಮಾತಿನಂತೆ ಬಹುಶಃ ನಮ್ಮ ಶಾಲಾದಿನಗಳಲ್ಲಿ ಕೃತಯುಗ, ತ್ರೇತಾಯುಗ ಮತ್ತು ದ್ವಾಪರಗಳ ಕಾಕ್‌ಟೇಲ್ ಯುಗವೊಂದು ಜಾರಿಯಲ್ಲಿತ್ತು ಅನಿಸುತ್ತೆ.

ಹೌದು, ನಮ್ಮ ಶಾಲಾದಿನಗಳೇ ಹಾಗಿದ್ದವು. ಶಿಕ್ಷಕರು ’ಊದುವ ಶಂಖ ಊದಿದರೆ ಆಯ್ತು’ ಎಂದುಕೊಳ್ಳದೇ ಹೊಡದು-ಬಡದಾದರೂ ತಾವು ಹೇಳುತ್ತಿದ್ದ ಪಾಠ ಮಕ್ಕಳ ಮೆದುಳಿಗೆ ಹೋಗಲೇಬೇಕೆಂದು ಹೆಣಗಾಡುತ್ತಿದ್ದರು. ಆ ದಿನಗಳಲ್ಲಿ ಪಾಲಕರೂ ಕೂಡ ಶಿಕ್ಷಕರಿಗೆ ಬಡದು ವಿದ್ಯಾ ಕಲಸರಿಎಂದೇ ಬಜಾಯಿಸುತ್ತಿದ್ದರು. ಮಾಸ್ತರ ಬಾಳ ಬಡಿತಾನ ಅನ್ನುವುದು ಆ ಕಾಲದಲ್ಲಿ ಕಂಪ್ಲೇಂಟ್ ಆಗಿರದೇ ಆ ಶಿಕ್ಷಕರಿಗೆ ಕೊಡುವ ಕಾಂಪ್ಲೀಮೆಂಟ್ ಆಗಿತ್ತು. ಹುಡುಗರನ್ನು ಹೊಡೆಯುವ ಶಿಕ್ಷಕರಿಗೆ ಹುಡುಗರೂ ಹೆದರುತ್ತಿದ್ದರಿಂದ ಶಿಕ್ಷಕವಲಯದಲ್ಲಿ ಅವರಿಗೊಂದು ಹೆಚ್ಚುಗಾರಿಕೆಯೂ ಇರುತ್ತಿತ್ತು. ಬಡದು ಕಲಿಸಿದ ವಿದ್ಯೆ, ದುಡಿದು ಕೂಡಿಸಿದ ದುಡ್ಡು ಕಡಿತನಕ ಉಪಯೋಗ ಬರ್ತಾವು ಎಂದೇ ಎಲ್ಲರೂ ನಂಬಿದ್ದರು. ಛಡಿ ಛಮ್-ಛಮ್ ವಿದ್ಯಾ ಘಂ ಘಂ! ಎನ್ನುವುದು ಆ ಕಾಲದ ಪ್ರಶ್ನಾತೀತ ತತ್ವವಾಗಿತ್ತು.

ನಾನು ಪ್ರಾಥಮಿಕ ಶಾಲೆಯಲ್ಲಿ ಕಲಿಯುತ್ತಿರುವಾಗ ಪ್ರತಿ ಕ್ಲಾಸಿನಲ್ಲಿ ಒಂದು ರೂಲ್‌ಕಟ್ಟಿಗೆ ಇರುತ್ತಿತ್ತು. ಮೊದಲೆಲ್ಲಾ ಅದನ್ನು ರೂಲು ಹೊಡೆಯಲು ಉಪಯೋಗಿಸಲಾಗುತ್ತಿಂತೆ. ನಾವು ಶಾಲೆಗೆ ಬರುವ ಹೊತ್ತಿಗೆ ಪ್ಲಾಸ್ಟಿಕ್ ಇಂಚು ಪಟ್ಟಿ, ಫೂಟ್‌ಪಟ್ಟಿಗಳು ಬಂದಿದ್ದವು. ಹೀಗಾಗಿ ರೂಲ್‌ಕಟ್ಟಿಗೆ ನಿರುದ್ಯೋಗಿಯಾಗಿತ್ತು. ದಶಕಗಳ ಕಾಲ ನಿಷ್ಠೆಯಿಂದ ಸೇವೆ ಸಲ್ಲಿಸಿದ ಅದನ್ನು ನಿರುದ್ಯೋಗಿಯಾಗಿ ಇರಲು ಬಿಡುವುದುಂಟೇ ? ಹೀಗಾಗಿ ನಾವು ಹುಡುಗರು ಪಕ್ಕದವನೊಂದಿಗೆ ಮಾತನಾಡಿದರೆ, ಮೂಗಿನಲ್ಲಿ ಬೆರಳು ಹಾಕಿದರೆ, ಅಂಡು ತುರಿಸಿಕೊಂಡರೆ, ಹದಿನೇಳ ಏಳಲೇ ಎಷ್ಟು ಎಂದು ಪಟ್ಟನೇ ಹೇಳದಿದ್ದರೆ ಹೀಗೆ ಯಾವುದೇ ತಪ್ಪು ಮಾಡಿದರೂ ರೂಲ್‌ಕಟ್ಟಿಗೆ ಕೈಗೆ ಕಜ್ಜಾಯಕೊಡುತ್ತಿತ್ತು. ನಪೂಂಸಕಲಿಂಗವೆಂದು ನಾವು ಬಗೆದಿದ್ದ ರೂಲ್‌ಕಟ್ಟಿಗೆ ಹುಡುಗಿಯರ ಕೈಯಿಗೆ ನಿಧಾನಕ್ಕೆ ಮುತ್ತಿಟ್ಟು, ಹುಡುಗರ ಕೈಯಿಗೆ ’ರಪ್ಪ್’ ಎಂದು ಅಪ್ಪಳಿಸುತ್ತಿದ್ದ ಮರ್ಮ ಏನಿತ್ತೋ ಏನೋ..

ಈ ರೂಲುಕಟ್ಟಿಗೆಗಳ ಇನ್ನೊಂದು ಉಪಯೋಗ ರಿಲೇ ಓಡುವಾಗ ಬ್ಯಾಟನ್ನಾಗಿಯೂ ಇತ್ತು. ಪಂದ್ಯಾಟಗಳು ಬಂದಾಗ ರಿಲೇ ಓಟದ ತಯಾರಿಮಾಡಲು ನಾಲ್ಕು ಕ್ಲಾಸ್‌ರೂಮಿಗಳಲ್ಲಿನ ರೂಲುಕಟ್ಟಿಗೆಗಳನ್ನು ನಮ್ಮ ಪೀಟಿ ಮಾಸ್ತರರು ತರಿಸಿ ಪ್ರ್ಯಾಕ್ಟೀಸು ಮಾಡಿಸುತ್ತಿದ್ದರು. ಹೀಗಾಗಿ ಹುಡುಗರು ರೂಲುಕಟ್ಟಿಗೆ ಎಂಬ ಬ್ಯಾಟನ್ ಹಿಡಿದು ಓಡುತ್ತಿರುವುದು ನಮಗೆ ಸಾಮಾನ್ಯ ದೃಶ್ಯವಾಗಿತ್ತು. ಆದರೆ ನಮ್ಮ ಗಣೀತ ಮಾಸ್ತರರು ಹೀಗೆ ಓಡುವುದನ್ನು ನೋಡುವ ಭಾಗ್ಯವೂ ಒಮ್ಮೆ ನಮಗೆ ಸಿಕ್ಕಿತ್ತು.

ಅದಾಗಿದ್ದು ಹೀಗೆ : ಎಂದಿನಂತೆ ನಮ್ಮ ಗಣಿತ ಮಾಸ್ತರರು ಮನೆಯಲ್ಲಿ ಮಾಡಿಕೊಂಡು ಬರಲು ಕೊಟ್ಟಿದ್ದ ಲೆಕ್ಕಗಳ ಲೆಕ್ಕ ಕೇಳ್ತಾ ಇದ್ದರು. ’ಯಾರ‍್ಯಾರು ಹೋಂವರ್ಕ್ ಮಾಡಿಲ್ಲ ಎದ್ ನಿಲ್ರಿ’ ಎಂಬ ಗುರುನುಡಿಗೆ ಯಾರೂ ಎದ್ದು ನಿಂತಿರಲಿಲ್ಲ. ಮಾಸ್ತರರ ಪ್ರಸಾದಕ್ಕೆ ಕಾಯಂ ಗಿರಾಕಿಗಳಾದ ಈರ-ಸಿದ್ದ-ಮಲ್ಲರೆಲ್ಲ ಯಾರೋ ಮಾಡಿದ ಲೆಕ್ಕದ ಕಾಪಿ ಮಾಡಿಕೊಂಡು ಬಂದಿದ್ದರು ಅನಿಸುತ್ತೆ. ಹೀಗಾಗಿ ನಮ್ಮ ಗುರುಗಳಿಗೆ ಎಂದಿನಂತೆ ಭೂತೋಚ್ಚಾಟನೆಗೆ ಅವಕಾಶ ಸಿಗದಿದ್ದರಿಂದ, ಕೈಯಲ್ಲಿ ತಮ್ಮ ಬ್ರಹ್ಮದಂಡವಾದ ರೂಲುಕಟ್ಟಿಗೆಯನ್ನು ಹಿಡಿದೇ ನಮ್ಮ ಜಾಗಗಳಿಗೆ ಬಂದು ಹೋಂವರ್ಕ್ ಮಾಡಿದ ಲೆಕ್ಕಗಳನ್ನು ನೋಡಲು ಶುರುಮಾಡಿದರು. ಒಬ್ಬಳು ಹುಡುಗಿ ಅವತ್ತು ಹೋಂವರ್ಕು ಮಾಡಿಕೊಂಡು ಬಂದಿರಲಿಲ್ಲ, ಆದರೆ ಗಣೀತ ಶಿಕ್ಷಕರೇನು ಬಂದು ಪ್ರತಿಯೊಬ್ಬರ ನೋಟ್‌ಬುಕ್ಕು ನೋಡುವುದಿಲ್ಲ ಎಂಬ ಭಂಡ ಧೈರ್ಯದಿಂದ ಹಾಗೆ ಕುಳಿತೇ ಇದ್ದಳು. ಆದರೆ ದುರ್ದೈವವಶಾತ್ ಅವಳ ಎಣಿಕೆ ತಪ್ಪಾಗಿಬಿಟ್ಟಿತ್ತು. ಇನ್ನೇನು ಗುರುಗಳು ಅವಳ ಹತ್ತಿರ ಬರಬೇಕು ಎನ್ನುವಷ್ಟರಲ್ಲಿ ಅವಳು ತನ್ನ ಪಾಟೀಚೀಲವನ್ನು ಬಿಟ್ಟು ಕ್ಲಾಸಿನಿಂದ ಕಾಲ್ಕಿತ್ತಳು. ಒಂದು ಕ್ಷಣ ಏನಾಗುತ್ತಿದೆ ಎಂದು ನಮ್ಮ ಗುರುಗಳು ದಿಗ್ಭ್ರಾಂತರಾದರೂ, ಮುಂದಿನ ಕ್ಷಣವೇ ಸುಧಾರಿಸಿಕೊಂಡು ತಾವೂ ಆ ಹುಡುಗಿಯ ಬೆನ್ನು ಹತ್ತಿ ಓಡತೊಡಗಿದರು. ಅವರು ಬೆನ್ನತ್ತಿ ಬರುತ್ತಾರೆಂದು ನಿರೀಕ್ಷಿಸದ ಹುಡುಗಿ, ಅವರನ್ನು ನೋಡಿ ಇನ್ನೂ ಜೋರಾಗಿ ಓಡುತ್ತ ಶಾಲೆಯ ಎದುರುಗಡೆ ಇದ್ದ ಈಶ್ವರ ದೇವರ ಗುಡಿಯ ಪ್ರಾಂಗಣ ಸೇರಿಕೊಂಡಿತು. ಅಲ್ಲಿಯೂ ಗುರುಗಳು ಬೆನ್ನತ್ತಿ ಬಂದಿದ್ದರಿಂದ ದೇವರಿಗೆ ಒಂದು ಪ್ರದಕ್ಷಿಣೆ ಹಾಕಿ, ಹಿಂತಿರುಗಿ ನೋಡಿದರೆ ಹಲ್ಲು ಕಡಿಯುತ್ತಾ, ಬ್ರಹ್ಮದಂಡ ಹಿಡಿದ ಗುರುಗಳು ಹಿಂದೆಯೇ ಬರುತ್ತಿದ್ದಾರೆ.. ಅಕಟಕಟಾ.. ಹರ ಮುನಿದರೆ ಗುರು ಕಾಯ್ವನ್, ಗುರು ಮುನಿದರೆ ಕಾಯುವರಾರ್? ಎಂದು ಕೊಳ್ಳುತ್ತಾ ಹುಡುಗಿ ಇನ್ನೊಂದು ರೌಂಡ್ ಓಡಿತು. ಗುರುಗಳು ಹಸಿದ ಹುಲಿ ಹರಿಣವನ್ನು ಹಿಂಬಾಲಿಸುವಂತೆ ಹಿಂಬಾಲಿಸುತ್ತಲೇ ಇದ್ದರು.. ಹೀಗಾಗಿ ಹುಡುಗಿ ಮೂರನೇ ಸುತ್ತೂ ಓಡಿತು..ಮುಂದೆ ಮುಂದೆ ಚಿಗರಿಯಂತೆ ಜಿಗಿಜಿಗಿದು ಓಡುತ್ತಿದ್ದ ಭಯವಿಹ್ವಲೆ ಬಾಲೆ, ಹಿಂದೆ ಹಿಂದೆ ಓಡುತ್ತಿದ್ದ ದಂಡಧಾರಿ ಗುರುವರೇಣ್ಯರು ! ಈ ಅದ್ಭುತ ನೋಟವನ್ನು ಸವಿಯುವ ಭಾಗ್ಯ ಯಾರಿಗುಂಟು ಯಾರಿಗಿಲ್ಲಾ ! ಈ ಅದ್ಭುತ ದೃಶ್ಯವನ್ನು ನೋಡಿದ ನಮ್ಮ ಬಾಯಲ್ಲಿ ನಗೆಕಾರಂಜಿ ಚಿಮ್ಮಲು ಕಾತರಿಸಿ ಕುಳಿತಿತ್ತಾದರೂ, ಗುರುಗಳಿಗಂಜಿ ನಾವು ತುಟಿ ಹೊಲಿದುಕೊಂಡು ಕುಳಿತಿದ್ದೆವು. ಮೂರು ಸುತ್ತುಗಳ ಕೊನೆಗೆ ತಮ್ಮ ಹೊಟ್ಟೆಯನ್ನು ಹೊತ್ತುಕೊಂಡು ಓಡಿದ್ದರಿಂದ ಗುರುಗಳಿಗೆ ತೇಕು ಹತ್ತಿತು. ಏದುಸಿರು ಬಿಡುತ್ತ ನಿಂತ ಅವರು ಬೋಳಿ ನಾಳೆ ನಿನ್ನ ವಿಚಾರಿಸಿಕೊಳ್ತೇನಿ ಎಂದು ಅಂದಿನ ಮ್ಯಾರಾಥಾನ್ ಓಟಕ್ಕೆ ಪೂರ್ಣವಿರಾಮವಿಟ್ಟಿದ್ದರು !

ನಮ್ಮ ಇನ್ನುಳಿದ ಕೆಲ ಗುರುಗಳಿಗೆ ರೂಲ್‌ಕಟ್ಟಿಗೆಯನ್ನು ಶಿಕ್ಷೆಗಾಗಿ ಉಪಯೋಗಿಸುವುದರ ಬಗ್ಗೆ ಸದಭಿಪ್ರಾಯವಿರಲಿಲ್ಲ. ಕೊಡುವ ಪ್ರಸಾದವನ್ನು ಕೈಯಿಂದ ಕೊಟ್ಟರೆನೇ ಶ್ರೇಯಸ್ಕರ ಎಂಬುದು ಅವರ ಅಂಬೋಣವಾಗಿತ್ತು. ಬರೀಗೈಯಿಂದಲೇ
ಬೆನ್ನ ಮೇಲೆ ’ಗುರುಪ್ರಸಾದ’ ಕೊಡುವುದು ಅವರ ಮೆಚ್ಚಿನ ಶಿಕ್ಷಾ ವಿಧಾನ. ಅದರಲ್ಲಿ ನಮ್ಮ ಈ ಗುರುವೃಂದ ಎಂತಹ ಪ್ರಾವಿಣ್ಯ ಸಾಧಿಸಿತ್ತೆಂದರೆ, ಅವರು ಮನಸ್ಸು ಮಾಡಿದ್ದರೆ ಅದಕ್ಕೆ ಐಎಸ್‌ಓ ಸರ್ಟಿಫಿಕೇಟ್ ಕೂಡ ಪಡೆಯಬಹುದಾಗಿತ್ತು! ಈ ವಿಧಾನದಲ್ಲಿ ಮೊದಲು ಗುರುವರ್ಯರು ಮೊದಲು ತಮ್ಮ ಗುರಿಯನ್ನು - ಅಂದರೆ ಮೇಲೆ ಹೇಳಿದ ಛಪ್ಪನ್ನೈವತ್ತಾರು ಅಪರಾಧಗಳಲ್ಲಿ ಒಂದನ್ನು ಮಾಡುತ್ತಿರುವ ವಿದ್ಯಾರ್ಥಿಯನ್ನು - ಗುರುತಿಸಿಕೊಳ್ಳುತ್ತಿದ್ದರು. ನಂತರ ವಿದ್ಯಾರ್ಥಿ ಸಮುದ್ರದ ನಡುವೆ ಈಸುತ್ತಾ ತಮ್ಮ ಗುರಿಯ ಹತ್ತಿರ ಸಾಗುತ್ತಿದ್ದರು. ಆ ಕ್ಷಣಗಳು ವಿದ್ಯಾರ್ಥಿಗಣದಲ್ಲಿ ಸಾಕಷ್ಟು ಆತಂಕ/ಕುತೂಹಲ ಉಂಟುಮಾಡುತ್ತಿದ್ದವು. ಗುರುವರ್ಯರ ಲೈನ್ ಆಫ್ ಸೈಟ್‌ನಲ್ಲಿದ್ದವರು ಪಾಪದ ಕೊಡ ತುಂಬಿದ್ದು ತಮ್ಮದೇ ಇರಬಹುದಾ ಎಂದು ಆತಂಕಗೊಂಡಿದ್ದರೆ, ಉಳಿದವರು ಈ ಕ್ಷಣದ ಪಾಪಿ ಯಾರು ಎಂದು ಕುತೂಹಲಗೊಂಡಿರುತ್ತಿದ್ದರು. ಗುರುವರ್ಯರು ತಮ್ಮ ಗುರಿಯನ್ನು ತಲುಪಿ, ಅಪರಾಧಿಯ ಕತ್ತಿನ ಹಿಂಭಾಗದ ಮೇಲೆ ಎಡಗೈಯ ಅರ್ಧಚಂದ್ರವನ್ನು ಒತ್ತಿ ಬೆನ್ನನ್ನು ಸರಿಯಾಗಿ ನಲವತ್ತೈದು ಡಿಗ್ರಿಗೆ ಬಗ್ಗಿಸಿ, ಬಲಗೈಯನ್ನು ಮೇಲೆತ್ತಿ ’ಧಂ’ ಎಂದು ಲಗಾಯಿಸುತ್ತಿದ್ದರು. ಆ ’ಧಂ’ ಅಷ್ಟ ದಿಕ್ಕುಗಳಿಗೆ ಪಸರಿಸಿ - ಪ್ರತಿಧ್ವನಿಸಿ ಶಾಂತವಾಗಲೂ ಕ್ಷಣಗಳೇ ಬೇಕಾಗುತ್ತಿದ್ದವು !

ನಮ್ಮ ಈ ಗುರುವೃಂದದ ನ್ಯಾಯದಾನ ಪದ್ಧತಿಯೂ ಉಲ್ಲೇಖಾರ್ಹವಾಗಿತ್ತು. ಅವರ ಹತ್ತಿರ ಯಾವುದೇ ಫಿರ್ಯಾದಿ ಹೋದರೂ ಅದಕ್ಕೆ ಒಂದೇ ನ್ಯಾಯ ಕೊಡುವುದು ಅವರ ವೈಶಿಷ್ಟ್ಯ. ಯಾವುನಾದರೂ ಸರ ಇವಾ ನನ್ನ ಪೇಣೇ ತೊಗೊಂಡಾನ ರೀ ಅಥವಾ ಮತ್ತಿನ್ಯಾವಳಾದರೂ ಸರ ಆಕಿ ನನ್ ಕೂದ್ಲಾ ಜಗ್ಗತಾಳ ರೀ ಎಂದು ತಕರಾರು ತೆಗೆದುಕೊಂಡು ಹೋದರೆ ನಮ್ಮ ಗುರುಗಳು ಫಿರ್ಯಾದುದಾರ-ಆಪಾದಿತ ಇಬ್ಬರನ್ನೂ ತಮ್ಮ ಹತ್ತಿರ ಕರೆಸಿಕೊಂಡು ಇಬ್ಬರಿಗೂ ತಮ್ಮ ಪೇಟೇಂಟ್ ಯೋಗ್ಯ ವಿಧಾನದಲ್ಲಿ ಚಂಡು ಬಗ್ಗಿಸಿ, ಬೆನ್ನ ಮೇಲೆ ’ಧಂಧಂ’ ಪ್ರಸಾದಕೊಟ್ಟು 'ಹೋಗಿ ಮು.. ಮುಚ್ಚಿಕೊಂಡು ಕುಂದರ್ರಿ' ಎಂಬ ಉಪದೇಶವನ್ನು ದಯಪಾಲಿಸುತ್ತಿದ್ದರು.

’ಬೋರ್ಡ್ ಮೇಲೆ ತಪ್ಪು ಲೆಕ್ಕ ಮಾಡಿದರೆ, ಅದನ್ನು ಮೂಗಿನಿಂದ ಒರೆಸುವ’, ತಪ್ಪು ಮಾಡಿದವರನ್ನು ಗೋಡೆಗೆ ಕುರ್ಚಿ ಕೂಡಿಸುವ, ಇಲ್ಲವೇ ಬಗ್ಗಿ ಕಿವಿ ಹಿಡಿದುಕೊಳ್ಳುವ ಶಿಕ್ಷೆಗಳು ನಮ್ಮ ಪ್ರಾಥಮಿಕ ಶಾಲೆಯಲ್ಲಿ ಇದ್ದವಾದರೂ ಅವು ಅಪರೂಪ, ’ಬೆನ್ನ ಮೇಲೆ ಧಂ’ ಮತ್ತು ’ರೂಲುಕಟ್ಟಿಗೆಯ ಪ್ರಸಾದ’ಗಳೇ ಜನಪ್ರಿಯ. ಪ್ರಾಥಮಿಕ ಶಿಕ್ಷಣ ಮುಗಿದ ಮೇಲೆ ನಾನು ಓದಿದ್ದು ಒಂದು ವಸತಿ ಶಾಲೆಯಲ್ಲಿ. ಇಲ್ಲಿನ ಶಿಕ್ಷೆಗಳಲ್ಲಿ ಹೊಡಿ-ಬಡಿ ಎಂಬ ಪ್ರಾಗೈತಿಹಾಸಿಕ ವಿಧಾನಗಳು ಕಡಿಮೆ ಇದ್ದರೂ , ಅವುಗಳನ್ನು ಅನುಭಸಿದವರ ಮನಸಿಗೆ ಮುಟ್ಟಿ-ಮುಟ್ಟಿ ನೋಡಿಕೊಳ್ಳುವಂತೆ ಮಾಡುತ್ತಿದ್ದವು.

ನಮ್ಮ ವಸತಿ ಶಾಲೆಯ ಪ್ರಿನ್ಸಿಪಾಲರ ಹೆಗ್ಗುರುತು ’ಕಂಡಲ್ಲಿ ಸ್ಟ್ಯಾಂಡಿಂಗ್’ ಶಿಕ್ಷೆ. ಯಾರಾದರೂ ಏನಾದರೂ ತಪ್ಪು ಮಾಡಿ ಕೈಗೆ ಸಿಕ್ಕಿ ಹಾಕಿಕೊಂಡರೆ, ಪ್ರಿನ್ಸಿಪಾಲರು ಅವರನ್ನು ಕ್ಷಮಿಸುವವರೆಗೆ ಅಲ್ಲಿಯೇ ನಿಂತುಕೊಳ್ಳ ಬೇಕಿತ್ತು. ಊಟ ಮಾಡಿ ತಟ್ಟೆ ತೊಳೆಯಲು ಹೋಗುತ್ತಿರುವಾಗ ಯಾರಾದರೂ ಲೋಟ ಬೀಳಿಸಿದರೆ, ಅವರು ತಟ್ಟೆತೊಳೆಯುವ ಸಿಂಕಿನ ಮುಂದೆ ಗಂಟೆಗಟ್ಟಲೇ ತ್ರಿಶಂಕು ಸ್ವರ್ಗ ಅನುಭವಿಸಬೇಕಾಗಿತ್ತು. ಆಟಕ್ಕೆ ಹೋಗಬೇಕಾದರೆ ಕಾಲನ್ನು ಎಳೆದುಕೊಂಡು ಹೊರಟಿದ್ದನ್ನು ಪ್ರಿನ್ಸಿಪಾಲರು ನೋಡಿದರೆ ಅವರು ಡಾರ್ಮಿಟರೀಯೂ ಅಲ್ಲದ, ಆಟದ ಬಯಲೂ ಅಲ್ಲದ, ಅವುಗಳ ನಡುವಿನ ಜಾಗದಲ್ಲಿ, ಹಗಲೂ ಅಲ್ಲದ, ರಾತ್ರಿಯೂ ಅಲ್ಲದ ಅವುಗಳ ನಡುವಿನ ಸಮಯವಾದ ಸಾಯಂಕಾಲವನ್ನು ನಿಂತು ಕೊಂಡು ಕಳೆಯಬೇಕಾಗಿತ್ತು. ಜಗವೆಲ್ಲಾ ತಿರುಗುತ್ತಿರಲು ಒಬ್ಬರೆ ಸ್ಥಾವರವಾಗಿ ನಿಂತು ಮೂಕ ಪ್ರೇಕ್ಷಕನಾಗುವುದು ಬೇಜಾರಾಗುತ್ತಿತ್ತಾದರೂ, ನಿಂತವರ ಹತ್ತಿರ ಹಾದುಹೋಗುತ್ತಿದ್ದ ಬೇರೆ ಶಿಕ್ಷರು ’ಪ್ರಿನ್ಸಿಪಾಲರು ನಿಲ್ಲಿಸಿದ್ದು ಯಾಕೆ?’ ಎಂದು ಕೇಳಿ, ತಲೆಗೆ ಮೊಟಕುವುದರಿಂದ ನೋವಾಗುತ್ತಿತ್ತಾದರೂ, ಎಲ್ಲಕ್ಕಿಂತ ಹೆಚ್ಚು ತ್ರಾಸಾಗುತ್ತಿದ್ದುದು ನಮ್ಮದೇ ಕ್ಲಾಸಿನ ಹುಡುಗಿಯರು ನಮ್ಮನ್ನು ನೋಡಿ ತಮ್ಮತಮ್ಮಲ್ಲಿಯೇ ಕಿಸಿಕಿಸಿ ನಗುತ್ತ ಹೋದಾಗ !!

ಒಮ್ಮೆ ಒಂದಿಷ್ಟು ಹುಡುಗರು ಕಾಮನ್ ಬಾತ್‌ರೂಮಿನಲ್ಲಿ ಬಟ್ಟೆತೋಳೆಯುತ್ತ, ಸ್ನಾನ ಮಾಡುತ್ತ ಸಂಗೀತ ಕಚೇರಿ ನಡೆಸಿದ್ದರು. ತಣ್ಣೀರಿನಲ್ಲಿ ಸ್ನಾನ ಮಾಡುತ್ತಿರುವವರು ಚಳಿ ತಾಳಲಾರದೇ ಹಾಡುತ್ತಿದ್ದರು. ಹಾಡು ಕೇಳಿಯೂ ಸುಮ್ಮನೆ ಕೂಡಲು ಬಟ್ಟೆತೊಳೆಯುತ್ತಿರುವವರು ಅರಸಿಕರೇ ? ಅವರೂ ಕೂಡ ಬಕೀಟು ಬಾರಿಸುತ್ತ ರಾಗ ರತಿಗೆ ರಂಗು ಏರಿಸಿದ್ದರು. ಹತ್ತಿರದಿಂದ ಹಾದು ಹೋಗುತ್ತಿದ್ದ ಪ್ರಿನ್ಸಿಪಾಲರಿಗೆ ಈ ಸಂಗೀತ ಗದ್ದಲದಂತೆ ಕೇಳಿ, ಅವರು ಬಾತ್‌ರೂಮಿನಲ್ಲಿದ್ದ ಎಲ್ಲರನ್ನೂ ’ಹ್ಯಾಗಿದ್ದರೋ ಹಾಗೆಯೇ’ ಹೊರಕರೆಸಿ ಬಾತ್‌ರೂಮಿನ ಮುಂದೆ ಸಾಲಾಗಿ ನಿಲ್ಲಿಸಿದ್ದರು. ನಿಮ್ಮಿಂದ ಮುಚ್ಚಿಡುವುದು ಏನಿದೆ? ಮಹಾಮಜ್ಜನದ ಮಧ್ಯದಿಂದ ಎದ್ದುಬಂದು ನಿಂತ ಗೊಮ್ಮಟರಲ್ಲಿ ನಾನು ಕೂಡ ಒಬ್ಬನಿದ್ದೆ !

ನಮ್ಮ ಇನ್ನೊಬ್ಬ ಗುರುಗಳಿದ್ದವರು - ಅವರು ಮಹಾಭಾರತದ ಕರ್ಣನಂತೆ. ಕರ್ಣ ಬಿಟ್ಟ ಬಾಣವನ್ನು ಮರಳಿ ತೊಡದಂತೆ ಪ್ರತಿಜ್ಞೆ ಮಾಡಿದಂತೆ ಇವರು ಒಮ್ಮೆ ಕೊಟ್ಟ ಶಿಕ್ಷೆ ಮತ್ತು ಹೋಂವರ್ಕನ್ನು ಇನ್ನೊಮ್ಮೆ ಕೊಡುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದರೋ ಏನೋ.. ಅವರು ಕೊಡುತ್ತಿದ್ದ ಹೋಂವರ್ಕುಗಳು ಬಹು ವೈವಿಧ್ಯಮಯ, ಹಾಗೆಯೇ ಅವರ ಶಿಕ್ಷೆಗಳೂ ಕೂಡ. ಪ್ರತೀ ಹೋಂವರ್ಕು, ಪ್ರತೀ ಶಿಕ್ಷೆಯಲ್ಲಿಯೂ ಒಂದು ಹೊಸತನದ ಝಲಕು, ಒಂದು ನಾವಿನ್ಯದ ಸೊಗಸು, ಒಂದು ಸೃಜನಶೀಲತೆಯ ಹೊಳಹು ಇದ್ದೇ ಇರುತ್ತಿದ್ದವು.

ಒಮ್ಮೆ ನಮ್ಮ ಒಬ್ಬ ಸ್ನೇಹಿತ ಶಾಲೆಯ ಪಕ್ಕದ ಹೊಲದಲ್ಲಿನ ಹುಣಸೆಗಿಡದಿಂದ ಹುಣಸೆ ಕಾಯಿ ಹೊಡದಿದ್ದ. ಅಷ್ಟೇ ಆಗಿದ್ದರೆ ಪರವಾ ಇರಲಿಲ್ಲ, ಸಿಕ್ಕಿಯೂ ಬಿದ್ದಿದ್ದ. ಆ ಹೊಲದ ರೈತ ಬಂದು ನಮ್ಮ ಕರ್ಣ ಗುರುಗಳಿಗೆ ತಕರಾರು ಸಲ್ಲಿಸಿದ್ದ. ಗುರುಗಳು ಅವನನ್ನು ಹೇಗೋ ಸಮಾಧಾನಿಸಿ ಸಾಗಹಾಕಿದ್ದರಷ್ಟೇ ಅಲ್ಲ, ನಮ್ಮ ಸ್ನೇಹಿತನಿಗೂ ಏನೂ ಶಿಕ್ಷೆ ಕೊಡದೇ ಬಿಟ್ಟುಬಿಟ್ಟಿದ್ದರು. ಅದಾಗಲೇ ಕರ್ಣ ಗುರುಗಳ ವರಸೆಗಳನ್ನು ತಿಳಿದುಕೊಂಡಿದ್ದ ನಾವು ’ಮುಂದೈತೆ ಮಾರಿ ಹಬ್ಬ’ ಎಂದು ಆತಂಕದಿಂದಲೇ ಇದ್ದೆವು. ನಮ್ಮ ನಿರೀಕ್ಷೆ ಸುಳ್ಳಾಗಲಿಲ್ಲ. ಸಂಜೆ ಊಟದಲ್ಲಿ ಎಲ್ಲರ ತಟ್ಟೆಯಲ್ಲಿ ಅನ್ನ ಬಡಿಸಿಸಿ, ನಮ್ಮ ಸ್ನೇಹಿತನ ತಟ್ಟೆಯತುಂಬ ಮಾತ್ರ ಹುಣಸೆಕಾಯಿ ಬಡಿಸಿಸಿ ನಮ್ಮ ಕರ್ಣ ಗುರುಗಳು ಕಾಯ್ತಾ ಇದ್ದರು. ನಮ್ಮ ಸ್ನೇಹಿತನಿಗೆ ನಿಂಗ ಹುಂಚಿಕಾಯಿ ಬೇಕಲ್ಲಾ ? ಈಗ ಎಷ್ಟರ ತಿನ್ನು ಎಂದು ಹುಣಸೆ ಕಾಯಿ ತಿಂದವನಿಗೆ ಚಳ್ಳೆಹಣ್ಣು ತಿನ್ನಿಸಿದ್ದರು ! ಇದೇ ಕರ್ಣ ಗುರುಗಳಿಗೆ ಒಮ್ಮೆ ನಮ್ಮ ಇಡೀ ಕ್ಲಾಸಿನ ಮೇಲೆಯೇ ಯಾಕೋ ಸಿಟ್ಟು ಬಂದಿತ್ತು. ಅವು ರಾಮಾಯಣದ ದಿನಗಳು - ಅಂದ್ರೆ ರಮಾನಂದ ಸಾಗರರ ರಾಮಾಯಣ ಟೀವಿಯಲ್ಲಿ ಬರತಾ ಇದ್ದ ದಿನಗಳು. ಆಗಿನ ಕಾಲದ ಫ್ಯಾಶನ್ನೇ ಆಗಿದ್ದಂತೆ ನಮಗೂ ಭಾನುವಾರ ಬೆಳಿಗ್ಗೆ ಭಕುತಿಯಿಂದ ರಾಮಾಯಣ ನೋಡುವ ಚಟ. ಅದರ ಭಾಷೆ ಅರ್ಥವಾಗದಿದ್ದರೂ ಮೊದಲೆ ಗೊತ್ತಿದ್ದ ರಾಮಾಯಣದ ಕತೆಯನ್ನು ಟೀವಿಯ ತೆರೆಯ ಮೇಲೆ ನೋಡಿ ಆನಂದಿಸುತ್ತಿದ್ದೆವು. ನಮ್ಮ ಕ್ಲಾಸಿನ ಮೇಲೆ ಸಿಟ್ಟು ಬಂದ ಮುಂದಿನ ಭಾನುವಾರ ನಮ್ಮ ಕರ್ಣ ಗುರುಗಳು ನಮ್ಮ ಕ್ಲಾಸಿನ ಎಲ್ಲರನ್ನು ರಾಮಾಯಣ ಶುರುವಾಗುವ ಹದಿನೈದು ನಿಮಿಷ ಮೊದಲೆ ಟೀವಿ ಕೋಣೆಯಲ್ಲಿ ಬರ ಹೇಳಿದರು. ಟೀವಿಯನ್ನು ಕೋಣೆಯ ಮಧ್ಯದಲ್ಲಿಡಿಸಿ ನಮ್ಮನ್ನು ಅದರ ಹಿಂದೆ ಕೂಡಿಸಿದ್ದರು! ಈ ಶಿಕ್ಷೆಯಿಂದ ನಮಗೇನು ಬೇಜಾರಾಗಿರಲಿಲ್ಲ, ನಮ್ಮ ಕ್ಲಾಸಿನ ಹುಡುಗಿಯರೂ ನಮ್ಮ ಜೊತೆನೇ ಟೀವಿಯ ಹಿಂದೆ ಕೂತಿದ್ದರಲ್ಲಾ !!

ನಮ್ಮ ವಸತಿಶಾಲೆಯಲ್ಲಿ ಎಲ್ಲ ಶಿಕ್ಷಕರೂ ಸಾತ್ವಿಕ ಶಿಕ್ಷೆಗಳನ್ನೇ ಕೊಡುತ್ತಿದ್ದರು ಎಂದು ಹೇಳಿದ್ದೆ ಅಲ್ವಾ ? ಕ್ಷಮಿಸಿ, ಒಂದು ಅಪವಾದ ನಮ್ಮ ಆಟದ ಮೇಷ್ಟ್ರು. ಯಾವಾಗಲೂ ಸೀಟಿಇರುವ ವಯರಿನ ಹಗ್ಗವನ್ನು ಕುತ್ತಿಗೆ ಹಾಕಿ ಕೊಂಡೇ ಇರುತ್ತಿದ್ದ ಅವರು ತಪ್ಪು ಮಾಡಿದಾಗಲೆಲ್ಲ ನಮ್ಮ ಬುಡಗಳಿಗೆಲ್ಲಾ ವಯರಿನ ಹಗ್ಗದಿಂದ ಪ್ರಸಾದ ಕೊಡುತ್ತಿದ್ದರು. ಅವರ ಪ್ರಸಾದಗಳಿಗಿಂತ ಅವರ ಬೈಯ್ಗುಳಗಳು ಭಯಂಕರವಾಗಿರುತ್ತಿದ್ದವು. ’ಹ’ಪದ, ’ಬೋ’ಪದ ಉಪಯೋಗಿಸುವುದರಲ್ಲಿ ಅವರು ಮಾಜಿ ಪ್ರಧಾನಿಗಳಿಗೇ ಟ್ಯೂಶನ್ ಕೊಡುವ ಲೇವಲ್ಲಿನಲ್ಲಿದ್ದರು. ಶೀಲ-ಅಶ್ಲೀಲ ಎಂದೆಣಿಸದೇ, ಯಾವುದೇ ಸೆನ್ಸಾರಿನ ಭಯವಿಲ್ಲದೇ, ಬಯ್ಗುಳಗಳು ಅವರ ನಾಲಿಗೆಯ ಮೇಲೆ ನಲಿದಾಡುತ್ತಿದ್ದವು. ಬೈಯುವುದನ್ನು ಒಂದು ಜಾನಪದ ಕಲೆಯೆಂದು ಪರಿಗಣಿಸಿದ್ದರೆ ನಮ್ಮ ಆಟದ ಗುರುಗಳಿಗೆ ಜಾನಪದ ಕಲಾನಿಧಿ ಪ್ರಶಸ್ತಿ ಸಿಗುವುದರಲ್ಲಿ ಅನುಮಾನವಿರಲಿಲ್ಲ. ನಮ್ಮ ಗುರುಗಳಷ್ಟೇ ಅಲ್ಲ, ನಾನು ಗಮನಿಸಿದಂತೆ, ಬಹುತೇಕ ಆಟದ ಗುರುಗಳು ಹೀಗೆ ಹೊಲಸು ಬಾಯಿಯವರು. ನನಗೊಂದು ಅನುಮಾನ, ಇವರಿಗೆ ಸಿಪಿಎಡ್-ಬಿಪಿಎಡ್ ಕೋರ್ಸುಗಳಲ್ಲಿ ಹೀಗೆ ಬಯ್ಯುವುದನ್ನು ಒಂದು ವಿಷಯವಾಗಿ ಕಲಿಸಿರುತ್ತಾರಾ ?

ಮಹಾತ್ಮ ಗಾಂಧೀಜಿಯವರು ತಮ್ಮ ಆಶ್ರಮದಲ್ಲಿ ಯಾರಾದರೂ ತಪ್ಪು ಮಾಡಿದರೆ ತಮಗೆ ತಾವೇ ಶಿಕ್ಷೆ ಕೊಟ್ಟು ಕೊಳ್ಳುತ್ತಿದ್ದರಂತೆ. ನಮ್ಮ ವಸತಿ ಶಾಲೆಯೂ ಗಾಂಧೀ ತತ್ವದ ಮೇಲೆಯೇ ಸ್ಥಾಪಿತವಾಗಿತ್ತಾದರೂ ನಮ್ಮ ಗುರುವೃಂದ ತಮಗೆ ತಾವೇ ಶಿಕ್ಷೆ ಕೊಟ್ಟುಕೊಳ್ಳುವಷ್ಟು ಮಹಾತ್ಮರಾಗಿರಲಿಲ್ಲ. ಆದರೂ ನಮ್ಮ ಬಹುತೇಕ ಗುರುಗಳು ನಮಗೆ ಶಿಕ್ಷೆಕೊಟ್ಟು ಆನಂದಿಸುವ ವಿಘ್ನಸಂತೋಷಿಗಳಾಗಿರಲಿಲ್ಲ. ಬದಲು ನಮ್ಮ ಬಗ್ಗೆ ನೈಜ ಕಾಳಜಿ ಇದ್ದದ್ದರಿಂದಲೇ ತಪ್ಪು ಮಾಡಿದಾಗ ಶಿಕ್ಷಿಸುತ್ತಿದ್ದರು. ಐದನೇ ವರುಷಕ್ಕೆ ಮೊದಲೇ ಕಂಪ್ಯೂಟರಿನ ಆಳ-ಅಗಲಗಳನ್ನು ಅರಿತಿರುವ, ಎರಡು-ಮೂರು ಭಾಷೆಗಳನ್ನು ನಿರರ್ಗಳ ಮಾತನಾಡುವ ಇಂದಿನ ಬಾಲ ಪ್ರತಿಭೆಗಳನ್ನು ನೋಡಿದರೆ ನಮಗೆ ಸಿಕ್ಕ ಶಿಕ್ಷೆಗಳಿಗೆಲ್ಲ ನಾವು ಅರ್ಹರೇ ಆಗಿದ್ದೆವು ಎನಿಸುತ್ತದೆ..

( ಈ ಬರಹ ಅಕ್ಕದ ಸ್ಮರಣಸಂಚಿಕೆಯಲ್ಲಿ ಪ್ರಕಟವಾಗಿದೆಯಂತೆ, ನಾನಿನ್ನೂ ನೋಡಿಲ್ಲ)

ಜೋಳದ ಜೋಳವಾಳಿಯ ಪತ್ರ

2010-10-02T02:13:00.000-07:00

ಮಾನ್ಯರೇ, ಮೊನ್ನೆಯ ವಿಜಯಕರ್ನಾಟಕ ಪತ್ರಿಕೆಯಲ್ಲಿ ವೈಶಾಲಿ ಕಾಸರವಳ್ಳಿಯವರ ನಿಧನರಾದಾಗ ಪ್ರಕಟವಾದ ಸುದ್ದಿಯಲ್ಲಿ ಒಂದು ಅಂಶ ಜೋಳದ ಬಗೆಗೆ ತಪ್ಪು ಮಾಹಿತಿ/ತಪ್ಪು ತಿಳುವಳಿಕೆ ಕೊಡುವಂತಹದಾಗಿತ್ತು:

’ಜೋಳ ಸಕ್ಕರೆ ಕಾಯಿಲೆಯವರಿಗೆ ಒಳ್ಳೆಯದಲ್ಲ’ ಎಂದು ವೈಶಾಲಿಯವರಿಗೆ ತಪ್ಪು ಕಲ್ಪನೆ ಇದ್ದಿತೋ, ಅಥವಾ ಈ ಲೇಖನ ಬರೆದ ವರದಿಗಾರರಿಗೆ ತಪ್ಪು ಮಾಹಿತಿ ಸಿಕ್ಕಿತೋ, ಗೊತ್ತಿಲ್ಲ*. ಆದರೆ ಸಾಮಾನ್ಯವಾಗಿ ಸಕ್ಕರೆ ಕಾಯಿಲೆಯವರಿಗೆ ಜೋಳದ ರೊಟ್ಟಿ ಬಹಳ ಒಳ್ಳೆಯದು. ಕಾಯಿಲೆ ಇಲ್ಲದವರಿಗೆ ಇನ್ನೂ ಒಳ್ಳೆಯದು.

ನಮ್ಮ ಸರಕಾರಗಳ ತಪ್ಪು ಕೃಷಿ-ಆಹಾರ ನೀತಿಗಳಿಂದ ಜೋಳದಂತಹ ಕಿರುಧಾನ್ಯಗಳು ತಮ್ಮ ಜನಪ್ರಿಯತೆಯನ್ನು ಕಳೆದುಕೊಳ್ಳುತ್ತಿವೆ, ನಮ್ಮ ಆಹಾರ ಪದ್ಧತಿಗಳಲ್ಲಿನ ವೈವಿಧ್ಯತೆ ಮಾಯವಾಗುತ್ತಿದೆ, ನಮ್ಮ ಬೆಳೆಗಳಲ್ಲಿ ಕಿರುಧಾನ್ಯಗಳು ಮಾಯವಾಗಿ ಜೈವಿಕ ವೈವಿಧ್ಯ ಕಾಣೆಯಾಗುತ್ತಿದೆ. ವಿಜಯಕರ್ನಾಟಕದಂತಹ ಪತ್ರಿಕೆಗಳಲ್ಲಿ ಅಚಾತುರ್ಯದಿಂದ ಇಂತಹ ಸಂಗತಿಗಳು ಪ್ರಕಟವಾದರೆ, ಕಿರುಧಾನ್ಯಗಳ ಜನಪ್ರಿಯತೆಗೆ, ಸಣ್ಣದಾದರೂ, ಮತ್ತೂ ಹೊಡೆತಬೀಳುತ್ತದೆ. ಆದ್ದರಿಂದ ಇಂತಹ ವಿಷಯಗಳಲ್ಲಿ ಒಂಚೂರು ಹೆಚ್ಚಿನ ಕಾಳಜಿ ತೆಗೆದುಕೊಳ್ಳಬೇಕೆಂದು ಪ್ರಾರ್ಥನೆ.

ಅಂದಹಾಗೆ, ಈ ಬರಹದಲ್ಲಿ ಬೆಂಗಳೂರಿನಲ್ಲಿ ಜೋಳದ ರೊಟ್ಟಿ ಸಿಗುವುದು ಕಷ್ಟ ಎಂಬಂತೆ ಚಿತ್ರಿತವಾಗಿದೆ. ದಶಕಗಳ ಹಿಂದೆ ಅಂತಹ ಪರಿಸ್ಥಿತಿ ಇದ್ದದ್ದು ನಿಜ, ಆದರೆ ಈಗಿಲ್ಲ. ಕೆಲ ದಿನಗಳ ಹಿಂದೆ ನಾನು ಬೆಂಗಳೂರಿನ ರೊಟ್ಟಿ ಅಂಗಡಿ ಕಿಟ್ಟಪ್ಪಗಳ ಪಟ್ಟಿ ಮಾಡಿದ ಇಲ್ಲಿದೆ. ನನ್ನ ನಂಬಿಕೆಯ ಪ್ರಕಾರ ಈಗ ಈ ಪಟ್ಟಿ ಇನ್ನೂ ದೊಡ್ಡದಾಗಿದೆ.

ತಮ್ಮ ವಿಶ್ವಾಸಿ,
ಗುರು

* ಕೆಲ ಬಗೆಯ ಮಧುಮೇಹ ಕಾಯಿಲೆ ಇದ್ದವರಿಗೆ ಜೋಳ ವರ್ಜವೇ ? ನನಗೆ ಗೊತ್ತಿಲ್ಲ.

+ ಜೋಳವಾಳಿ = ಸೇವಕ.

punಚಾಮೃತ

2010-10-01T20:34:00.000-07:00

ಶೋಭಾ ಬುರುಡೆ ಬಿಡ್ತೀವಿ ಅಂತ ಹೇಳಿದ್ದನ್ನು ಪ್ರಜಾವಾಣಿ ವರದಿಮಾಡಿದೆ : http://www.prajavani.net/Content/Oct22010/state20101001206880.asp?section=updatenews

ನಾನು, ನನ್ನ ರೂಂಮೇಟುಗಳು ಮತ್ತು ಒಂದು "ಭೂತ"ಕಾಲ

2010-08-22T04:04:00.000-07:00

TKCಯಲ್ಲಿ ಎರಡು ಭಾಗದಲ್ಲಿ ಬಂದಿದೆ:

http://thatskannada.oneindia.in/column/humor/2010/0818-myself-roommates-and-ghost-email.html
http://thatskannada.oneindia.in/column/humor/2010/0818-myself-roommates-and-ghost-email-part2.html

ದಯವಿಟ್ಟು ಓದಿ ನೋಡಿ..

ಓಂಕಾರ

2010-06-20T09:59:00.000-07:00

ಎಲೆಕ್ಟ್ರಿಕಲ್ ಇಂಜನೀಯರ್ ತಮ್ಮ ಮನೆಗೆ "ಓಂ"ಕಾರ ಹೇಗೆ ಹಾಕಬೇಕು ?

ಟೇಸ್ಟ್ ದಿ ಥಂಡರ್

2010-06-05T22:25:00.000-07:00

ಸಿಯಾಳ ಸಿಡಿಲಾದದ್ದು ನಮ್ಮ ಕ್ಯಾಂಟೀನಿನಲ್ಲಿ..

ಕಾಡುವ ಜಾಹಿರಾತುಗಳು

2010-03-21T01:44:00.000-07:00

ಮೀಡಿಯಾ ಮೈಂಡ್ ಬ್ಲಾಗಿನಲ್ಲಿ ಒಬ್ಬರು ತಮ್ಮನ್ನು "ಕಾಡುವ ಜಾಹಿರಾತುಗಳು" ಬಗ್ಗೆ ಬರೆದಿದ್ದಾರೆ. ಅದನ್ನು ನೋಡಿ ನೋಡಿ ನನಗೂ ನನ್ನನ್ನು ಕಾಡಿದ ಜಾಹೀರಾತುಗಳ ಬಗ್ಗೆ ಬರೆಯಲು ಸ್ಪೂರ್ತಿ ಬಂತು. ನನ್ನನ್ನು ಕಾಡಿದ ಹಲವು ಜಾಹಿರಾತುಗಳಲ್ಲಿ ಮೂರು ಮಾಣಿಕ್ಯಗಳನ್ನು ನಿಮ್ಮ ಮುಂದಿಡುತ್ತಿದ್ದೇನೆ:

೧. ಮೊನ್ನೆ ೧೮ನೇ ತಾರೀಕಿನಂದು ವಿಕದ ಮುಖಪುಟದಲ್ಲಿ ಬಂದಿದ್ದ ಭಾರತೀಯ ಸ್ಟೇಟ್ ಬ್ಯಾಂಕಿನವರ ಜಾಹೀರಾತಲ್ಲಿ ದೊಡ್ಡ ಅಕ್ಷರಗಳಲ್ಲಿ ಬರೆದ ತಲೆಬರಹದಲ್ಲಿಯೇ ತಪ್ಪು:

೨. ’ಮಿನಿಸ್ಟ್ರಿ ಆಫ್ ಓವರ‍್ಸೀಸ್ ಇಂಡಿಯನ್ ಅಫೇರ್ಸ್’ ಅವರು ೦೪.೦೩.೨೦೧೦ರ ಕನ್ನಡಪ್ರಭದಲ್ಲಿ ಕೊಟ್ಟಿರೋದು. ಈ ಜಾಹಿರಾತು ಯಾವ ಭಾಷೆಯಲ್ಲಿದೆ ಎಂದು ಹೇಳಿದರೆ ಅವರಿಗೊಂದು ಬಹುಮಾನ. ಇದು ಕನ್ನಡವಲ್ಲ, ಯಾಕೆಂದರೆ ಇದನ್ನು ಕನ್ನಡಿಗರು ಓದಿದರೆ ಅರ್ಥವಾಗುವುದಿಲ್ಲ. ಇದು ಹಿಂದಿಯೂ ಅಲ್ಲ, ಯಾಕಂದ್ರೆ ಇದನ್ನು ಕನ್ನಡ ಲಿಪಿಯಲ್ಲಿ ಬರೆದಿದ್ದಾರೆ. ಇದು ಹಿಂದಿಯನ್ನು ಕನ್ನಡಲಿಪಿಯಲ್ಲಿ ಬರೆದದ್ದು ಎಂದುಕೊಂಡರೆ ಅದೂ ಕೂಡ ತಪ್ಪು - ’ಜಾಯೆಇನ್’, ’ಕಮಾಯೆಇನ್’ ಇತ್ಯಾದಿ ಶಬ್ದಗಳು ಹಿಂದಿಯಲ್ಲಿಯೂ ಇಲ್ಲ!

೩. ಮೂರನೇ ಜಾಹಿರಾತಿನ ಮುಂದೆ ಮೊದಲೆರಡು ಏನೇನು ಅಲ್ಲ. ಅದು ಪ್ರಕಟವಾದದ್ದು ೩೦ನೇ ಡಿಸೆಂಬರ್ ೨೦೦೬ರಂದು, ವಿಕದಲ್ಲಿ. ಇಂದಿಗೂ ಅದನ್ನು ಸಮಗಟ್ಟುವ ಜಾಹಿರಾ"ಥೂ" ನಾನು ನೋಡಿಲ್ಲ. ಅದು ವಿಕದ ಅರ್ಧಪುಟಕ್ಕೂ ಹೆಚ್ಚಿನ ಜಾಗವನ್ನು ಮಲೀನ ಗೊಳಿಸಿತ್ತು.

ಈಗ ಮೀಡಿಯಾ ಮೈಂಡ್ ಗಳಿಗೆ ಎರಡು ಪ್ರಶ್ನೆ:
೧. ನಿಮ್ಮ ಪತ್ರಿಕೆಯಲ್ಲಿ ಪ್ರಕಟವಾಗುವ ಜಾಹಿರಾತುಗಳ ಹುರುಳು -semantics-ಗೆ ನೀವು ಜವಾಬ್ದಾರರಲ್ಲ, ಒಪ್ಪತಕ್ಕದ್ದೆ. ಆದರೆ ಅದರ ಬರಹ - syntax-ಗೂ ನೀವು ಜವಾಬ್ದಾರರಲ್ಲವೇ? ನಾನು ಮೇಲೆ ತೋರಿಸಿದಂತಹ ತಪ್ಪುಗಳಿಂದ ನಿಮ್ಮ ಪತ್ರಿಕೆಯ ಚಂದಕ್ಕೆ ಕುಂದು ಉಂಟಾಗುವುದಿಲ್ಲವೇ ?

೨. ನಿಮಗೆ ಕಾಸುಕೊಟ್ಟಬಿಟ್ಟರೆ ಜಾಹಿರಾತುದಾರ ಕೊಟ್ಟದ್ದನು ಕಣ್ಣು ಮುಚ್ಚಿ ನಿಮ್ಮ ಪತ್ರಿಕೆಯಲ್ಲಿ ಪ್ರಕಟಿಸಿ ಬಿಡುತ್ತೀರಾ ? ನಾನು "ಈ ಪತ್ರಿಕೆಯಲ್ಲಿನ ಜಾಹಿರಾತುಗಳು ದರಿದ್ರವಾಗಿರುತ್ತವೆ" ಎಂದು ಬರೆದು ಕೊಟ್ಟರೆ, ನೀವು ’ಇಂಚಿಗೆ ಇಷ್ಟು’ ಎಂದು ಲೆಕ್ಕಹಾಕಿ ರೊಕ್ಕ ತೆಗೆದುಕೊಂಡು ಪ್ರಕಟಿಸಿಬಿಡುತ್ತೀರಾ ? ಹಾಗೆ ಸುಮ್ಮನೆ ಕೇಳಿದೆ, ನಾನ್ಯಾಕೆ ಜಾಹಿರಾತು ಕೊಟ್ಟು ಕಾಸು ಕಳೆದುಕೊಳ್ಳಲಿ, ಪತ್ರಿಕೆಗಳಲ್ಲಿನ ಜಾಹಿರಾತು ನೋಡಿದವರಿಗೆ ಅದು ಗೊತ್ತಾಗಿಯೇ ಬಿಡುತ್ತದೆ.. :-)

ನಾನು, ನನ್ನ ರೂಂಮೇಟುಗಳು ಮತ್ತು ನಮ್ಮ ’ಮದ್ಯ’ಕಾಲೀನ ಘಟನೆಗಳು

2010-03-19T10:40:00.000-07:00

TKCಯಲ್ಲಿ ಎರಡು ಭಾಗದಲ್ಲಿ ಬಂದಿದೆ:
http://thatskannada.oneindia.in/column/humor/2010/0319-what-do-you-drink-when-you-have-cough.html
http://thatskannada.oneindia.in/column/humor/2010/0319-me-my-roommates-and-hot-drinks.html

ದಯವಿಟ್ಟು ಓದಿ ನೋಡಿ..

ವನಸುಮ

2010-03-17T01:00:00.000-07:00

ವನಸುಮದೊಲೆನ್ನ ಜೀವನವು ವಿಕಸಿಸುವಂತೆ
ಮನವನನುಗೊಳಿಸು ಗುರುವೇ ಹೇ ದೇವ
ಜನಕೆ ಸಂತಸವೀವ ಘನನು ನಾನೆಂದೆಂಬ
ಎಣಿಕೆತೋರದೆ ಜಗದ ಪೊಗಳಿಕೆಗೆ ಬಾಯ್ಬಿಡದೇ

ಕಾನನದಿ ಮಲ್ಲಿಗೆಯು ಮೌನದಿಂ ಬಿರಿದು ನಿಜ
ಸೌರಭವ ಸೂಸಿ ನಲವಿನಿಂತಾನೆಲೆಯ ಪಿಂತಿರ್ದು
ದೀನತೆಯ ತೋರಿ ಅಭಿಮಾನವನು ತೊರೆದು
ಕೃತಕೃತ್ಯತೆಯ ಪಡೆವಂತೆ

ಉಪಕಾರಿ ನಾನು, ಎನ್ನುಪಕೃತಿಯು ಜಗಕೆಂಬ
ವಿಪರೀತ ಮತಿಯನುಳಿದು
ವಿಪುಲಾಶ್ರಯವನೀವ ಸುಫಲ ಸುಮಭರಿತ
ಪಾದಪದಂತೆ ನೈಜಮಾದೊಳ್ವಿನಿಂ ಬಾಳ್ವವೊಲು.

(ದಾರ್ಶನಿಕ ಕವಿ ಡಿವಿಜಿಯವರ ಹುಟ್ಟುಹಬ್ಬ ಇವತ್ತು. ಆ ಖುಷಿಯಲ್ಲಿ ಅವರ ಈ ಅರ್ಥಪೂರ್ಣ ಕವನವನ್ನು ಇನ್ನೋಮ್ಮೆ ಗುನುಗೋಣ)

ಒಂದು ಹಳೆಯ ನಾಡಗೀತೆ

2010-03-04T09:17:00.000-08:00

(ಶ್ರೀ ಕುರಡಿ ನಾರಾಯಣರಾಯರು ರಚಿಸಿದ ಈ ನಾಡಗೀತೆಯನ್ನು ಆವಾಗ ಶಾಲೆಯಲ್ಲಿ ಪ್ರಾರ್ಥನೆಯಾಗಿ ಹಾಡಲಾಗುತ್ತಿತ್ತಂತೆ. )
ಭೋಮಾತೆ ಕರ್ನಾಟ ಭೂಮಾತೆವಿನುತೆ
ಆ ಮಹಾ ಋಷಿನಮಿತೆ ನಮಿಸುವೆನು ಪೊರೆಯೌ |ಪ|

ಕಾವೇರಿ ದಕ್ಷಿಣದೊಳುತ್ತರದ ದಿಶೆಗೆ ಗೋ-
ದಾವರಿಯೆ ನಿನ್ನ ಗಡಿಯೆನಿಸಿತೊಮ್ಮೆ
ಭೋ ವಸುಂಧರೆ ಪೂರ್ವದಾ ನಿನ್ನ ವೈಭವವ
ನಾವ ಕವಿ ಬಣ್ಣಿಸಲು ಸಾಧ್ಯವಮ್ಮಾ! |೧| ಭೋಮಾತೆ ---

ಹಳೆಬೀಡು ಬಾದಾಮಿ ಬನವಾಸಿ ವಿಜಯಪುರ
ಮಳಖೇಡ ಕಲ್ಯಾಣ-ನಗರಗಳಲಿ
ಕಲಿಸಾರ್ವಭೌಮ ನೃಪರಿಂದೆಸೆದು ಹೆಸರಾದ
ಹಳೆಯ ರಾಜ್ಯಗಳಿಂದೆ ಮೆರೆದೆಯಮ್ಮಾ! |೨| ಭೋಮಾತೆ ---

ಚಾಲುಕ್ಯ ಪುಲಿಕೇಶಿ^೧ ಗೋವಿಂದ^೨ ನೃಪತುಂಗ^೩
ತೈಲನೃಪ^೪ ವಿಕ್ರಮಾದಿತ್ಯ ^೫ಬುಕ್ಕ^೬
ಮೇಲಾದ ಕಲಿ ಕೃಷ್ೞರಾಯ^೭ರೆಂಬಾ ಸತ್ವ
ಶಾಲಿ ನೃಪವರರಿಂಗೆ ಜನ್ಮದಾತೆ |೩| ಭೋಮಾತೆ ---

೮ಅಕ್ಕದೇವಿಗೆ^೮ ವೀರ ಮೈರಾಳದೇವಿ^೯ಗೆ
ಬುಕ್ಕರಾಯನ ಸೊಸೆ^೧೦ಗೆ ವಿದುಷಿ^೧೧ಯರಿಗೆ
ಲೆಕ್ಕವಿಲ್ಲದ ಭವ್ಯಗುಡಿಗಳನು ವಿರಚಿಸಿದ
ಜಕ್ಕಣಾಚಾರ್ಯನಿಗೆ ಜನ್ಮದಾತೆ |೪| ಭೋಮಾತೆ ---

ಅದ್ವೈತ ಮತವಾದಿ ಕೇರಳದ ಶಂಕರನ
ಸುದ್ವೈತ ಮತವಾದಿ ಮಧ್ವಮುನಿಯ_
ಸುದ್ವಿಜನ ರಾಮಾನುಜನ ಕಾರ್ಯದಭಿಮಾನಿ
ಸದ್ವಿಬುಧ ಭಾಸ್ಕರ^೧೨ನ ಜನ್ಮದಾತೆ |೫| ಭೋಮಾತೆ ---

ಬಿಜ್ಜೆಯಲಿ ಹೆಸರಾದ ಮಾಧವನ ಸಾಯನನ
ಬಿಜ್ಜಳನ ಕಾಲದಾ ಬಸವೇಶನ
ಸಜ್ಜನ ಪ್ಯರಂದರನ ಕನಕದಾಸನ ಜನನಿ
ಮಜ್ಜನಕ ಜನನಿಯರ ಜನ್ಮದಾತೆ |೬| ಭೋಮಾತೆ ---

೧. ಬಾದಾಮಿ ಚಾಲುಕ್ಯ ಮನೆತನದ ಶ್ರೀ ಸತ್ಯಾಶ್ರಯ ಪುಲಿಕೇಶಿ ಮಹಾರಾಜನು (೭ನೆಯ ಶತಕ)
೨. ಮಳಖೇಡದ ರಾಷ್ಟ್ರಕೂಟ ಚಕ್ರವರ್ತಿಯಾದ ಮೂರನೆಯ ಗೋವಿಂದನು (೯ನೆಯ ಶತಕ)
೩. ಕವಿಶ್ರೇಷ್ಠನೂ ಕರ್ನಾಟಕಕ್ಕೆ ಅಲಂಕಾರ ಸ್ವರೂಪನೂ ಆದ ರಾಷ್ಟ್ರಕೂಟ ಮಹಾರಾಜನು (೯ನೆಯ ಶತಕ)
೪. ಕಲ್ಯಾಣದ ಚಾಲುಕ್ಯ ಮನೆತನದ ಮೂಲಪುರುಷನು (೧೦ನೆಯ ಶತಕ)
೫. ಕಲ್ಯಾಣನಗರವನ್ನು ಸ್ಥಾಪಿಸಿದ ಸೋಮೇಶ್ವರ ಮಹಾರಾಜನ ಎರಡನೆಯ ಮಗನಾದ ನೃಪೋತ್ತಮನು (೧೧ನೆಯ ಶತಕ)
೬. ವಿಜಯನಗರದ ರಾಜಮನೆತನದಲ್ಲಿ ಪ್ರಬಲನಾಗಿ ಕೋಟೆಕೊತ್ತಳಗಳನ್ನು ಕಟ್ಟಿಸಿದ ಮೊದಲನೆಯ ರಾಜನು (೧೪ನೆಯ ಶತಕ)
೭. ವಿಜಯನಗರದ ’ನರಸ’ ಮನೆತನದ ಪ್ರತಾಪಶಾಲಿಯಾದ ಕೃಷ್ಣದೇವರಾಯ ಮಹಾರಾಜನು (೧೬ನೆಯ ಶತಕ)
೮. ಮೂರನೆಯ ಜಯಸಿಂಹನ ತಂಗಿಯಾದ ರಣಭೈರವಿ ಯೆಂದು ಹೆಸರು ಪಡೆದ ಮಹಾಮಹಿಮ
೯. ಬನವಾಸಿಯಲ್ಲಿ ಪಿರಿಯರಸಿ ಯೆಂದು ಹೆಸರು ಪಡೆದು ಆಳಿದ ಚಾಲುಕ್ಯ ಮನೆತನದ ರಾಣಿ.
೧೦. ವೀರಕಂಪಣರಾಯಚರಿತವೆಂಬ ಸಂಸ್ಕೃತ ಕಾವ್ಯಕರ್ತ್ರಿ ಗಂಗಾದೇವಿ.
೧೧. ಕಂತಿ, ಹೊನ್ನಮ್ಮ, ನೀಲಮ್ಮ, ಗಿರಿಯಮ್ಮ ಮೊದಲಾದವರು ಕರ್ನಾಟಕದ ವಿದುಷಿಯರು.
೧೨. ಜ್ಯೋತಿಷ್ಯ-ಗಣಿತಶಾಸ್ತ್ರಗಳಲ್ಲಿ ಅದ್ವಿತೀಯ ಪಂಡಿತನಾದ ಶ್ರೀ ಭಾಸ್ಕರಾಚಾರ್ಯನು.

ವಾಸ್ತುಪುರುಷನೊಂದಿಗೆ ಒಂದು ವರುಷ

2010-03-03T09:41:00.000-08:00

ಟಿಕೆಸಿಯಲ್ಲಿ ನನ್ನದೊಂದು ಬರಹ ಬಂದಿದೆ, ಬಹುಷ್ಯ ಯುನಿಕೋಡಿಗೆ ಬದಲಾಯಿಸಿದ್ದರಿಂದ, ’ಇನ್ವರ್ಟೆಡ್ ಕಾಮ’ದಹನ* ವಾಗಿವೆ. ಅದಕ್ಕಾಗಿ ಅವರನ್ನು ಕ್ಷಮಿಸಿಬಿಡಿ:

http://thatskannada.oneindia.in/column/humor/2010/0303-vastu-shastra-impact-on-health.html

* ’ಇನ್ವರ್ಟೆಡ್ ಕಾಮ’ದಹನ = ಅವತರಣಿಕೆಗಳು ಕಾಣೆಯಾಗಿವೆ.

ಮೀಡಿಯಾ ಮೈಂಡ್‌ಗಳಿಗೊಂದು ಪ್ರಶ್ನೆ : ಬಾಲಿವುಡ್ಡಿಗ್ಯಾಕೆ ಬಿಟ್ಟಿ ಪ್ರಚಾರ ?

2010-02-20T22:37:00.000-08:00

ಕನ್ನಡ ದಿನಪತ್ರಿಕೆಯೊಂದರ ಜನೇವರಿ ಒಂದನೇ ತಾರೀಕಿನ ಪುರವಣಿಯಲ್ಲಿ ಪ್ರಕಟವಾದ ’ನೋಡಲೇಬೇಕಾದ ಹತ್ತು ಸಿನೇಮಾ’ಗಳಲ್ಲಿ ಕನ್ನಡೇತರ ಚಿತ್ರಗಳ ಹೆಸರುಗಳನ್ನು ನೋಡಿ ಈ ಪತ್ರ ಬರೆಯುತ್ತಿದ್ದೇನೆ. ಕನ್ನಡದ್ದೇ ಆದ ಈ ದಿನ ಪತ್ರಿಕೆ, ಕನ್ನಡೇತರ ಸಿನೇಮಾಗಳನ್ನು ಕನ್ನಡಿಗರು ನೋಡಲೇಬೇಕೆಂದು ಫರ್ಮಾನು ಹೊರಡಿಸುವುದು ಯಾಕೆ?

’ಗುಣಕೆ ಮತ್ಸರವಿಲ್ಲ, ಕನ್ನಡಿಗರು ಕನ್ನಡದ ಕೃತಿಗಳಷ್ಟನ್ನೇ ಗಮನಿಸಬೇಕೆಂಬ ಸಂಕುಚಿತ ಮನೋಭಾವ ನಮ್ಮದಲ್ಲ’ ಎನ್ನುವುದೇ ಇವರ ಸಿದ್ಧಾಂತವೆಂದುಕೊಳ್ಳೋಣವೆಂದರೆ ಹಾಗೇನು ಇಲ್ಲ. ’ನೋಡಲೇಬೇಕಾದ ಹತ್ತು ಸಿನೇಮಾಗಳ’ ಪಟ್ಟಿಯ ಪಕ್ಕವೇ ಪ್ರಕಟಿಸಿದ ’ಓದಲೇಬೇಕಾದ ಹತ್ತು ಪುಸ್ತಕಗಳ’ ಪಟ್ಟಿಯಲ್ಲಿ ಒಂದೂ ಕನ್ನಡೇತರ ಪುಸ್ತಕವಿಲ್ಲ, ಯಾಕೆ ? ಹಿಂದಿಯಲ್ಲಿ, ಇಂಗ್ಲೀಷಿನಲ್ಲಿ ಓದಲೇಬೇಕಾದ ಒಂದೂ ಪುಸ್ತಕವೂ ಕಳೆದ ವರುಷ ಬಂದೇ ಇಲ್ಲವೇ ? ಪತ್ರಿಕೆಯ ಸಂಪಾದಕರೂ, ಸಿಬ್ಬಂದಿಯೂ ಕನ್ನಡ ಪುಸ್ತಕ ರಚನಾಕಾರರಾಗಿದ್ದು, ಉಳಿದ ಭಾಷೆಯ ಪುಸ್ತಕಗಳನ್ನು ಕನ್ನಡಿಗರು ಓದಲೇ ಬೇಕೆಂದು ಫತ್ವಾ ಹೊರಡಿಸಿದ್ದರೆ, ತಮ್ಮ ಹಿತಾಸಕ್ತಿಗೆ ಹಾನಿಯಾಗುತ್ತದೆ ಎಂದು ಭಾವಿಸಿ ’ಓದಲೇಬೇಕಾದ.. ’ ಪಟ್ಟಿ ಕನ್ನಡ ಪುಸ್ತಕಗಳಿಗಷ್ಟೇ ಸೀಮಿತವಾಯಿತು ಅನಿಸುತ್ತೆ!!

ಪಟ್ಟಿಗಳ ’ಅಳತೆ ಪಟ್ಟಿಗಳು’ ಬೇರೆಯಾದದ್ದು ಈ ಪತ್ರಕ್ಕೆ ತಕ್ಷಣದ ಕಾರಣವಾದರೂ, ನನ್ನ ತಕರಾರಿಗೆ ಕೊಂಚ ಹಿನ್ನೆಲೆ ಇದೆ. ಯಾಕೋ ಏನೋ ಬಾಲಿವುಡ್ಡಿನ ಬಗ್ಗೆ ನಮ್ಮ ಕನ್ನಡ ಪತ್ರಿಕೆಗಳಿಗೆ ಒಂದು ಕುರುಡು ಪ್ರೀತಿ. ಭವ್ಯ ಇತಿಹಾಸ ಹೊಂದಿರುವ ಪ್ರತಿಷ್ಠಿತ ವಾರಪತ್ರಿಕೆಯೊಂದರಲ್ಲಿ ಎರಡೇ ಎರಡು ಬಣ್ಣದ ಪುಟಗಳು. ಅವೆರಡರಲ್ಲೂ ಬಾಲಿವುಡ್ಡಿನ ಲದ್ದಿಯೇ ಸುದ್ದಿ. ಕನ್ನಡದ ಬಹುತೇಕ ಪತ್ರಿಕೆಗಳಲ್ಲಿ ಬಾಲಿವುಡ್ಡಿಗೆ ಮೀಸಲಾದ ಒಂದೆರಡು ಪುಟಗಳಿರಲೇ ಬೇಕು. ಮೀಡಿಯಾ ಮೆದುಳಿಗಳೇ, ಬಾಲಿವುಡ್ಡಿಗ್ಯಾಕೆ ಈ ಬಿಟ್ಟಿ ಪ್ರಚಾರ ?

ಪತ್ರಿಕಾರಂಗವನ್ನು ಪ್ರಜಾಪ್ರಭುತ್ವದ ನಾಲ್ಕನೇ ಅಂಗವೆಂದೇ ಹೇಳುತ್ತಾರೆ. ಕನ್ನಡ ಪತ್ರಿಕೆಗಳೂ ತಮ್ಮ ಹೊಣೆಯನ್ನರಿತು, ತಮ್ಮ ಓದುಗನ, ಸಮಾಜದ ಹಿತಾಸಕ್ತಿಯನ್ನು ಕಾಪಾಡುವಲ್ಲಿ ಎಂದೂ ಹಿಂದೆಬಿದ್ದಿಲ್ಲ. ಸಮಾಜಕ್ಕೆ ಏನು ಒಳ್ಳೆಯದು, ಏನು ಕೆಟ್ಟದು ಎಂದು ಕಂಡುಕೊಳ್ಳುವಲ್ಲಿ ಕನ್ನಡ ಪತ್ರಕರ್ತರಾದ ನಿಮ್ಮ ಬುದ್ಧಿ ಯಾರೀಗೂ ಕಮ್ಮಿಯಿಲ್ಲ, ಹಾಗೆಯೇ ನಾಡು-ನುಡಿಗಳ ಬಗ್ಗೆ ನಿಮ್ಮ ನಿಯತ್ತೂ ಪ್ರಶ್ನಾತೀತ. ಅವೇ ನಂಬಿಕೆಗಳ ಮೇಲೆ ’ಕನ್ನಡ ಪತ್ರಿಕೆಗಳಲ್ಲಿ ಬಾಲಿವುಡ್ಡು’ ಬಗ್ಗೆ ಕೆಲ ಪ್ರಶ್ನೆಗಳನ್ನು ಕೇಳಬಯಸುತ್ತೇನೆ:

೧. ಏನಕೇನ ಪ್ರಕಾರೇಣ ಪ್ರಸಿದ್ಧರಾಗುವುದು ಹಿಂದೆಂದಿಗಿಂತಲೂ ಇಂದು ಹೆಚ್ಚು ಲಾಭಕರ. ನಿಮ್ಮ ಪತ್ರಿಕೆಯಲ್ಲಿ ಒಂದು ಬಾಲಿವುಡ್ ಸಿನೇಮಾದ ಬಗ್ಗೆ ಬರೆದರೆ ಕಾಸಿಲ್ಲದೇ ಅದಕ್ಕೆ ಪ್ರಚಾರ ಸಿಕ್ಕು ಕನ್ನಡ ಚಿತ್ರದ ಗಲ್ಲಾಪೆಟ್ಟಿಗೆಗೆ ಹೊಡೆತ ಕೊಡುತ್ತದೆ. ಬಾಲಿವುಡ್ಡಿನ ನಟನ ಬಗ್ಗೆ ಬರೆದರೆ, ಆತ ನೀವು ಅವನಿಗೆ ಕನ್ನಡ ಜನಸಮುದಾಯದಲ್ಲಿ ಕೊಟ್ಟ ಖ್ಯಾತಿಯನ್ನು ಎನ್‌ಕ್ಯಾಷ್ ಮಾಡಿಕೊಳ್ಳಲು, ಯಾವುದೋ ಪ್ರಾಡಕ್ಟಿಗೆ ರಾಯಭಾರಿಯಾಗಿ, ಕನ್ನಡ ನಟನ ಅವಕಾಶವನ್ನು ಕಿತ್ತುಕೊಳ್ತಾನೆ. ಕನ್ನಡ ಸಿನೇಮಾದ ಗಲ್ಲಾಪೆಟ್ಟಿಗೆಗೆ, ಕನ್ನಡ ನಟನ ಅವಕಾಶಕ್ಕೆ ಪೆಟ್ಟು ಬಿದ್ದರೆ ನಿಮಗೇನು ಲಾಭ ? ನಿಮ್ಮ ಓದುಗ ದೊರೆಯಾದ ನನಗೇನು ಲಾಭ ?

ಇಲ್ಲಿ ಒಂದು ಗುಟ್ಟಿನ ಪ್ರಶ್ನೆ : ಇತ್ತೀಚೆಗೆ ಪತ್ರಿಕೆಗಳು ಕಾಸಿಗಾಗಿ ತಮ್ಮ ನಿಯತ್ತನ್ನು ಮಾರಿಕೊಳ್ತವೆಯಂತೆ. ಎಡಿಟರ್ಸ್ ಗಿಲ್ಡ್‌ಗೆ ಹೇಳೋಲ್ಲ, ನಿಜ ಹೇಳಿ – ನೀವು ಬಾಲಿವುಡ್ ಜನರಿಂದ ಕಾಸು ಪಡೆದು ಅವರ ಸುದ್ದಿ ಪ್ರಕಟಿಸಿ ಅವರ ಜನಪ್ರಿಯತೆಯನ್ನು ಕನ್ನಡ ಜನಮಾನಸದಲ್ಲಿ ಹೆಚ್ಚಿಸಲು ಸಹಾಯ ಮಾಡ್ತೀರಾ ? ಹೌದುಎಂದಿರಾದರೆ, ಕನ್ನಡ ಚಿತ್ರೋದ್ಯಮ ಹಾಳಾಗಿ ಹೋಗಲಿ, ನೀವಾದರೂ ಕಾಸು ಮಾಡ್ತಾ ಇದ್ದೀರಲ್ಲಾ, ಸಂತೋಷ. ಶಾಂತಂ ಪಾಪಂ.. ನಾವು ನಿಯತ್ತಿನ ಜನ ಎಂದಿರಾ ? ಹಾಗಾದರೆ ಬಾಲಿವುಡ್ಡಿನ ಬಾಡಿಗೆ ಬಂಟರಂತೆ ಬರೆಯೋದು ಯಾಕೋ… ಇತರ ಭಾಷೆಯ ಸಿನೇಮಾಗಳಿಂದ ಕತೆ-ವಿಚಾರಗಳನ್ನು ಕದ್ದು/ಕೊಂಡು ಕನ್ನಡ ಸಿನೇಮಾ ಮಾಡಿದರೆ, ಉರಿಗಣ್ಣಾಗುವ ನೀವು, ಬಾಲಿವುಡ್ಡಿನ ಜನ ಇಂಗ್ಲೀಷಿನಿಂದ ಕದ್ದು/ಕೊಂಡು ಮಾಡಿದ ಸಿನೆಮಾಗಳಿಗೆ ’ನೋಡಲೇ ಬೇಕಾದ’ ಲೇಬಲ್ಲು ಅದ್ಯಾಕೆ ಅಂಟಿಸಿಬಿಡುತ್ತಿರೋ..
೨. ಜನಕ್ಕೆ ಬೇಕಾಗಿರೋದು ಬಾಲಿವುಡ್ ಮಸಾಲಾ, ಅದಕ್ಕೆ ಅದನ್ನು ನಾವು ಬರೆಯೋದು ಎನ್ನುವುದು ನಿಮ್ಮ ಸಮಜಾಯಿಷಿಯೇ ? ಕನ್ನಡದ ಸುಸಂಸ್ಕೃತ ಓದುಗರು ಬಾಲಿವುಡ್ ಮಸಾಲಾನೇ ಬೇಕು ಎಂದು ನಿಮಗೆ ಯಾವಾಗ ಹೇಳಿದರು ಸ್ವಾಮೀ ? ಅವರಿಗೆ ಏನು ಬೇಕು ಎಂದು ಸರ್ವೇ ಏನಾದರೂ ನೀವು ಮಾಡಿದ್ದಿರಾ ? ಸಮಾಜಕ್ಕೆ ದೂರಗಾಮಿ ಪರಿಣಾಮ ಬೀರುವ ಹತ್ತು ಹಲವು ವಿಷಯಗಳ ಬಗ್ಗೆ ನೀವು ನಿಮ್ಮ ಓದುಗರ ಪ್ರತಿಕ್ರಿಯೆ ಕೇಳಿದ್ದು, ನನಗೆ ನೆನಪಿದೆ, ಆದರೆ ನಿಮ್ಮದೇ ಪತ್ರಿಕೆಯಲ್ಲಿನ ಕಸದ ಬಗ್ಗೆ ನೀವು ಎಂದಾದರೂ ನಿಮ್ಮ ಓದುಗರ ಅಭಿಪ್ರಾಯ ಕೇಳಿದ್ದೀರಾ ? ನಾವು ನಮ್ಮ ಪತ್ರಿಕೆಯಲ್ಲಿ ಇನ್ನು ಮುಂದೆ ಬಾಲಿವುಡ್ ಸುದ್ದಿಗಳನ್ನು ಪ್ರಕಟಿಸುವುದಿಲ್ಲ. ಅದರಿಂದ ನಿಮಗೇನಾದರೂ ಬೇಜಾರಿದೆಯಾ? ಎಂದು ಯಾವ ಪತ್ರಿಕೆಯೂ ಕೇಳಿದ್ದು ನೆನಪಿಗೆ ಬರತಾ ಇಲ್ಲ…

೩. ಬಾಲಿವುಡ್ ಬಗ್ಗೆ ಓದುವುದರಿಂದ ನಮ್ಮ ಪತ್ರಿಕೆ ಓದುವ ಕನ್ನಡಿಗರ ಜ್ಞಾನ ದಿಗಂತ ವಿಸ್ತಾರಗೊಂಡು, ಕನ್ನಡಿಗರ ಮೋಕ್ಷ ಸಾಧನೆಯ ಮಾರ್ಗ ಸರಳವಾಗುತ್ತದೆ ಎಂದಿರಾ ? ಅಥವಾ ಬಾಲಿವುಡ್ ಬಗ್ಗೆ ನಾವು ಬರೆಯೋದು ಕನ್ನಡಿಗರಲ್ಲಿ ಜನರಲ್ ನಾಲೇಜ್ ಹೆಚ್ಚಿಸೋದಕ್ಕಪ್ಪಾ ಎಂದಿರಾ ? ಸ್ವಾಮಿ ನಾನು ಇಷ್ಟು ಗಂಭೀರವಾಗಿ ಹೇಳ್ತಿರಬೇಕಾದರೇ ನೀವು ಹೀಗೆ ಜೋಕ್ ಮಾಡ್‌ಬಹುದಾ ? ಬಾಲಿವುಡ್ಡಿನ ಸ್ಮಾಲ್‌ಮ್ಯಾನ್ ಖಾನ ಎಂಬ ನಟ ಅದ್ಯಾವಳೋ ಹಳೇ ಗರ್ಲ್‌ಫ್ರೆಂಡನ್ನು ಬಿಟ್ಟು ಮತ್ತ್ಯಾರದೋ ಹಿಂದೆ ಸುತ್ತುತ್ತಿದ್ದಾನೆ ಎಂದು ನೀವು ಬರೆದದ್ದನ್ನು ಓದಿ ನಾನೇನು ಗಳಿಸುತ್ತೇನೆ ? ಮೋಕ್ಷ ? ರಂಭೆ-ಮೇನಕೆಯರ ಮ್ಯಾಟನಿ ಶೋಗೆ ಫುಕ್ಕಟೆ ಟಿಕೀಟು ?

೪. ಹಿಂದಿ ನಮ್ಮ ರಾಷ್ಟ್ರಭಾಷೆ, ಬಾಲಿವುಡ್ಡು ಸಿನೆಮಾಗಳು ಕನ್ನಡಿಗರಿಗೆ ಹಿಂದಿಯ ದೀಕ್ಷೆ ತೊಡಿಸಿಸುವ ಮಿಷನರಿಗಳಿದ್ದಂತೆ. ಹಿಂದಿ ಪ್ರಸಾರದಿಂದ ದೇಶ ಬಲಿಷ್ಠವಾಗುತ್ತದೆಯಾದ್ದರಿಂದ, ಬಾಲಿವುಡ್ ಸಿನೇಮಾಗಳಿಗೆ ಸಹಾಯ ಮಾಡುವುದು ದೇಶಕ್ಕಾಗಿ ನನ್ನ ಅಳಿಲು ಸೇವೆ ಎಂದಿರಾ ? ಸ್ವಾಮಿ ತಮಾಷೆ ಮಾಡಬೇಡಿ ಎಂದು ಹೇಳ್ತಾನೇ ಇದಿನಿ.. ನೀವು ಮತ್ತೂ ಹಾಗೆ ಮಾಡೋದಾದರೆ ನನಗೆ ಕೋಪ ಬಂದ್ ಬಿಡುತ್ತೆ !!

ಅಂದಹಾಗೆ, ಹಿಂದಿಯೊಂದೇ ನಮ್ಮ ರಾಷ್ಟ್ರಭಾಷೆಯಾದರೆ ಕನ್ನಡವೇನು ಪಾಕಿಸ್ತಾನದ ರಾಷ್ಟ್ರಭಾಷೆಯೇ ?

೫. ಕನ್ನಡಿಗರಾಗಿ ನೀವು ಇಷ್ಟು ಸಂಕುಚಿತ ಬುದ್ಧಿಹೊಂದಿರುವುದು ತಪ್ಪು. ದೊಡ್ಡ ಮನಸ್ಸಿನವರಾಗಿ, ವಿಶ್ವಮಾನವರಾಗಿ ಎಂದು ಬುದ್ಧಿ ಹೇಳ್ತಾ ಇದೀರಾ ? ನಮಗಿಂತಾ ನಿಮ್ಮ ಉಪದೇಶಕ್ಕೆ ಅರ್ಹರಾದ ಜನರು ಬಹಳ ಇದ್ದಾರೆ ಅನಿಸುತ್ತದೆ. ಬೇರೆ ಭಾಷೆಯ ಪತ್ರಿಕೆಗಳು ಕನ್ನಡ ಸಿನೇಮಾಗಳನ್ನು ’ನೋಡಲೇ ಬೇಕಾದ’ ಪಟ್ಟಿಯಲ್ಲಿ ಪ್ರಕಟಿಸುತ್ತಾರಾ ? ಕನಿಷ್ಟ ಬೆಂಗಳೂರಿನಿಂದ ಪ್ರಕಟವಾಗುವ ಪತ್ರಿಕೆಗಳು ? ನಿಮ್ಮ ವಿಶ್ವಮಾನವ ಸಂದೇಶದ ಪ್ರಭಾವವಾಗಿ, ಬೆಂಗಳೂರಿನಿಂದ ಪ್ರಕಟವಾಗುವ ಅನ್ಯ ಭಾಷಾ ಪತ್ರಿಕೆಗಳು ತಮ್ಮ ಪುಟಗಳಲ್ಲಿ ಕನ್ನಡದ ಪಾಠಗಳನ್ನು ಪ್ರಕಟಿಸಿದರೆ, ನಿಮ್ಮ ಪತ್ರಿಕೆಗಳಿಗೆ/ಪುಸ್ತಕಗಳಿಗೆ ಇನ್ನಷ್ಟು ಓದುಗರಾದರೂ ಸಿಕ್ಕಾರು..

ಹಾಗೆ ಒಂದ್ಮಾತು, ನನಗೆ ತಿಳಿದ ಮಟ್ಟಿಗೆ ವಿಶ್ವಮಾನವನಾಗುವುದು ಎಂದರೆ ’ನನ್ನ’ ಹಿತವನ್ನು ತ್ಯಾಗಮಾಡುವುದೇ ಹೊರತು ’ನಮ್ಮ’ (ಕನ್ನಡ ಜನ ಸಮುದಾಯದ) ಹಿತತ್ಯಾಗವಲ್ಲ. ಅಲ್ವಾ ?

೬. ಬಾಲಿವುಡ್ಡಿನ ಸುದ್ದಿಗಳನ್ನು ಪ್ರಕಟಿಸುವುದು ಕನ್ನಡ ಪತ್ರಿಕೆಗಳ ಸಿದ್ಧ-ಸೂತ್ರವೇ ಆಗಿ ಹೋಗಿದೆ ಎಂಬ ಹಳೇರಾಗವನ್ನೇ ಹಾಡ್ತಾ ಇದೀರಾ ? ಸಿದ್ಧ-ಸೂತ್ರಗಳನ್ನು ಮುರಿಯುವುದೇ ಪತ್ರಿಕೋದ್ಯಮದ ಏಕೈಕ ಸೂತ್ರ ಎಂದು ನಿಮ್ಮವರೇ ಹೇಳಿರಲಿಲ್ಲವೇ ? ಮೊನ್ನೆ-ಮೊನ್ನೆ ಬೆಂಗಳೂರಿನ ಎಪ್ಫೆಮ್ ರೇಡಿಯೋಗಳು ಬಾಲಿವುಡ್ಡಿನ ತುತ್ತೂರಿ ಊದುತ್ತಿದ್ದಾಗ, ಹೊಸದಾಗಿ ಬಂದ ವಾಹಿನಿಯೊಂದು ಬಾಲಿವುಡ್ಡಿನ ಹಾಡುಗಳಿಗೆ ಗೇಟ್‌ಪಾಸ್ ಕೊಟ್ಟು ಹೊಸ ಟ್ರೆಂಡ್ ಶುರು ಮಾಡಲಿಲ್ಲವೇ ? ಹಾಗೆಯೇ ಬಾಲಿವುಡ್ಡಿನ ಬಿಟ್ಟಿ ಸುದ್ದಿಗಳಿಗೆ ಬೈ ಬೈ ಹೇಳುವ ಸತ್‌ಸಂಪ್ರದಾಯವನ್ನೂ ಕನ್ನಡ ಪತ್ರಿಕೆಗಳು ಯಾಕೆ ಶುರುಮಾಡಬಾರದು ?

ಪವಿತ್ರ ತೀರ್ಥ...

2010-02-18T21:54:00.000-08:00

ಸಸ್ಯ-ವಿರೋಧಿ ಉಪಹಾರಗೃಹ..

2010-02-14T09:27:00.000-08:00

ಹಾಸನಕ್ಕೆ ಹೋಗ್ತಾ ಒಂದು ನಾನು ನೋಡಿದೆ.. ಇನ್ನೂ ಬಹಳಷ್ಟು ಇರಬಹುದು:

punಚಾಮೃತ

2010-01-31T09:40:00.000-08:00

¿ ’ನಿನ್ನ ಬುದ್ಧಿಗಷ್ಟು ಬೆಂಕಿ ಹಾಕ’ ಅಂತ ನೀವ್ಯಾರಿಗಾದರೂ ಅಂದರೆ ಅವರಿಗೆ ಏನಾಗುತ್ತೆ ?
✔ ಅವರು ಇಗ್ನೈಟೆಡ್ ಮೈಂಡ್ ಆಗುತ್ತಾರೆ..!!

ನಥಿಂಗ್ ಅಫೀಸೀಯಲ್ ಅಬೌಟ್ ಇಟ್..

2010-01-30T08:39:00.000-08:00

ಮನೆಯೊಂದರ ಮುಂದೆ ನೋಡಿದ ಬರಹ ಇದು :

"FOR OFFICIAL FAMILY" ಅಂದರೇನು ಅರ್ಥ ? ’ಸ್ಟೆಪ್ನಿ ಫ್ಯಾಮಿಲಿ’ಗಳಿಗಲ್ಲಾ ಅಂತನಾ ? :-)

ಕಿರಿದೆಂಬ ಹಿರಿಮೆ..

2010-01-27T07:24:00.000-08:00

ಅವರ ತಿ* ಕಿರಿದಾದರೂ ಇರಲಿ, ಹಿರಿದಾದರೂ ಇರಲಿ, ಮನೆಯ ಮುಂದೆ ಬರೆದು ಕೊಳ್ಳುವುದು ಸಭ್ಯತೆಯೇ ? :-)

ಬಾಡಿಗೆ ಅಮ್ಮಂದಿರ ಜಾಹಿರಾತು

2010-01-26T07:18:00.000-08:00

"ಮಹಿಳೆಯರು ಬಾಡಿಗೆಗೆ" ಎಂದು ನಗರದ ಆಸ್ಪತ್ರೆಯೊಂದರಲ್ಲಿ ಬರೆದಿದ್ದು ನೋಡಿದೆ- ಬಾಡಿಗೆ ಅಮ್ಮಂದಿರ ಜಾಹಿರಾತು ಇರಬಹುದೇ ?

punಚಾಮೃತ

2010-01-02T21:27:00.000-08:00

ಜಾರ್ಖಂಡದಲ್ಲಿ ಜೆಎಂಎಂ ಮತ್ತು ಭಾಜಪ ಸೇರಿ ಸರಕಾರ ರಚಿಸುತ್ತಾ ಇವೆ ಅಂತೆ..
ಇದಕ್ಕೆ ಇವೆರಡೂ ಪಕ್ಷಗಳ ನಾಯಕರುಗಳ ನಡುವಿನ ಗಡ್ಡ ಸಾಮರಸ್ಯವೇ ಕಾರಣ - ಒಬ್ಬರು ಗಡ್ಡಧಾರಿಯಾದರೆ, ಇನ್ನೊಬ್ಬರು ’ಗಡ್ಡ’ಕರಿ...

punಚಾಮೃತ

2009-12-27T05:32:00.000-08:00

¿ ತೆಲಂಗಾಣದ ಬಗ್ಗೆ ಕೇಂದ್ರ ತನ್ನ ರಾಗ ಬದಲಿಸಿದೆ..
✔ ಇದು ತೆಲಂ’ಗಾಯನ’...

punಚಾಮೃತ

2009-12-26T05:13:00.000-08:00

¿ ಬಿಜೆಪಿ ಸರಕಾರ ರೇಣುಕಾಚಾರ್ಯರನ್ನು ಕ್ಯಾಬಿನೆಟ್ಟಿಗೆ ಸೇರಿಸಿಕೊಂಡಿದೆ...
✔ ಇದು ಈ ಸರಕಾರದ ಆಚಾರ್ಯ ಕೃತಿ - master piece..

ನಾನು, ನನ್ನ ರೂಂಮೇಟುಗಳು ಮತ್ತು ಭಾಷೆ

2009-12-25T05:05:00.000-08:00

(ಮೊನ್ನೆ ಬಹುಮಾನ ಪಡೆದ ಲೇಖನದ ಪೂರ್ಣಪಾಠ ಇಲ್ಲಿದೆ. ಅಪರಂಜಿ ವಿಶೇಷ ಸಂಚಿಕೆ, ಜನೆವರಿ ೨೦೧೦ರಲ್ಲಿ ಈ ಲೇಖನ ಪ್ರಕಟವಾಗಿದೆ)

"ಮಾತು ಬಲ್ಲವಗೆ ಜಗಳವಿಲ್ಲ", "ಮಾತು ಮನೆ ಕೆಡಿಸಿತು", "ಮಾತೇ ಮಾಣಿಕ್ಯ", "ಮಾತೇ ಜ್ಯೋತಿರ್ಲಿಂಗ" ಕೊನೆಗೆ "ಮಾತೇ ಮಹಾದೇವಿ(!)" ಎಂದೆಲ್ಲಾ ನಮ್ಮ ಹಿರಿಯರು ಮಾತಿನ ಮಹತ್ತನ್ನು ಸಾರಿದ್ದಾರೆ. ವಿವಿಧ ಹಿನ್ನೆಲೆಯ ಜನಗಳ ಸಂಗಮವಾದ ನಮ್ಮ ರೂಮಿನಲ್ಲಿ ಮಾತಿನ ದೆಸೆಯಿಂದಾದ ಪ್ರಸಂಗಗಳಿಗೆ ಲೆಕ್ಕ ಇಲ್ಲ.

ನಮ್ಮ ರೂಂಮೇಟು ನಿರ್ಮಲಕುಮಾರನದು ಅರ್ಧ ಕನ್ನಡ, ಅರ್ಧ ತೆಲುಗು ಮನೆಮಾತು. ಆದರೆ ಆತ ಹುಟ್ಟಿ ಬೆಳೆದದ್ದು ತಮಿಳುನಾಡಿನಲ್ಲಿ. ಓದಿದ್ದು ಇಂಗ್ಲೀಷು ಮೀಡಿಯಮ್ಮು, ಆದರೆ ಪ್ರಥಮ ಭಾಷೆಯಾಗಿ ಕಲಿತದ್ದು ಸಂಸ್ಕೃತ. ಹೀಗಾಗಿ ನಿರ್ಮಲಕುಮಾರನ ಶಬ್ದಕೋಶದಲ್ಲಿ ಈ ಎಲ್ಲಾ ಭಾಷೆಗಳ ಶಬ್ದಗಳಿದ್ದವು. ಆದರೆ ಒಂದು ಭಾಷೆಯನ್ನು ಮಾತನಾಡುವಾಗ ಇನ್ನೊಂದು ಭಾಷೆಯ ಶಬ್ದಗಳು ಬಾಯಿಗೆ ಬಂದು ಭಯಂಕರ ಗಲಿಬಿಲಿ ಉಂಟು ಮಾಡಿಬಿಡುತ್ತಿದ್ದವು. ಒಮ್ಮೊಮ್ಮೆಯಂತೂ ಭಾಷೆಗಳ ಈ ಗಿರ್‌ಮಿಟ್ಟು ಅವಾಂತರವನ್ನೇ ಉಂಟು ಮಾಡಿಬಿಡುತಿತ್ತು.

ಒಂದು ಸಲ ನಿರ್ಮಲಕುಮಾರನಿಗೆ ಕಣ್ಣು ನೋವು ಬಂದಿತ್ತು. ಕಣ್ಣಿನ ತಜ್ಞರ ಹತ್ತಿರ ಕರೆದುಕೊಂಡು ಹೋಗಿದ್ದೆ. ಅವರು ಸಮಸ್ಯೆ ಏನು ಎಂದು ಕೇಳಿದಾಗ ನಿರ್ಮಲ ಕುಮಾರ ಎರಡೂ ಕಣ್ಣೂ ಏಕ ಆಗಿವೆ ಎಂದು ಹೇಳಿದ. ಡಾಕ್ಟರಿಗೂ, ನನಗೂ ಏನು ಎಂತ ಅರ್ಥವಾಗಲಿಲ್ಲ. ಕಣ್ಣು-ಕಣ್ಣೂ ಸೇರಿ ಏಕಾದಾಗ ಪ್ರೀತಿ ಹುಟ್ಟುತ್ತೆ ಅಂತ ಗೊತ್ತು. ಆದರೆ ಅವೆರಡು ಬೇರೆ-ಬೇರೆ ವ್ಯಕ್ತಿಗಳ ಕಣ್ಣುಗಳಾಗಿರಬೇಕಲ್ಲಾ! ಇನ್ನು ನಾರ್ಸಿಸಮ್ ಎಂದು ಕರೆಸಿಕೊಳ್ಳುವ ಸ್ವಮೋಹದ ರೋಗಕ್ಕೊಳಗಾದಾಗ ಹಿಂಗಾಗುತ್ತೋ ಏನೋ ಎಂದು ನಾನು ವಿಚಾರ ಮಾಡುತ್ತಾ ಇದ್ದೆ. ನಮ್ಮ ಮುಖದ ಮೇಲೆ ಮೂಡಿದ ಪ್ರಶ್ನಾರ್ಥಕ ಚಿನ್ಹೆಯನ್ನು ಕಂಡು, ನಿರ್ಮಲಕುಮಾರ ಕಣ್ಣುಗಳಲ್ಲಿ ಏಕ್ - ಅಂದರೆ ಂ-ಛಿ-h-e ಎಂದು ಸ್ಪೆಲಿಂಗ್ ಸಹಿತವಾಗಿ ಹೇಳಿದಾಗ, ನಾನೂ ಡಾಕ್ಟರರೂ ಜ್ಞಾನೋದಯವಾಗಿ ನಿಟ್ಟುಸಿರು ಬಿಟ್ಟಿದ್ದೆವು.

ತಮಿಳು ಸ್ವಲ್ಪ ಆಕ್ರಮಣಕಾರಿ ಭಾಷೆ ಅನಿಸುತ್ತೆ, ನಿರ್ಮಲ್ ಕುಮಾರನ ಜಿಹ್ವಾಸಾಮ್ರಾಜ್ಯದಲ್ಲಿ ಅದು ಆಗಾಗ ಉಳಿದ ಭಾಷೆಗಳ ಮೇಲೆ ಅತಿಕ್ರಮಣ ಮಾಡುತ್ತಿತ್ತು. ತಮಿಳಿನಲ್ಲಿ ’ಕ’-’ಗ’ ಗಳು ಒಂದೇ, ’ಚ’-’ಸ’ಗಳು ಬೇರೆಯಲ್ಲ, ’ತ’-’ದ’ಗಳು ಅದ್ವೈತ. ಹೀಗಾಗಿ ನಿರ್ಮಲನ ಬಾಯಲ್ಲಿ ಕವಿರಾಜ, ಗವಿರಾಜನಾಗಿ, ಗುರುರಾಜ- ಕುರುರಾಜನಾಗಿ ಹೆಸರು ಕೆಡಿಸಿಕೊಳ್ಳುತ್ತಿದ್ದರು. ಹಾಗೆಯೇ ಚಾಮರಾಜ - ಸಾಮರಾಜನಾಗಿ, ಶೀಲಾ- ಚೀಲಾ ಆಗಿ ಬದ್‌ನಾಮಾಗುತ್ತಿದ್ದರು. ಒಮ್ಮೆ ವೀರಪ್ಪನ್ ಬಗ್ಗೆ ಮಾತಾಡ್ತಾ ಇದ್ದಾಗ ನಿರ್ಮಲಕುಮಾರ ಅವನು ಕೌಂಟರ್ ಜಾತಿಯವನು, ಅವನ ಜಾತಿಯ ಓಟುಗಳ ಮೇಲೆ ಕಣ್ಣಿಟ್ಟುರುವ ರಾಜಕಾರಣಿಗಳು ಅವನ ಬಗ್ಗೆ ಮೃದುವಾಗಿದ್ದಾರೆ ಎಂದು ತನ್ನದೊಂದು ಸಿದ್ಧಾಂತವನ್ನು ಮುಂದಿಟ್ಟಿದ್ದ. ನಮಗೆ ಕ್ಯಾಷ್-ಕೌಂಟರ್ ಗೊತ್ತು, ಫುಡ್ ಕೌಂಟರ್ ಗೊತ್ತು, ಇದೇನಿದು ಕೌಂಟರ್ ಜಾತಿ ಎಂದು ವಿಸ್ಮಯಿಸಿ, ವೀರಪ್ಪನ್ನನದು ಕೌಂಟರ್ ಜಾತಿಯಾದರೆ, ಪೋಲಿಸರದು ಎನ್-ಕೌಂಟರ್ ಜಾತಿಯೇ ಸರಿ ಎಂದು ನಾವು ಲೆಕ್ಕ ಹಾಕಿದ್ದೆವು. ನಂತರ ತಿಳಿದದ್ದೇನೆಂದರೆ ವೀರಪ್ಪನದು ಗೌಂಡರ್ ಜಾತಿ. ನಿರ್ಮಲನ ನಾಲಿಗೆ ’ಕೌ-ಗೌ’ ಮತ್ತು ’ಡ-ಟ’ ಗಳ ಮಧ್ಯೆ ಅಭೇದ ಕಲ್ಪಿಸಿ ನಮ್ಮನ್ನು ಬೇಸ್ತು ಬೀಳಿಸಿತ್ತು.

ನಾನು, ನನ್ನ ಇನ್ನೊಬ್ಬ ರೂಂಮೇಟು ವಿನಾಯಕ ಮತ್ತು ನಮ್ಮ ರೂಂನಲ್ಲಿ ಆಗಾಗ ಝಂಡಾ ಹಾಕುತ್ತಿದ್ದ ಬಹುತೇಕ ಸ್ನೇಹಿತರೆಲ್ಲರೂ ಬಿಳಿಜೋಳದ ಖಡಕ ರೊಟ್ಟಿಯಂತಹ ಮಾತಿನವರು. ನಾನು, ವಿನಾಯಕ ತಕ್ಕ ಮಟ್ಟಿಗೆ ಈ ಹಳೇ ಮೈಸೂರು ಕನ್ನಡವನ್ನು ಕಲಿತು, ಅಲ್ಲಿಯೂ ಸಲ್ಲುತ್ತಾ, ಇಲ್ಲಿಯೂ ಸಲ್ಲುತ್ತಿದ್ದೆವು. ಆದರೆ ನಮ್ಮ ರೂಂಮಿನ ಕಾಯಂ ಅತಿಥಿ ಈರಣ್ಣನಿಗೆ ಎರೆಮಣ್ಣಿನ ವಾಸನೆಯ ಕನ್ನಡವನ್ನು ಒಂದು ಗಾಲಿಯಾಗಿಸಿ, ಮಲ್ಲಿಗೆಯ ಘಮದ ಕನ್ನಡವನ್ನು ಇನ್ನೊಂದು ಗಾಲಿಯಾಗಿಸಿ, ಸೈಕಲ್ಲು ಹೊಡೆಯುವ ಕಲೆ ಕೊನೆಗೂ ಸಾಧ್ಯವೇ ಆಗಿರಲಿಲ್ಲ. ಚುರುಮುರಿಗೆ ಪುರಿ ಯಾಕೆ ಅನ್ನ ಬೇಕು ? ಚುರುಮುರಿಗೆ ಪುರಿ ಅಂದರ ಎಣ್ಣ್ಯಾಗ ಕರದು ಮಾಡುವ ಪುರೆಕ್ಕ ಏನ್ ಅನಬೇಕು? ನೆಲದ ಕೆಳಗ ಬೆಳೆಯುವ ಶೇಂಗಾಕ್ಕ ಕಡಲೆ ಅಂದರ ನೆಲದ ಮ್ಯಾಗ ಬೆಳೆಯುವ ಕಡಲೆ - ಣhe gಡಿಚಿms - ಅವಕ್ಕ ಏನನ್ನಬೇಕು? ಅನ್ನಕ್ಕ ಸಕ್ಕರಿ ಹಾಕಿ ಮಾಡುವ ಅಡಿಗಿ ಕೇಸರಿ ಭಾತು. ಶಿರಾಕ್ಕೂ ಕೇಸರಿಭಾತು ಅಂದರ ಮೊದಲಿಂದಕ್ಕ ಏನನ್ನಬೇಕು? ಎಂಬ ಅವನ ಮೂಲಭೂತ ಪ್ರಶ್ನೆಗಳಿಗೆ ನಮ್ಮಲ್ಲಿ ಉತ್ತರವಿರಲಿಲ್ಲ.

ನಮ್ಮ ಇನ್ನೊಬ್ಬ ಸ್ನೇಹಿತ ಖಾನನದು ಈರಣ್ಣನ ಉಲ್ಟಾ ಕೇಸು. ನಮ್ಮ ಹಾಗೆ ಈ ಖಾನನೂ ರೊಟ್ಟಿ ಖಾರಬ್ಯಾಳಿ ತಿಂದೇ, ತುಂಗಭದ್ರೆ-ಕೃಷ್ಣೆ-ಮಲಪ್ರಭೆಯರ ನೀರು ಕುಡಿದೇ ಬೆಳೆದವನು. ಆದರೆ ಬೆಂಗಳೂರಿಗೆ ಬಂದು ಕಾವೇರಿ ನೀರು ಸೋಕಿದ ತಕ್ಷಣ ನಾನು ಕಣೋ ಖಾನು ಎನ್ನುವಷ್ಟು ಬದಲಾಗಿದ್ದ. ಏನ್ಲೇ ಮಗನ ಎಂಬ ಆತ್ಮೀಯ ಸಂಬೋಧನೆ ಏನ್ ಕಣೋ ಎಂದು, ಅಕ್ಕಾವರ, ಅವ್ವಾವರ ಅನ್ನುವ ಗೌರವ ಪೂರ್ವಕ ಸಂಬೋಧನೆಗಳು ಅಮ್ಮಾ ಎಂದು ಬದಲಾಗಿ ಖಾನನ ಮಾತನಾಡುವ ಶೈಲಿ ಸಂಪೂರ್ಣ ಪರಿವರ್ತನೆ ಹೊಂದಿತ್ತು. ಒಮ್ಮೆ ನಮ್ಮ ಖಾನು ಊರಿಗೆ ಹೋಗಿದ್ದಾಗ ಅವರ ಕೋಳಿ ಅಂಗಳದಲ್ಲಿ ತತ್ತಿ ಇಟ್ಟಿತಂತೆ. ಅದನ್ನು ತನ್ನ ತಾಯಿಗೆ ಹೇಳಲು ಖಾನ್ ಸಾಹೇಬರು ಯವ್ವಾಬೇ, ಕೋಳಿ ತತ್ತಿ ಇಟ್ಟೈತಿ ಎಂದು ಹೇಳದೇ ಅಮ್ಮಾ, ಕೋಳಿ ಮೊಟ್ಟೆ ಇಟ್ಟಿದೆ ಎಂದು ಕೂಗಿ ಹೇಳಿದರಂತೆ. ಅದನ್ನು ಕೇಳಿದ ಖಾನ ಸಾಹೇಬರ ಮಾತೋಶ್ರೀಯವರು ಮೊದಲು ದಿಙ್ಮೂಢರಾಗಿ, ನಂತರ ಸುಧಾರಿಸಿಕೊಂಡು ಇಂತಹ ಭಾಷಾ-ಪ್ರಯೋಗ ಬೆಂಗಳೂರು ಹುಡುಗಿಯೊಬ್ಬಳು ತನ್ನ ಮಗನನ್ನು ಮಾಯಾಜಾಲದಲ್ಲಿ ಸಿಕ್ಕಿಸಿದರ ಪರಿಣಾಮವೇ ಎಂದು ತೀರ್ಮಾನಿಸಿದರಂತೆ. ಅಂಗಳದಲ್ಲಿ ಬಿದ್ದಿದ್ದ ಮಂಡ ಮಚ್ಚೆಗಳನ್ನು ತೆಗೆದುಕೊಂಡು ರಪರಪ ಎಂದು ಹೊಡೆಯುತ್ತ ಯಾವ ಮಿಟುಕಲಾಡಿ ನಿನಗಿಂತಾ ಮಾತ್ ಕಲಿಸಿದಾಕಿ ? ಯಾವೂರ ಲೌಡಿ ಆಕೀ? ಎಂದು ಖಾನ ಸಾಹೇಬರಿಗೆ ಸನ್ಮಾನ ಮಾಡಿದ್ದರಂತೆ!

ಇತ್ತೀಚಿನ ವರದಿಗಳ ಪ್ರಕಾರ ಮಂಡ ಮಚ್ಚೆಗಳ ಸನ್ಮಾನದಿಂದಾಗಿ ಸ್ವಲ್ಪ ದಿನ ಎಲ್ಲರಂತಿದ್ದ ಖಾನ್ ಸಾಹೇಬರು ಈ ಸಲ ’ಚಮಕಾಯಿಸಿ, ಚಿಂದಿ ಉಡಾಯಿಸಿ’ ಭಾಷೆಯ ದೀಕ್ಷೆ ತೊಟ್ಟಿದ್ದಾರೆ. ಆದ್ದರಿಂದ ಏನು ಕಣೋ ಸಂಬೋಧನೆ ಏನ್ ಮಚ್ಚಾ ಎಂದು ಬದಲಾಗಿದೆ ಅಂತೆ!

ಅಂದ ಹಾಗೆ ’ಹಕೂನ ಮಟಾಟ’ ಎಂಬ ನುಡಿಗಟ್ಟು ನಿಮಗೆ ಗೊತ್ತಿರ ಬೇಕಲ್ಲಾ ? ಆಫ್ರಿಕದ ಭಾಷೆಯೊಂದರಲ್ಲಿ ಅದರ ಅರ್ಥ ’ನೋ ಪ್ರಾಬ್ಲಂ’ ಅಂತ. ’ನಿರ್ಲಜ್ಜಂ ಸದಾಸುಖಿ’ ಎಂದು ನಂಬಿ, ನಡೆಯುವವರ ಮನೋಭಾವವನ್ನು ’ಹಕೂನ ಮಟಾಟ’ ನುಡಿಗಟ್ಟು ಪ್ರತಿನಿಧಿಸುತ್ತದೆ. ನಮ್ಮ ಖಾನ ಸಾಹೇಬರ ಕೋಳಿ ಮೊಟ್ಟೆ ಪ್ರಸಂಗದ ದೆಸೆಯಿಂದಾಗಿ, ಯಾರಾದರೂ ನಮ್ಮ ಸ್ನೇಹಿತರು ಸಂಪೂರ್ಣ ಬೆಂಗಳೂರಿಗರಾಗಿ ಪರಿವರ್ತಿತರಾಗಿದ್ದಾರೆ ಎಂದು ಹೇಳಲು ’ಅವರ ಕೋಳಿ ಮೊಟ್ಟೆ ಇಡ್ತಾ ಇದೆ ಕಣೋ’ ಎಂದು ಹೇಳುವುದು ಚಾಲ್ತಿಗೆ ಬಂತು. ಉದಾಹರಣೆಗೆ ಗಿರಿ ಸಂಪೂರ್ಣ ಬೆಂಗಳೂರಿಗನಾಗಿ ಪರಿವರ್ತಿತನಾಗಿದ್ದರೆ, ಗಿರಿಯ ಕೋಳಿ ಮೊಟ್ಟೆ ಇಡ್ತಾ ಇದೆ ಕಣೋ ಎನ್ನುವುದು. ನಮ್ಮ ಸ್ನೇಹಿತರ ವಲಯದಲ್ಲಿ ...ರ ಕೋಳಿ ಮೊಟ್ಟೆ ಇಡ್ತಾ ಇದೆ ಕಣೋ ನುಡಿಗಟ್ಟು ಹಕೂನ ಮಟಾಟ ದಷ್ಟೇ ಜನಪ್ರಿಯವಾಯಿತು!!

ನಿರಾಶಾವಾದಿಗಳು ಕನ್ನಡ ಕೆಲವೇ ದಿನಗಳಲ್ಲಿ ಕಣ್ಮರೆಯಾಗಿ, ಅಡಿಗೆ ಮನೆಯ ಭಾಷೆಯಾಗಲಿದೆ ಎಂದು ಹೇಳುತ್ತಿರುತ್ತಾರೆ. ಆ ಹೇಳಿಕೆಯ ಎರಡೂ ಭಾಗಗಳೂ ಸತ್ಯವಲ್ಲ ಎನಿಸುತ್ತದೆ. ಮೊದಲನೆಯದಾಗಿ, ನೀವು-ನಾವು ಕನ್ನಡದಲ್ಲಿಯೇ ಬರೆದು-ಓದಿ-ಮಾತಾಡಿ-ಹಾಡಿ ಬದುಕುತ್ತಿರುವುದರಿಂದ ಕನ್ನಡವು ಕಣ್ಮರೆಯಾಗುವುದು ಅಥವಾ ಅದನ್ನು ಕಣ್ಮರೆಯಾಗಿಸುವ ಯತ್ನಗಳು ಯಶಸ್ವಿಯಾಗುವುದು ಕೆಲವೇ ದಿನಗಳಲ್ಲಿ ಸಾಧ್ಯವಿಲ್ಲ. ಈಗಂತೂ ಇಂಟರ್‌ನೆಟ್ಟು-ಬ್ಲಾಗು ಇತ್ಯಾದಿಗಳಲ್ಲಿ ಕನ್ನಡದ ಇನ್ನೊಂದು ಲೋಕವೇ ಸೃಷ್ಟಿಯಾಗುತ್ತಿದೆ. ಆದ್ದರಿಂದ ಮೂವತ್ತು-ನಲವತ್ತು ವರುಷಗಳಿಂದ ಕನ್ನಡ ಕಣ್ಮರೆಯಾಗುತ್ತೆ ಎಂದು ಆಶಿಸುತ್ತಿರುವರ ಆಶೆ ಅಷ್ಟು ಬೇಗ ಈಡೇರುವ ಸಾಧ್ಯತೆಗಳಿಲ್ಲ.

ಹೇಳಿಕೆಯ ಎರಡನೇ ಭಾಗಕ್ಕೆ ಬರುವ ಮುಂಚೆ ನಮ್ಮ ರೂಂಮಿನ ಅಡಿಗೆ ಕೆಲಸ ಮಾಡುವ ಭಾಗ್ಯಮ್ಮನ ಬಗ್ಗೆ ಒಂಚೂರು ಹೇಳಬೇಕು.

ನಮ್ಮ ಭಾಗ್ಯಮ್ಮನಿಗೆ ’ಸ್ವಚ್ಛ ಮಾಡು’ ಅಂದರೆ ತಿಳಿಯೋದಿಲ್ಲ, ಅವಳಿಗೆ ’ಕಿಲೀನು ಮಾಡು’ ಅಂದರಷ್ಟೇ ಅರ್ಥವಾಗೋದು. ಗಜ್ಜರಿ ಅಂದರೆ ಅವಳಿಗೆ ಗೊತ್ತಿಲ್ಲ, ಆದರೆ ಕ್ಯಾರೆಟ್ ಗೊತ್ತು. ಕೊತ್ತಂಬರಿ-ಬೆಳ್ಳುಳ್ಳಿ ಅಂದರೆ ’ಅದೇನು ಕನ್ನಡದಲ್ಲಿ ಹೇಳಿ ಸಾ’ ಅಂತಾಳೆ, ಆದರೆ ಕೋರಿಯಂಡರ್-ಗಾರ್ಲಿಕ್ ಅವಳ ನಾಲಿಗೆ ಮೇಲೆ ನಲಿದಾಡುವ ಪದಗಳು. ’ಕಿತ್ತಳೆ ಗೊತ್ತಾ?’ ಅಂತ ಕೇಳಿದರೆ ಅವಳ ಉತ್ತರ ’ಊಹ್ಞೂಂ’, ’ಆರೇಂಜಿ’ ಅಂದರೆ ’ಹ್ಞಾಂ’ !

ಇಲ್ಲಿಯೇ ಹುಟ್ಟಿ ಬೆಳೆದು, ಇಲ್ಲಿಯೇ ದುಡಿದು ತಿನ್ನುವ ಭಾಗ್ಯಮ್ಮನಿಗೆ ಈ ಪರಿಯ ಇಂಗ್ಲೀಷು ದೀಕ್ಷೆ ದೊರೆತದ್ದು ಹೇಗೆ ? ನನ್ನ ಪತ್ತೆದಾರಿಕೆಯ ಪ್ರಕಾರ ಟೀವಿಯೇ ಈ ’ಭಾಷಾಂತರ’ಕ್ಕೆ ಕಾರಣ. ಟೀವಿಯಲ್ಲಿ ಭಾಗ್ಯಮ್ಮ ಎಎಕ್ಸೆನ್ನು, ಎಚ್‌ಬಿಓ ಇತ್ಯಾದಿ ಇಂಗ್ಲೀಷು ವಾಹಿನಿಗಳನ್ನು ನೋಡ್ತಿರುತ್ತಾಳೆ ಅಂದುಕೊಳ್ಳಬೇಡಿ. ಅವಳು ನೋಡುವುದು ’ಮೂರು ಮತ್ತೊಂದು’ ಇರುವ ಸಿರಿಗನ್ನಡದ ವಾಹಿನಿಗಳನ್ನೇ. ಕನ್ನಡ ಟೀವಿ ವಾಹಿನಿಗಳಲ್ಲಿ ಬರುವ ಅಡಿಗೆ ಕಾರ್ಯಕ್ರಮಗಳಲ್ಲಿ, ನಿರೂಪಕರೂ, ಅತಿಥಿಗಳೂ ಇಬ್ಬರೂ ಸ್ಪರ್ಧೆಗೆ ಬಿದ್ದವರಂತೆ ಇಂಗ್ಲೀಷು ಶಬ್ದಗಳನ್ನು ಬಳಸುವುದನ್ನು ನೀವೂ ನೋಡಿಯೇ ಇರುತ್ತೀರಿ. ಆ ಜನ ವಗ್ಗರಣೆ ಹಾಕುವುದಕ್ಕೆ ಸೀಜನಿಂಗ್ ಅನ್ನುತ್ತವೆ, ’ಕುದಿಸಿ’ ಅನ್ನಲಿಕ್ಕೆ ’ಬಾಯಿಲ್ ಮಾಡುವುದು’ ಅನ್ನುತ್ತವೆ. ಹಸಿ ಮೆಣಸಿನಕಾಯಿಗೆ ’ಗ್ರೀನ್ ಚಿಲ್ಲಿ’, ಒಣ ಮೆಣಸಿನಕಾಯಿಗೆ ’ರೆಡ್ ಚಿಲ್ಲಿ’ ಎಂದು ಅವರು ಹೇಳದಿದ್ದರೆ ದೇವರ ಮೇಲಾಣೆ. ದೋಸೆಯ ಹಿಟ್ಟಿಗೆ ಅವರು ದೋಸಾ ಬ್ಯಾಟರ್ ಅನ್ನದಿದ್ದರೆ ನಾನು ಅಗ್ನಿಪ್ರವೇಶಕ್ಕೂ ತಯಾರು! ಇನ್ನು, ಟೀವಿಗಳಲ್ಲಿನ ಧಾರಾವಾಹಿಗಳ ಬಗ್ಗೆಯಂತೂ ಹೇಳುವುದೇ ಬೇಡ. ಈ ಧಾರಾವಾಹಿಗಳಲ್ಲಿ ಯಾರಿಗೂ ನೋವಾಗುವುದಿಲ್ಲ, ಎಲ್ಲರಿಗೂ ’ಹರ್ಟ್’ ಆಗುತ್ತೆ. ಅವರಿಗೆ ಜೀವನದಲ್ಲಿ ಸಮಸ್ಯೆಗಳು ಬರೋದೇ ಇಲ್ಲ, ಬರೀ ’ಪ್ರಾಬ್ಲಮ್’ಗಳು ಬರ್ತಾವೆ ! ಇಂತಹ ಟೀವಿ ಕಾರ್ಯಕ್ರಮ- ಧಾರಾವಾಹಿ ನೋಡಿದ ಭಾಗ್ಯಮ್ಮನಿಗೆ ಶುದ್ಧ ಕನ್ನಡ ಅರ್ಥವಾಗುವುದಿಲ್ಲ ಎನ್ನುವುದರಲ್ಲಿ ಏನು ಆಶ್ಚರ್ಯ?

ಭಾಗ್ಯಮ್ಮ ಮತ್ತು ಈರಣ್ಣ ಇಬ್ಬರೂ ಕನ್ನಡಿಗರಾದರೂ ಇಬ್ಬರ ನಡುವೆ ಸರಾಗ ಸಂಭಾಷಣೆಗೆ ಇನ್ನೊಬ್ಬ ದುಭಾಷಿಯ ಅವಶ್ಯಕತೆ ಇರುತ್ತಿತ್ತು. ದುಭಾಷಿ ಇಲ್ಲದಿದ್ದರೆ, ಪರಿಣಾಮ ಕೆಲವೊಮ್ಮೆ ಭೀಕರವಾಗಿರುತ್ತಿತ್ತು. ಈರಣ್ಣ ಹೊಸದಾಗಿ ಬಂದಾಗ ಭಾಗ್ಯಮ್ಮ ಪರಿಚಯಿಸಿಕೊಳ್ಳುತ್ತಾ, ತನ್ನನ್ನು ಅಡಿಗೆ ಹೆಂಗಸಾಗಿ ಇಟ್ಟುಕೊಂಡಿದ್ದಾರೆ ಎಂದು ಹೇಳಿದ್ದಳು. ನಮ್ಮ ಕಡೆ ಹೆಂಗಸು ಇಟ್ಟು ಕೊಳ್ಳುವುದು ಅಂದರೆ ಪಂಚ ಮಹಾ ಪಾತಕಗಳಲ್ಲಿ ಒಂದು. ಈರಣ್ಣ ಭಾಗ್ಯಮ್ಮನ ಮಾತಿಗೆ ಆ ಅರ್ಥ ಹಚ್ಚಿ ಖೋಕ್ ಖೋಕ್ ನಕ್ಕಿದ್ದಷ್ಟೇ ಅಲ್ಲ, ಮೂರ್ಖತನದಿಂದ ತಾನು ಯಾಕೆ ನಕ್ಕೆ ಎಂಬುದನ್ನು ಭಾಗ್ಯಮ್ಮನಿಗೆ ಹೇಳಿಯೂ ಬಿಟ್ಟಿದ್ದ. ಅವತ್ತು ಈರಣ್ಣನನ್ನು ಭಾಗ್ಯಮ್ಮನ ಚಪ್ಪಲಾಘಾತದಿಂದ ಪಾರುಮಾಡುವಲ್ಲಿ ನನ್ನ ಪೀಪಲ್ ಮ್ಯಾನೆಜ್‌ಮೆಂಟ್ ಕೌಶಲ್ಯವೆಲ್ಲಾ ಖರ್ಚಾಗಿ ಹೋಗಿತ್ತು!

ಬೆಂಗಳೂರಿಗೆ ಅಲ್ಲಿಂದ, ಇಲ್ಲಿಂದ, ಎಲ್ಲೆಲ್ಲಿಂದಲೋ ಜನ ಬಂದು ತಳವೂರುತ್ತಿರುವುದರಿಂದ ಭಾಗ್ಯಮ್ಮನಂತವರ ಶಬ್ದಕೋಶಗಳಲ್ಲಿ ಆ-ಈ ಭಾಷೆಗಳ ಪದಗಳೂ ಬರುತ್ತಿವೆ. ಸ್ವಲ್ಪ ಅಟ್ಟಾ ಕಲಿಸಿ, ಡವ್ ಮಾಡಿ ಬಿಡ್ತೀನಿ ಎನ್ನುವುದು ಭಾಗ್ಯಮ್ಮನ ಚಪಾತಿ ಮಾಡಲಿಕ್ಕೆ ಮುಂಚಿನ ಮುನ್ನುಡಿಯಂತಹ ಮಾತು. ನಿಮಗೆ ಗೊತ್ತಿಲ್ಲದಿದ್ದರೆ - ’ಅಟ್ಟಾ’ ಅಂದರೆ ಹಿಟ್ಟು, ಒಂದು ಪರದೇಶಿ ಭಾಷೆಯಲ್ಲಿ, ’ಡವ್’ ಅಂದ್ರೆ ಕಣಕ, ಮತ್ತೊಂದರಲ್ಲಿ. ಆಗಿನ್ನೂ ನಮ್ಮ ಗುರು ಜಗ್ಗೇಶರ ’ಡವ್’ ಅರ್ಥ ಮಾತ್ರ ನಮಗೆ ಗೊತ್ತಿತ್ತು. ಭಾಗ್ಯಮ್ಮನ ಮುನ್ನಡಿಯನ್ನು ಮೊದಲ ಸಲ ಸ್ವಲ್ಪ ಅಟ್ಟಾಡಿಸಿ, ಡವ್ ಮಾಡಿ ಬಿಡ್ತೀನಿ ಎಂದು ಕೇಳಿಸಿಕೊಂಡು, ಜಗ್ಗೇಶರು ಭಾಗ್ಯಮ್ಮನಂತೆ ಮೇಕಪ್ ಮಾಡಿಕೊಂಡು ಬಂದು ಸೆನ್ಸಾರಾಗದ ಡೈಲಾಗು ಹೇಳ್ತಾ ಇದ್ದಾರೇನೋ ಎಂಬ ಅನುಮಾನವಾಗಿತ್ತು!

ಭಾಗ್ಯಮ್ಮನ ಭಾಷಾಮಾಲಿನ್ಯದ ಬಗ್ಗೆ ಓದಿದ ಮೇಲೆ ನಿಮಗೆ ಈಗಾಗಲೇ ಆ ಹೇಳಿಕೆಯ ಎರಡನೇ ಭಾಗವೂ ಸತ್ಯವಲ್ಲ ಎಂದು ಅನಿಸಿರಬಹುದು. ಹೌದು, ಅಕಸ್ಮಾತ್ ಕನ್ನಡವು ಕಣ್ಮರೆಯಾದರೆ, ಅದು ಮೊದಲು ಅಡಿಗೆ ಮನೆಯಿಂದಲೇ ಕಣ್ಮರೆಯಾಗುತ್ತದೆ. ಅಡಿಗೆ ಮಾಡುವುದು - ಟೀವಿ ನೋಡುವುದು, ಬಿಟ್ಟು ಬೇರೇನೂ ಗೊತ್ತಿರದ ಭಾಗ್ಯಮ್ಮನಂತವರೂ, ಇತರ ಗೃಹಿಣಿಯರೂ ಟೀವಿಯ ಕನ್ನಡವನ್ನೇ ಉಪಯೋಗಿಸುತ್ತಾ ನೈಜಕನ್ನಡವನ್ನು ಮರೆಯುವುದು ನಿಶ್ಚಿತ. ಅದಾಗದಂತೆ ತಡೆಯಲು ಏನು ಮಾಡಬೇಕು ? ಕುಂಬಳಕಾಯಿ ಮತ್ತು ಕುಡುಗೋಲು ಎರಡೂ ಮುಖ್ಯವಾಗಿ ಟೀವಿಯಲ್ಲಿ ಬರುವ ಅಡಿಗೆ ಕಾರ್ಯಕ್ರಮದ ನಿರೂಪಕರ ಮತ್ತು ಭಾಗವಹಿಸುವವರ ಕೈಯಲ್ಲಿಯೇ ಇವೆ!!

punಚಾಮೃತ

2009-12-24T08:56:00.000-08:00

¿ ಗೌತಮ್ ಗಂಭೀರಗೆ ವಿಕೆಟ್ಟಿಗೆ ಅಂಟಿಕೊಂಡು ಇನ್ನಿಂಗ್ಸ್ ಕಟ್ಟುವುದು ಬಹಳ ಸರಳ ಕೆಲಸ, ಯಾಕೆ ?
✔ ಯಾಕಂದ್ರೆ ಅವರ ಹೆಸರಲ್ಲಿಯೇ ಅಂಟಿದೆ - gumಭೀರ !!

ನಾನು, ನನ್ನ ರೂಂಮೇಟುಗಳು ...

2009-12-23T06:39:00.000-08:00

"ನನಗೂ, ನನ್ನ ರೂಂಮೇಟುಗಳಿಗೂ" ಏನೋ ಲಾಟರಿ ಹತ್ತಿದಂತಿದೆ.. ಈ ಸರಣಿಯ ಇನ್ನೊಂದು ಬರಹ ದಾಟ್ಸ್ ಕನ್ನಡದಲ್ಲಿ ಬೆಳಕು ಕಂಡಿದೆ:
http://thatskannada.oneindia.in/column/humor/2009/1223-love-affair-operation-kamala-guru-kulkarni.html

ನಾನು, ನನ್ನ ರೂಂಮೇಟುಗಳು ...

2009-12-22T08:31:00.000-08:00

"ನಾನು, ನನ್ನ ರೂಂಮೇಟುಗಳು ... " ಸರಣಿಯ ಬರಹ ಒಂದಕ್ಕೆ ಬಹುಮಾನ ಬಂದಿದೆ.. ಇಂದಿನ ವಿಕದಲ್ಲಿ ಬಂದ ಸುದ್ದಿ:

punಚಾಮೃತ

2009-12-03T08:59:00.000-08:00

¿ ರೂಪದರ್ಶಿಗಳು ಅಂಡು ಟ್ರಿಮ್ ಮಾಡಿಸಿಕೊಳ್ಳುವ ಆಪರೇಷನ್ನಿಗೆ ಏನೆನ್ನಬೇಕು ?
✔ ಆಪರೇಷನ್ undo..

¿ ಆಪರೇಷನ್ undo ಮಾಡಿಸಿಕೊಂಡ ಒಬ್ಬ ರೂಪದರ್ಶಿ ಈಗ ಡಾಕ್ಟರರ ಪರಪೋಟಿನಿಂದಾಗಿ ಮರಣವಪ್ಪಿದ್ದಾರೆ..
✔ ಇದೊಂದು ASSassination ನ್ನೇ ಸರಿ :-)

punಚಾಮೃತ

2009-12-01T09:15:00.000-08:00

ನಿಮ್ಮ ಲ್ಯಾಪ್ ಟಾಪ್ ಬಹಳ ಕಿರಿಕಿರಿ ಕೊಡುತ್ತಿದ್ದರೆ ಅದರ ಲೇಬಲ್ಲನ್ನು ಹೀಗೆ ಬದಲಾಯಿಸಿ :-)

punಚಾಮೃತ

2009-11-30T08:12:00.000-08:00

ಅಂತೂ ಇಂತೂ ಪಾಪದ ಕೊಡ ತುಂಬಿತು..

punಚಾಮೃತ

2009-11-29T00:00:00.000-08:00

(potty ಅಂದರೆ ಆಡು-ಇಂಗ್ಲೀಷು ಭಾಷೆಯಲ್ಲಿ, ವಿಶೇಷವಾಗಿ ಪುಟ್ಟಮಕ್ಕಳ ಸಂದರ್ಭದಲ್ಲಿ, ಶೌಚ ಎಂದರ್ಥ)
¿ ಪುಟ್ಟಮಕ್ಕಳನ್ನು ಅವುಗಳ ಅಮ್ಮಂದಿರು "ಸಂಡಾಸ್ ಬಂತಾ ?" "ಒಂದಕ್ಕೆ ಹೋಗ್ಬೇಕಾ?" ಎಂದು ಕೇಳುವ ಪ್ರಶ್ನೆಗಳಿಗೆ..
✔ potty ಸವಾಲ್ ಎಂದು ಹೆಸರು !!

¿ ಮೇಲಿಂದ ಮೇಲೆ ಶೌಚಕ್ಕೆ ಹೋಗಬೇಕಾದ ಲೂಸ್ ಮೋಷನ್ ಇದ್ದಾಗ ಶಾಲೆಗೆ ಚಕ್ಕರ್ ಹೊಡೆದ ಪಾಪುಗಳು ಹಾಡುವ ಹಾಡು..
✔ "potty ಮ್ಯಾಲೆ potty, ನಮ್ ಸಾಲಿ ಸೂಟಿ !! "

¿ ದಿನಕ್ಕೆ ಮೂರು ಸಲ ಶೌಚಕ್ಕೆ ಹೋಗುವವರನ್ನು..
✔ ತ್ರಿ-potty ಎನ್ನಬಹುದು.

ನಾನು, ನನ್ನ ರೂಂಮೇಟುಗಳು ಮತ್ತು ಒಂದು ’ಧರ್ಮ’ಸಂಕಟ

2009-11-26T01:20:00.000-08:00

೩ ರೂಂಮೇಟುಗಳು ಅಂದ ತಕ್ಷಣ ನಿಮಗೆ ಜಾಣ ಜಪಾನಿನ ಮಂಗಗಳು ಕಣ್ಣಮುಂದೆ ಬಂದರೆ, ಸವಿನಯವಾಗಿ ನಿಮ್ಮ ಉಪಮಾನ ತಪ್ಪು ಎಂದು ಹೇಳಬಯಸುತ್ತೇನೆ. ೩ ಮುಖದ ಸಿಂಹ ನಮಗೆ ಸರಿಯಾದ ಉಪಮಾನವಾಗುತ್ತದೆ ಎನ್ನುವುದು ನನ್ನ ಭಾವನೆ. (ನಾಲ್ಕು ಮುಖದ ಸಿಂಹ ಎನ್ನುವುದು ಒಂದು ಮೂಢನಂಬಿಕೆ. ಪ್ರತ್ಯಕ್ಷ ಕಂಡರೂ ಪ್ರಮಾಣಿಸಿ ನೋಡಿ ಎನ್ನುತ್ತಾರೆ, ನೀವೇನಾದರು ನಾಲ್ಕನೆ ಮುಖ ನೋಡಿದ್ದೀರಾ?) ಮಂಗಗಳಂತೆ ಹುಡುಗಾಟಮಾಡದೇ, ಸಿಂಹಗಳಂತೆ ಗಂಭೀರವಾಗಿರುತ್ತೇವೆ ಅಂತಲ್ಲ. ೩ ಮುಖದ ಸಿಂಹಗಳಂತೆ ನಾವು ೩ ಜನರದು ಬೇರೆ ಬೇರೆ ದೃಷ್ಟಿಕೋನ ಇರುತ್ತವೆ ಎನ್ನುವುದಕ್ಕಾಗಿ ಮಾತ್ರ ! ವಿಷಯ ಯಾವುದೇ ಇರಲಿ, ನಾವು ೩ ಜನರದು ಬೇರೆ ಬೇರೆ ದೃಷ್ಟಿಕೋನ, ಬೇರೆ ಬೇರೆ ಅಭಿಪ್ರಾಯ. ಒಬ್ಬ ಎರಿಗೆ ಎಳೆದರೆ, ಇನ್ನೊಬ್ಬ ಕೆರಿಗೆ ಮತ್ತು ಮುಗದೊಬ್ಬ ಬಾರಿಗೆ ಎಳೆಯುವುದು ಶತಸಿದ್ಧ. ಇನ್ನು ದೇವರು-ಧರ್ಮಗಳಂತಹ ವಿವಿಧ ಮುಖ, ವಿವಿಧ ಆಯಾಮಗಳಿರುವ ವಿಷಯಗಳಲ್ಲಿ ನಮ್ಮದು ಐಕ್ಯ ಮತವಿರುವುದು ಸಾಧ್ಯವೆ?

ವಿನಾಯಕನದು ಅಖಂಡ ವಿಚಾರವಾದಿ ನಿಲುವು - ದೇವರು ಎನ್ನುವವ ಹಿಂದೆ ಇರಲಿಲ್ಲ, ಇಂದು ಇಲ್ಲ, ಮುಂದೆ ಇರುವುದಿಲ್ಲ! ಅದನ್ನು ಸಮರ್ಥಿಸಲು ಆತ ಬೌದ್ಧಮತದ ತತ್ವಗಳಿಂದ, ಪಾಶ್ಚಾತ್ಯ ದರ್ಶನದಿಂದ ಉದ್ದುದ್ದನೆಯ ಉಲ್ಲೇಖಗಳನ್ನು ಕೊಡುತ್ತಿದ್ದ. ಮೂರ್ತಿರಾಯರ ’ದೇವರ’ನ್ನು ನಮಗೆ ಪರಿಚಯಿಸಿದವನೇ ಈ ವಿನಾಯಕ. ಪ್ರತೀ ಶನಿವಾರ ನಮ್ಮ ಜೊತೆ ದೇವಸ್ಥಾನಕ್ಕೆ ಬರುತ್ತಿದ್ದನಾದರೂ, ದೇವಸ್ಥಾನದ ಇತಿಹಾಸ, ಪರಂಪರೆಗಳಿಗೆ ಅವನ ಆಸಕ್ತಿ ಸೀಮಿತ.

ನನ್ನ ವಿಷಯಕ್ಕೆ ಬಂದರೆ ನಾನೊಬ್ಬ ಆಸ್ತಿಕ, ನಾಸ್ತಿಕ ಮತ್ತು ಸಂದೇಹವಾದಿ ಆಲ್-ಇನ್-ಒನ್. ವಿನಾಯಕನ ಬೋಧನೆ ಜೋರಾಗಿದ್ದ ದಿನ ನಾನು ಕಟ್ಟಾ ವಿಚಾರವಾದಿ-ನಾಸ್ತಿಕ. ಬೋಧನೆಯ ಪ್ರಭಾವ ಕಡಿಮೆಯಾದ ಹಾಗೆ ನಾನು ಸಂದೇಹವಾದಿಯಾಗುತ್ತೇನೆ. ಮೂರ್ತಿರಾಯರೇ ತಮ್ಮ ದೇವರಿಗೆ - ಅಂದರೆ ’ದೇವರು’ ಕೃತಿಗೆ - ಪ್ರಶಸ್ತಿ ಬಂದಾಗ "ಪ್ರಶಸ್ತಿ ಕೊಟ್ಟವರಿಗೆ ದೇವರು ಒಳ್ಳೆಯದು ಮಾಡಲಿ" ಎಂದಿರಲಿಲ್ಲವೇ ? ಆದ್ದರಿಂದ ಅವರಿಗೂ ದೇವರು ಇದ್ದಾನೆಂಬ ಸಂದೇಹ ಇದ್ದಿರಬೇಕು, ಎಂದು ನಾನು ಸಮರ್ಥಿಸಿಕೊಳ್ಳುತ್ತೇನೆ. ಈ ಜಗತ್ತಿನಲ್ಲಿ ಕಳ್ಳರು, ಸುಳ್ಳರೂ, ಅತ್ಯಾಚಾರಿಗಳೂ ಇರುವಾಗ, ಕೊನೆಗೆ ರಾಜಕಾರಣಿಗಳೇ ಇರುವಾಗ, ದೇವರು ಎನ್ನುವವ ಒಬ್ಬ ಇದ್ದರೇನಂತೆ ? ಅವನೂ ಇದ್ದುಕೊಳ್ಳಲಿ ಬಿಡಿ ಎಂದುಕೊಳ್ಳುತ್ತೇನೆ. ಹೀಗಿರುವಾಗ ನಾನು ಡಿಸೈನು ಮಾಡಿದ ಮಾಡ್ಯುಲಿನಲ್ಲಿ ಬಗ್ಗುಗಳು ಬರತೊಡಗಿದರೆ, ನಾನು ನಿಧಾನವಾಗಿ ಆಸ್ತಿಕನಾಗಿ ಪರಿವರ್ತನೆಯಾಗುತ್ತೇನೆ. ಬಗ್ಗುಗಳ ಸಂಖ್ಯೆ ಮಿತಿ ಮೀರಿದರೆ, ’ನೀನೇ ಗತಿ’ ಎಂದು ಗಾಳಿ ಆಂಜನೇಯನಿಗೆ ಶರಣಾಗಿ, ಜೋಡುಗಾಯಿಯ ಹರಕೆ ಹೊರುತ್ತೇನೆ. ಬಗ್ಗುಗಳನ್ನು ಬಗ್ಗುಬಡಿದ ಕೆಲದಿನಗಳ ನಂತರ ಮತ್ತೆ ವಿನಾಯಕನ ಬೋಧನೆಯ ಪ್ರಭಾವಕ್ಕೋಳಗಾಗಿ ನಾಸ್ತಿಕನಾಗಿ ಪುನರಪಿ ಜನಿಸುತ್ತೇನೆ.

ನಮ್ಮ ಮೂರನೇ ರೂಂಮೇಟು ನಿರ್ಮಲಕುಮಾರನಿಗೆ ಅತೀ ಎನ್ನುವಷ್ಟು ದೈವಭಕ್ತಿ. ದೇವರಲ್ಲಿ ಅಷ್ಟೇ ಅಲ್ಲ , ಅವನ ಎಜಂಟರಲ್ಲಿಯೂ, ಆ ಎಜಂಟುಗಳ ಸಬ್-ಏಜೆಂಟುಗಳಲ್ಲಿಯೂ ಅವನಿಗೆ ನಂಬಿಕೆ. ಗಣಪತಿಗೆ ಹಾಲು ಕುಡಿಸಿದ ಚಂದ್ರಸ್ವಾಮಿಯಿಂದ ಹಿಡಿದು, ಯೋಗಕಲಿಸುವ ಬಾಬಾ, ಭೋಗ ಕಲಿಸುವ ಬಾಬಾ, ಕೊನೆಗೆ ತಮಿಳು ನಟ ರಜನಿಕಾಂತನ ’ಬಾಬಾ’ ಕೂಡ ನಿರ್ಮಲ್ಕುಮಾರನಿಗೆ ಪೂಜ್ಯರೆನಿಸುತ್ತಾರೆ. ಇನ್ನು ಒಂದು ವಿಶೇಷವೆಂದರೆ, ನಿರ್ಮಲಕುಮಾರನ ಇಷ್ಟದೇವತೆಗಳು ಆಗಾಗ ಬದಲಾಗ್ತಾ ಇರ್ತಾರೆ. ಕೆಲ ದಿನ ಪುಟಪರ್ತಿಗೆ ಶರಣೆಂದವ, ಮುಂದೆ ಪ್ಲೇಟು ಬದಲಿಸಿ ಶಿರಡಿಗೆ ಜೈ ಎನ್ನುತ್ತಾನೆ. ಸ್ವಲ್ಪ ದಿನ ಸ್ವಾಮಿಯೇ ಶರಣಂ ಅಯ್ಯಪ್ಪ ಅಂದರೆ, ಕೆಲವೇ ದಿನಗಳಲ್ಲಿ ದತ್ತಮಾಲೆ ಹಾಕಿರುತ್ತಾನೆ. ಅಪ್ಪುವ ಅಮ್ಮ, ಕಲ್ಕಿಭಗವಾನರೂ ಕೂಡ ಒಂದೊಂದು ಸಾರಿ ನಿರ್ಮಲಕುಮಾರನ ಫೆವರೇಟ್ ದೇವರಾಗಿ, ಈಗ ಮಾಜಿಗಳಾಗಿದ್ದಾರೆ. ನಿರ್ಮಲಕುಮಾರನಿಗೆ ಎಷ್ಟೇ ಪ್ರಯತ್ನಿಸಿದರೂ ಇನ್ನೂ ಯಾವುದೇ ಹಕ್ಕಿ ಬಿದ್ದಿಲ್ಲವಾದ್ದರಿಂದ, ಈ ಎಲ್ಲ ದೇವರುಗಳು ಅವನಿಗೆ ಅನಿವಾರ್ಯವೇ ಅನಿಸುತ್ತದೆ !

ಸುಮಾರು ಸಲ ನಿರ್ಮಲಕುಮಾರನ ಈ ದೈವಭಕ್ತಿ ನಮ್ಮ ಕೀಟಲೆಗೆ ಅಹಾರವಾಗುವ ನಿರುಪದ್ರವಿ ಹವ್ಯಾಸವೆನಿಸಿದರೂ, ಒಮ್ಮೆ ಮಾತ್ರ ನಮಗೆ "ಧರ್ಮ"ಸಂಕಟವನ್ನೇ ತಂದೊಡ್ಡಿತ್ತು. ಆ ಸಲ ವಾರಂತ್ಯದ ತೀರ್ಥಯಾತ್ರೆ ಮುಗಿಸಿ, ನಾವು ೩ ಜನ ವಾಪಸು ಬರುತ್ತಾ ಇದ್ದೆವು. ದಾರಿಯಲ್ಲಿ ಮಳೆಬಂದದ್ದಕ್ಕಾಗಿ ಚಾಟಿ ಹುಡುಕುತ್ತಿದ್ದವರಿಗೆ ಯಾವುದೋ ಕಾರ್ಯಕ್ರಮ ನಡೆದಿದ್ದ ಮಜಬೂತಾದ ಪೆಂಡಾಲು ಕಾಣಿಸಿತು. ಅಲ್ಲಿ ಹೋದರೆ ಅದೊಂದು Devine-healing ಅಂದರೆ ದೈವೀಚಿಕಿತ್ಸೆಯ ಸಭೆ. ಬೆಣ್ಣಿಹೀನನ ಶಿಷ್ಯ ಎಣ್ಣಿ ಸೀನ ಎಂಬುವವ ಅಂದಿನ ಸಭೆಯ ಚಿಕಿತ್ಸಕ. ಬೋರ್ಡು, ಬ್ಯಾನರುಗಳಲ್ಲಿ "Brother Seenu" ಎಂದು ಇಂಗ್ಲೀಷಿನಲ್ಲಿ, "ಸಹೋ. ಸೀನು" ಎಂದು ಕನ್ನಡದಲ್ಲಿ ಬರೆದುಕೊಂಡಿದ್ದನಾದರೂ ಇವನನ್ನು ಜನ ಗುರುತಿಸುತ್ತಿದ್ದದು ’ಎಣ್ಣಿ ಸೀನ’ ಎಂತಲೇ. ತನ್ನ ಪೂರ್ವಾಶ್ರಮದಲ್ಲಿ ಸೀಮೆ ಎಣ್ಣೆ ಎಜೆನ್ಸಿ ಇಟ್ಟುಕೊಂಡಿದ್ದನೆಂದು ಆ ಹೆಸರು. ಸೀನ, ಸೀಮೆ ಎಣ್ಣೆ ಜೊತೆಗೆ ಕೇಬಲ್ ಧಂದೆಯಲ್ಲೂ, ರಿಯಲ್ ಎಸ್ಟೆಟಿನಲ್ಲಿಯೂ ಸೈಡ್ ಬಿಜಿನೆಸ್ ಮಾಡ್ತಾ ಇದ್ದು, ಒಂದೆರಡು ದರೋಡೆಗಳಲ್ಲೂ ಭಾಗವಹಿಸಿದ್ದನಂತೆ. ಇವನ ಸಾಧನೆಯನ್ನು ಗಮನಿಸಿದ ಪೋಲಿಸರು ಇವನನ್ನು ಒಬ್ಬ ’ಇತಿಹಾಸ ಪುರುಷ’- history sheeter- ಎಂದು ಪರಿಗಣಿಸಿ ಇವನ ಬೆನ್ನತ್ತಿದ್ದರು. ಅವರಿಂದ ತಪ್ಪಿಸಿಕೊಳ್ಳಲು, ಆಗ ಭಾರತಕ್ಕಾಗಿ ಪ್ರಾರ್ಥಿಸುತ್ತೇನೆ ಎಂದು ಬಂದಿದ್ದ ಬೆಣ್ಣಿ ಹೀನನ ಬೆನ್ನಹಿಂದೆ ಹೋಗಿ ಅಡಗಿಕೊಂಡಿದ್ದ. ಬೆಣ್ಣಿ ಹೀನನ ಮುಂದೆ ಇಡೀ ಸರಕಾರವೇ ಅಡ್ಡಬಿದ್ದಿದ್ದರಿಂದ, ಈ ಎಣ್ಣಿ ಸೀನನನ್ನು ತಡವಲು ಯಾರಿಗೂ ಸಾಧ್ಯವಾಗಿರಲಿಲ್ಲ. ಬೆಣ್ಣಿಹೀನ ಹೊರಟುಹೋದ ನಂತರ ಎಣ್ಣಿಸೀನ "ಸಹೋ. ಸೀನು"ಯಾಗಿ ಚಾಲ್ತಿಗೆ ಬಂದು ಡಿವೈನ್-ಹೀಲಿಂಗ್ ಮಾಡ್ತೇನೆ ಎಂದು ಅಡ್ಡಾಡತೊಡಗಿದ್ದ.

ಪತ್ರಿಕೆಗಳಲ್ಲಿ ಇದನೆಲ್ಲ ಓದಿದ್ದ ನಾವು ಮಳೆ ನಿಲ್ಲುವವರೆಗೆ ಇದ್ದು , ಆಮೇಲೆ ’ಹೊಳೆ ದಾಟಿದ ಮೇಲೆ ಅಂಬಿಗ ಡ್ಯಾಷ್ ಡ್ಯಾಷ್’ ಎನ್ನುವಂತೆ ರೈಟ್ ಹೇಳೋಣ ಎಂದುಕೊಡಿದ್ದೆವು. ಆದರೆ ನಮ್ಮ ದೈವ ಭಕ್ತ ಶಿಖಾಮಣಿ ನಿರ್ಮಲಕುಮಾರ "ಪ್ರತಿಯೊಬ್ಬ ಸಂತನಿಗೂ ಒಂದು ಭೂತವಿದೆ ಮತ್ತು ಪ್ರತಿ ಪಾಪಿಗೆ ಭವಿಷ್ಯವಿದೆ" ಎಂದು ಕೋಟ್ ಹೇಳಿ "ಬ್ರದರ್ ಸೀನುವೂ ಯಾಕೆ ಈಗ ಸಂತನಾಗಿ ಪರಿವರ್ತಿತನಾಗಿರಬಾರದು ?" ಎಂದು ವಾದ ಶುರುಮಾಡಿದ. ಪ್ರತಿವಾದಿ-ಭಯಂಕರ, ಕಟ್ಟಾ ವಿಚಾರವಾದಿ ವಿನಾಯಕ ಈ ಅವಕಾಶವನ್ನು ಬಿಟ್ಟಾನೆಯೇ ? ಹೀಗಾಗಿ ವಿನಾಯಕ ನಿರ್ಮಲಕುಮಾರರ ವಾದ ಮೆಲುದನಿಯಲ್ಲಿ ಶುರುವಾಗಿ, ಅವರ ಗಂಟಲಲ್ಲಿ ಉಳಿದಿದಿದ್ದ ತೀರ್ಥದ ಪಶೆಯ ದೆಶೆಯಿಂದಾಗಿ ಬಹು ಬೇಗ ದೊಡ್ಡದನಿಗೆ ಭಡ್ತಿ ಪಡೆಯಿತು. ಇನ್ನು ಹೀಗೆ ಬಿಟ್ಟರೆ ಇವರ ವಾದ ಕೇಳಿ, ಬ್ರದರ್ ಸೀನನ ಶಿಷ್ಯರು ಬಂದು ನಮ್ಮ ಬೆಂಡೆತ್ತುವುದು ಖರೆ ಎಂದು ನಾನು ಇಬ್ಬರನ್ನು ಸಮಾಧಾನಿಸಿದೆ.
ಅಷ್ಟರಲ್ಲಿ ’ಬ್ರದರ್ ಸೀನು’ ಅರ್ಥಾತ್ ’ಸಹೋ. ಸೀನು’ ಉರ್ಫ್ ’ಎಣ್ಣಿ ಸೀನ’ ವೇದಿಕೆಯ ಮೇಲೆ ಬಂದ. ಮೊದಲು ಎಲ್ಲ ಜನರಿಗೆ ಕೈ ಮೇಲೆತ್ತಿ ಪ್ರಾರ್ಥಿಸಲು ಹೇಳಿದ. ಹಿನ್ನೆಲೆಯಲ್ಲಿ ಬ್ಲೆಸ್ ಡ್ ಬಿ ದಿ ನೇಮ್ ಆಫ್ ಲಾರ್ಡ್ ಎಂಬ ಪ್ರಾರ್ಥನೆ ಮೆಲುದನಿಯಲಿ ಬರತೊಡಗಿತು. ಪ್ರಾರ್ಥನೆ ಮುಗಿದ ನಂತರದ ಕಾರ್ಯಕ್ರಮ ಉಪದೇಶ. ಎಣ್ಣಿ ಸೀನ ಅಮೇರಿಕನ್ ಅಸೆಂಟಿನಲ್ಲಿ ಇಂಗ್ಲೀಷಿನಲ್ಲಿ ಆವೇಶಭರಿತ ಉಪದೇಶ ಹೇಳುವುದು, ಅವನ ಪಕ್ಕ ನಿಂತಿದ್ದ ಇನ್ನೊಬ್ಬ, ಅದನ್ನು ಅದೇ ಆವೇಶದಲ್ಲಿ ಕನ್ನಡದಲ್ಲಿ ಅನುವಾದಿಸುವುದು ಶುರುಮಾಡಿದರು. ಅದನ್ನು ನೋಡಿ, ಆ ದಿನಗಳಲ್ಲಿ ವಿನಾಯಕನ ಪ್ರಭಾವದಿಂದ ನಾಸ್ತಿಕತೆಯ ದೀಕ್ಷೆಯಲ್ಲಿದ್ದ ನಾನು ನಿಧಾನವಾಗಿ ಸಂದೇಹವಾದಿಯಾಗತೊಡಗಿದೆ. ಬಹುಶಃ ಹತ್ತನೆ ತರಗತಿಯೂ ಪಾಸಾಗದ, ಪೋಲಿ ತಿರುಗಿಕೊಂಡಿದ್ದ ಎಣ್ಣಿ ಸೀನ, ಬ್ರದರ್ ಸೀನುನೆಂದು ಗೆಟಪ್ಪು ಬದಲಾಯಿಸಿದ ತಕ್ಷಣ ಅಷ್ಟು ಅಸ್ಖಲಿತ ಇಂಗ್ಲೀಷು ಮಾತನಾಡುವುದು, ಭಗವಂತನ ಕೃಪೆ ಇಲ್ಲದಿದ್ದರೆ ಹೇಗೆ ಸಾಧ್ಯ ? ಅದಕ್ಕಿಂತ ಮುಖ್ಯವಾಗಿ, ಅವನ ಅನುವಾದಕ ಈ ಬೆಂಗಳೂರಿನ ಗಾಳಿ ಕುಡಿದೂ, ಅಷ್ಟು ಶುದ್ಧ ಕನ್ನಡ ಮಾತನಾಡುವುದು ಪವಾಡವಲ್ಲವೇ ? ನಮ್ಮ ಹಿರಿಯರೂ ’ಭಗವಂತನ ಕೃಪೆಯಿದ್ದರೆ ಮೂಕನೂ ವಾಚಾಳಿಯಾಗಬಲ್ಲನು, ಕಾಲಿಲ್ಲದವನು ಬೆಟ್ಟ ಹಾರಬಲ್ಲನು’ ಎಂದು ಹೇಳಿಲ್ಲವೇ ? ಆದ್ದರಿಂದ ಈ ಬ್ರದರ್ ಸೀನುವಿಗೆ ದೈವಸಾಕ್ಷಾತ್ಕಾರವಾಗಿದೆ ಎಂದು ನಾನು ನಂಬಿ, ಬ್ರದರ್ ಸೀನುವಿನ ಶಬ್ದಗಳಲ್ಲಿ "ಬಿಲೀವರ್" ಆಗಿ "ಕನ್ವರ್ಟ್" ಆದೆ.
ನನ್ನ ಬದಲಾದ ನಿಷ್ಠೆಯ ವಾಸನೆ ನನ್ನ ಪಕ್ಕ ನಿಂತಿದ್ದ ವಿನಾಯಕನಿಗೆ ಬಡಿಯಿತು ಅನಿಸುತ್ತೆ. ಅವನು ನನ್ನ ಕಿವಿಯ ಹತ್ತಿರ ಬಾಯಿ ತಂದು ಹೇಳಿದ "ಈ ಸೀನ ಎಂಥಾ ಪಾಕಡಾ ಆಸಾಮಿ ನೋಡು.. ಆ ಬೆಣ್ಣಿ ಹೀನನ ಪ್ರವಚನದ ಸಿಡಿ ಹಾಕಿ ಅದಕ್ಕೆ ಲಿಪ್ ಸಿಂಕ್ ಮಾಡ್ತಾ ಇದಾನೆ. ಕನ್ನಡದಲ್ಲಿ ಅನುವಾದ ಮಾಡುವುವನದೂ ಅದೇ ಕೇಸು. ಒಟ್ಟಿನಲ್ಲಿ ಈ ಕಳ್ ನನ್ ಮಕ್ಳು ಇಡೀ ಕಾರ್ಯಕ್ರಮವನ್ನು ಮೊದಲೆ ಪ್ರ್ಯಾಕ್ಟೀಸುಮಾಡಿ, ಪ್ರಿ-ರೆಕಾರ್ಡೆಡ್ ದನಿಗೆ ತುಟಿ ಅಲ್ಲಾಡಿಸ್ತಾ ಇದಾರೆ" ಎಂದು ನನ್ನನ್ನು ಮತ್ತೆ ನಾಸ್ತಿಕತೆಗೆ ಎಳೆಯತೊಡಗಿದ. ಸ್ವಲ್ಪ ತಡೆದು ನಾನಿನ್ನು ಅವನ ವಾದವನ್ನು ಪೂರ್ತಿ ಒಪ್ಪಿಲ್ಲವೆಂದು "ನೋಡ್ತಾ ಇರು, ಆವಾಗ ಆವಾಗ ಸೀನನ ತುಟಿ ಅಲ್ಲಾಡದಿದ್ದರೂ ದನಿ ಪೂರ್ತಿ ಕೇಳುತ್ತೆ. ಆ ದನಿಯನ್ನು ಸೀನ ತನ್ನ ಬಾಯಿಂದ ಅಲ್ಲದೇ, ಬುಡದಿಂದ ತಗಿತಾನೆ ಅಂತಿಯಾ ? What do you think – there is a mike in his pant as wel ?" ಎಂದು ಒಂದು ಕ್ಷುದ್ರ ನಗೆ ಬೀರಿದ. ಅಷ್ಟರಲ್ಲಿ ಅದನ್ನು ಗಮನಿಸಿದ್ದ ನಾನು ವಿನಾಯಕನ ಜೋಕಿಗೆ ನಗೆ ತಡೆಯಲಾರದೆ ಕಿಸಕ್ಕನೆ ನಕ್ಕೆ. ನನ್ನ ಇನ್ನೊಂದು ಪಕ್ಕ ನಿಂತಿದ್ದ ನಿರ್ಮಲಕುಮಾರನಿಗೆ ನಾನು ನಕ್ಕದ್ದು ಸರಿಬರಲಿಲ್ಲ. ನನ್ನ ಕಾಲನ್ನು ಬಲವಾಗಿ ತುಳಿದು, ತುಟಿಯ ಮೇಲೆ ಬೆರೆಳಿಟ್ಟು ಸುಮ್ಮನಿರುವಂತೆ ಸೂಚಿಸಿದ.
ಇಷ್ಟು ನಡೆದಿರುವಾಗ ಎಣ್ಣಿ ಸೀನನ ದೈವಿ ಚಿಕಿತ್ಸೆ ಶುರುವಾಯಿತು. ಮೊದಲು ಒಬ್ಬ ಕುರುಡ ಎಂದು ಹೇಳಿಕೊಂಡು ವೇದಿಕೆಯ ಮಲೆ ಬಂದ. ಸೀನ ಅವನ ಕಣ್ಣು ಮುಚ್ಚಿಸಿ ಅವನಿಂದ ಪವಿತ್ರ ಪ್ರಾರ್ಥನೆಯನ್ನು ಹೇಳಿಸಿ, ಅವನ ಮುಂದೆ ದೇವರ ಪಟ ಒಂದನ್ನು ಹಿಡಿದು "ನಿಧಾನ, ನಿಧಾನ ಎಂದು ಹೇಳುತ್ತಾ" ಅವನ ಕಣ್ಣು ತೆಗೆಸಿದ. ಕಣ್ಣು ತೆರೆದ ಆ ಕುರುಡ, ದೇವರ ಫೋಟೊವನ್ನು ನೋಡಿ "ಸ್ವಾಮಿ, ಸ್ವಾಮಿಯೇ, ನನಗೆ ಕೊನೆಗೂ ಕಣ್ಣು ಕೊಟ್ಟೆ" ಎಂದು ಜಿಗದಾಡತೊಡಗಿದ. ಎಣ್ಣೆ ಸೀನನ ಹತ್ತಿರ ನಿಂತಿದ್ದ ಇನ್ನೊಬ್ಬನೂ ಜಿಗಿಜಿಗಿದು ಚಪ್ಪಾಳೆ ತಟ್ಟತೊಡಗಿದ. ಎಣ್ಣಿ ಸೀನ ಮಾತ್ರ "ಅದೇನ್-ದೊಡ್ಡ-ದಗದ" ಭಾವವನ್ನು ಮುಖದ ಮೇಲೆ ತಂದುಕೊಂಡು ಮುಗುಳುನಗುತ್ತಾ ನಿಂತಿದ್ದ. ಮುಂದಿನ ಚಿಕಿತ್ಸೆ ಒಬ್ಬ ಮೂಕನದು. ಸೀನನ ಚಿಕಿತ್ಸೆಯಾದ ನಂತರ ಮೂಕ, ಎಣ್ಣಿ ಸೀನ ಹೇಳಿಸಿದ ದೇವರ ಹಿರಿಮೆಯನ್ನು ಸ್ಪಷ್ಟವಾಗಿ ಉಚ್ಚರಿಸಿದ. ವಿನಾಯಕ ಅದನ್ನು ನೋಡಿ "ಮೂಕನ ಯಾಕ್ಟಿಂಗು ಅಡ್ಡಿ ಇಲ್ಲ, ಆದರೆ ಆ ಕುರುಡನದು ತೀರ ಓವರ್ ಯಾಕ್ಟಿಂಗು" ಎಂದು ಸರ್ಟಿಫಿಕೇಟ್ ಕೊಟ್ಟ. ಅಲ್ಲಿ ನಡೆಯುತ್ತಿರುವುದು ಪೂರ್ತಿ ಢೋಂಗಿ ಪ್ರಹಸನ ಎಂದು ನನಗೂ ಮನವರಿಕೆಯಾಯಿತು. ಹೊರಗಡೆ ಮಳೆಯೂ ನಿಂತಿತ್ತು. ಆದ್ದರಿಂದ ಇನ್ನೇನು ನಾವು ಜಾಗ ಖಾಲಿಮಾಡೋಣ ಎಂದರೆ, ನಮ್ಮ ಇನ್ನೊಬ್ಬ ರೂಂಮೇಟು ನಿರ್ಮಲಕುಮಾರನೇ ಕಾಣ್ತಾ ಇರಲಿಲ್ಲ. ತೀರ್ಥ ಹಾಕಿದಾಗ ಮೂತ್ರ ಹೆಚ್ಚು ಎನ್ನುವ ಅನುಭವ ಜ್ಞಾನವಿದ್ದುದರಿಂದ, ಅವನು ಎಲ್ಲೋ ನಿಸರ್ಗದ ಕರೆಗೆ ಓಗೊಟ್ಟು ಹೋಗಿರಬೇಕೆಂದು ಕಾಯತೊಡಗಿದವು.
ನಿರ್ಮಲಕುಮಾರ ನಿಸರ್ಗದ ಕರೆಗೆ ಓಗೊಟ್ಟು ಹೋಗಿರಲಿಲ್ಲ, ಬದಲು ತನ್ನ ಮನದ ಕರೆಗೆ ಓಗೊಟ್ಟು ಹೋಗಿದ್ದ. ಶತ-ಶತಮಾನಗಳಿಂದ ತನಗೆ ಕಾಡುತ್ತಿರುವ ಹಲ್ಲುನೋವಿಗೆ ಬ್ರದರ್ ಸೀನನಲ್ಲಿಯೇ ರಾಮಬಾಣವಿದೆ ಎಂದು ತನ್ನ ಮನಸ್ಸು ಹೇಳಿದ್ದಕ್ಕೆ, ನಿರ್ಮಲ್ ಕುಮಾರ ವೇದಿಕೆಯ ಮೇಲೆ ಹೋಗಿ ಸೀನನ ಮುಂದೆ ನಿಂತು ತನ್ನ ಸಮಸ್ಯೆ ಹೇಳಿಕೊಂಡ. ಸೀನನಿಗೂ ಅವನ ಶಿಷ್ಯ ಬಳಗಕ್ಕೂ, ಸ್ಕ್ರಿಪ್ಟಲ್ಲಿ ಇರದ ಈ ಸೀನ್ ಎದುರಾದದ್ದಕ್ಕೆ ಗಲಿಬಿಲಿಯಾಯಿತು. ಸೀನನೇ ಮೊದಲು ಸುಧಾರಿಸಿಕೊಂಡು, ನಿರ್ಮಲನಿಗೆ "ಸ್ವಾಮಿ, ನಾನಿನ್ನು ದೈವೀ ಚಿಕಿತ್ಸೆ ಮುಖಾಂತರ ಹಲ್ಲುನೋವು ಕಡಿಮೆ ಮಾಡುವುದು ಕಲಿತುಕೊಂಡಿಲ್ಲ" ಎಂದು ಹೇಳುತ್ತಲೆ, ಅವನ ಶಿಷ್ಯರು ನಿರ್ಮಲನ ಬಗಲಲ್ಲಿ ಕೈಹಾಕಿ ವೇದಿಕೆಯಿಂದ ಇಳಿಸಿಕೊಂಡು ಹೋದರು.
ಈಗ ಬರುತ್ತಾನೆ, ಈಗ ಬರುತ್ತಾನೆ ಎಂದು ನಿರ್ಮಲನಿಗೆ ನಾವು ಕಾದದ್ದೇ ಬಂತು, ಅವನೇನು ಬರಲಿಲ್ಲ. ನಾನು, ವಿನಾಯಕ ಅವನನ್ನು ಎಲ್ಲಾ ಕಡೆ ಹುಡುಕಿ, ಹುಡುಕಿ, ಕೊನೆಗೆ ಅವನಿಲ್ಲದೇ ಮನೆಗೆ ಬಂದೆವು.

ಬೆಳಿಗ್ಗೆ ಎದ್ದಾಗ, ರಾತ್ರಿ ಯಾವುದೋ ಘಳಿಗೆಯಲ್ಲಿ ಬಂದು ಮಲಗಿದ್ದ ನಿರ್ಮಲಕುಮಾರನ ವಿರೂಪಗೊಂಡ ಮುಖದರ್ಶನವಾಯಿತು. ದೇವರು ದಯಾಮಯಿ, ಕರುನಾಳು ಇರಬಹುದಾದರೂ ಅವನ ಭಕ್ತರು ಹಾಗಿರಬೇಕೆಂದು ಕಾನೂನೇನು ಇಲ್ಲ. ಸೀನನ ಶಿಷ್ಯರು ನಿರ್ಮಲಕುಮಾರನಿಗೆ ಸರಿಯಾಗಿಯೇ ತದಕಿ ಕಳುಹಿಸಿದ್ದರು. ಉದ್ದೇಶವಿಲ್ಲದೇ, ಒಂದು ಉಪಕಾರವನ್ನೂ ಕೂಡ ಮಾಡಿದ್ದರು. ಅವರ ಹೊಡೆತಕ್ಕೆ ನಿರ್ಮಲಕುಮಾರನ ಹುಳುಕು ಹಲ್ಲು ಬಿದ್ದು ಹೋಗಿ, ಹಲ್ಲುನೋವು ಪರಿಹಾರವಾಗಿತ್ತು - ಯಾವುದೇ ದೈವೀ ಚಿಕಿತ್ಸೆ ಇಲ್ಲದೆ !!

( ೧. ಬೆಣ್ಣಿಹೀನ (Benny Hinn) ಅಮೇರಿಕದ ಒಬ್ಬ ಸ್ವಯಂ ಘೋಷಿತ ದೇವಮಾನವ. ದೈವೀ ಚಿಕಿತ್ಸೆಯಿಂದ ಹತ್ತು-ಹಲವು ರೋಗಗಳನ್ನು ಗುಣಮಾಡಿದ್ದೇನೆಂದು ಹೇಳಿಕೊಳ್ಳುತ್ತಾನಾದರೂ, ಅದಕ್ಕೆ ನಂಬಲರ್ಹ ಸಾಕ್ಷಿಗಳಿಲ್ಲ. ನಮ್ಮ ಬೆಂಗಳೂರಿಗೂ ಬಂದು ದೈವೀ ಚಿಕಿತ್ಸೆಯ ಕಾರ್ಯಕ್ರಮ ಮಾಡಿಹೋಗಿದ್ದ.
೨. ಈ ಯುನಿಕೋಡಿನಲ್ಲಿ ೩ ಅಂತ ಅಕ್ಷರದಲ್ಲಿ ಬರೆದರೆ "ಮೂರು" ಅಂತ ಕಾಣಿಸ್ತಾ ಇದೆ.. ಅದಕ್ಕೆ ಅಂಕಿಯಲ್ಲಿಯೇ ಬರೆದಿದ್ದೇನೆ. ಅಲ್ಲಲ್ಲಿ "mU" ಎನ್ನುವುದು "ಮೂ" ಎಂದು ಕಾಣಿಸ್ತಾ ಇರಬಹುದು.
೩.ಈ ಲೇಖನ ಸ್ಪಂದನ ೦೯ ರಲ್ಲಿ ಮೊದಲು ಪ್ರಕಟವಾಗಿದೆ -ಸ್ಪಂದನ-೦೯ )

punಚಾಮೃತ

2009-11-25T08:08:00.000-08:00

¿ ದೇವರು ಸುಡುಗಾಡು, ಕಗ್ಗಾಡು, ಬೆಂಗಾಡು ಎಲ್ಲೆಲ್ಲಿಯೂ ಇದ್ದಾನೆ..
✔ ಹೌದು ಮತ್ತೆ.. ನೀವೇ ನೋಡಿ ಸುಡು"ಗಾಡು", ಕಗ್"ಗಾಡು", ಬೆಂ"ಗಾಡು" !!

punಚಾಮೃತ

2009-11-20T07:38:00.000-08:00

Angel Face ಎಂದರೆ :

ಮತ್ತು ಎಂಜಲ್ ಫೇಸ್ ಎಂದರೆ :

punಚಾಮೃತ

2009-11-11T08:04:00.000-08:00

ಹಾಯ್ ಎಂದರೆ high ಕ್ಲಾಸು, ಲೋ ಎಂದರೆ low ಕ್ಲಾಸು..

ಸ್ಪಂದನ-೦೯

2009-11-08T09:20:00.000-08:00

ಸ್ಪಂದನ ಇ-ಮ್ಯಾಗಝೀನಿನ ೨೦೦೯ ರ ಸಂಚಿಕೆ ಇಲ್ಲಿದೆ: http://docs.google.com/fileview?id=0B5j7ch9t3ZMdM2Q2MmQyYzktY2Y5YS00ZTc0LWI0OGUtMzUzNzQxNzZkNGRm&hl=en

"ಅಂತರಂಗ"ದಲ್ಲಿ ಕಾರಂತಜ್ಜ...

2009-10-09T09:38:00.000-07:00

(ಇವತ್ತು ಕಾರಂತಜ್ಜನ ಹುಟ್ಟುಹಬ್ಬ. ನಾನು ಚಿಕ್ಕವನಿದ್ದಾಗ ಕಾರಂತಜ್ಜನೊಂದಿಗೆ ನಡೆಸಿದ ಪತ್ರವ್ಯವಹಾರದ ಸವಿ ನೆನಪು ಇಲ್ಲಿದೆ:)

ನಾನಾಗ ಬಹುಶಃ ಎಂಟನೆ ತರಗತಿಯಲ್ಲಿದ್ದೆ. ಪಾಲಿಮರ್ಗಳ ಬಗ್ಗೆ ಕುತೂಹಲಗೊಂಡು, ಅದರ ಬಗ್ಗೆ ಏನೋ ಪ್ರಶ್ನೆ ಕೇಳಿ ಕಾರಂತಜ್ಜಗೆ ಒಂದು ಪತ್ರಬರೆದಿದ್ದೆ. ಅದಕ್ಕೆ ಕಾರಂತಜ್ಜನ ಉತ್ತರ :
ಉತ್ತರ ಓದಿ , ನಿರಾಶನಾಗಿ ನಾನು ಇನ್ನೊಂದು ಪತ್ರ ಬರೆದಿದ್ದೆ. ಅದಕ್ಕೆ ಬಂದ ಉತ್ತರ ಒಂಚೂರು ದೊಡ್ಡದಿತ್ತು :

ಅಂದ ಹಾಗೆ ಅಕ್ಟೋಬರ್ ೧೦ ಕಾರಂತಜ್ಜನ ಹುಟ್ಟು ಹಬ್ಬ ಅಂತೆ ಗೊತ್ತಾಗಿದ್ದು, ಮತ್ತು ಕಾರಂತಜ್ಜನ ಈ ಪತ್ರಗಳನ್ನು ಇಲ್ಲಿ ಹಾಕಲು ಸ್ಪೂರ್ತಿ ಬಂದದ್ದು ಕಾರಂತಜ್ಜನ ಪತ್ರ ಲೇಖನದ ಬಗ್ಗೆ ಕಳೆದ ವಾರದ ಸಾಪ್ತಾಹಿಕ ವಿಜಯದಲ್ಲಿ ಬಂದ ಲೇಖನ
..

punಚಾಮೃತ

2009-10-07T09:02:00.000-07:00

¿ ಗಣೇಶನಿಗೆ ಏಕದಂತ ಎಂದು ಹೆಸರು ಹೇಗೆ ಬಂತು ?
✔ ಗಣೇಶ ಒಮ್ಮೆ ಚೌತಿಯ ವಿಸಿಟ್ ಮುಗಿಸಿಕೊಂಡು ಇಲಿಯ ಮೇಲೆ ಕೈಲಾಸಕ್ಕೆ ಹೊರಟಿದ್ದ. ದಾರಿಯಲ್ಲಿ ಒಂದು ಹಾವು ಕಂಡು ಇಲಿ ಗಣೇಶನನ್ನು ಬೀಳಿಸಿ ಓಡಿ ಹೋಯಿತು. ಬಿದ್ದ ಗಣೇಶನನ್ನು ನೋಡಿ ಮುಗಿಲಲ್ಲಿದ್ದ ಚಂದ್ರ ನಕ್ಕ. ಅದರಿಂದ ಸಿಟ್ಟಿಗೆದ್ದ ಗಣೇಶ ತನ್ನ ಬಲ ದಂತವನ್ನು ಮುರಿದು ಚಂದ್ರನಿಗೆ ಎಸೆದ. ಮುರಿದ ದಂತದಿಂದಾಗಿ ಗಣೇಶನಿಗೆ ache ಆಗ್ತಾ ಇದ್ದದ್ದರಿಂದ ಅವನಿಗೆ ’ache-ದಂತ’ ಎಂದು ಹೆಸರಾಯಿತು..

'ಚಿತ್ರ'ಹಿಂಸೆ

2009-10-06T08:01:00.000-07:00

ಗದುಗಿನ ಒಂದು ಅಂಗಡಿಯಲ್ಲಿ ಬಾಸುಂಡೆಗಳು ಸಿಗುತ್ತವೆ !!

punಚಾಮೃತ

2009-09-17T08:03:00.000-07:00

¿ ಊರಿಗೆ ಬುದ್ಧಿ ಹೇಳುವ ವ್ಯಕ್ತಿಯೊಬ್ಬರು ಹಳ್ಳಿಯೊಂದರ ಗೋಮಾಳ ನುಂಗಿದ್ದಾರೆ..
✔ ಅವರಪ್ಪ- ಅಮ್ಮ ಅವರಿಗೆ 'ದನಕರನ್ ' ಎಂದು ಹೆಸರಿಡಬೇಕಿತ್ತು..

punಚಾಮೃತ

2009-09-14T19:24:00.000-07:00

ಈ ಪ್ರಕಾಶನ ಸಂಸ್ಥೆಯ ಚಿನ್ಹೆಯಲ್ಲಿ ಎಂಥ ವಿಪರ್ಯಾಸವಿದೆ ನೋಡಿ :

ಹೆಸರು "ಒಂಟಿ" ದನಿ, ಚಿತ್ರದಲ್ಲಿ ಇರೋದು ಮಾತ್ರ ನಾಯಿಯೋ, ನರಿಯೋ...

punಚಾಮೃತ

2009-09-10T09:37:00.000-07:00

¿ ಈಗ ಜೆಟ್ ಏರ್ ವೇಸ್ ನಲ್ಲಿ ನಡೆದಿರುವ ವಿವಾದಕ್ಕೆ ಏನೆನ್ನಬಹುದು ?
✔ 'Jet' ಪಟಿ

punಚಾಮೃತ

2009-08-06T09:15:00.000-07:00

¿ SIM ಇಲ್ಲದ ಮೋಬೈಲಿಗೆ ಏನೆನ್ನಬೇಕು ?
✔ ನಿಸ್ಸೀಮ್ ( = ನಿಃ + SIM , ಒಂದು ರೀತಿಯ ಲೋಪ ಸಂಧಿ)

ನಾನು, ನನ್ನ ರೂಂಮೇಟುಗಳು ...

2009-07-10T10:23:00.000-07:00

ನಾನು, ನನ್ನ ರೂಂಮೇಟುಗಳು ಸರಣಿಯ ಮತ್ತೊಂದು ಮಣಿ TKC ಯಲ್ಲಿ ಪ್ರಕಟವಾಗಿದೆ : http://thatskannada.oneindia.in/column/humor/2009/0710-myself-my-roommates-and-a-crime-story.html

punಚಾಮೃತ

2009-06-27T02:35:00.000-07:00

ಗೋಸ್ಟಾ ಗಣೇಶ ಸ್ವಂತ ಬ್ಯಾನರಿನಲ್ಲಿ ನಿರ್ಮಿಸುತ್ತಿರುವ ಮುಂದಿನ ಸಿನೆಮಾದ ಕತೆಯಲ್ಲಿ ನಾಯಕ ಕನ್ನಡಿಗನಾದರೆ ನಾಯಕಿ ಮಲೆಯಾಳಿ ಅನಿಸುತ್ತೆ.. ಯಾಕಂದಿರಾ ? ಅದರ ಹೆಸರೇ ಹಾಗಿದೆ - 'ಮಲೆಯಾಳಿ ಜೊತೆಯಲಿ '-Maleyali Jotheyali.

punಚಾಮೃತ

2009-06-26T07:28:00.000-07:00

¿ ಕನಿಷ್ಟ ಐದು ಕಾಲಿರುವ ಪ್ರಾಣಿ ಯಾವುದು ?
✔ ಐಟಿ ಕಂಪನಿಯ ಮ್ಯಾನೆಜರು - ಬೆಳಿಗ್ಗೆ ೮:೦೦-೮:೩೦ ಜಪಾನಿನ ಗ್ರಾಹಕರೊಂದಿಗೆ ಕಾಲ್, ೮:೩೦-೯:೦೦ ಕೋರಿಯಾದಗ್ರಾಹಕರೊಂದಿಗೆ ಕಾಲ್, ಮಧ್ಯಾಹ್ನ ೦೨:೦೦-೦೨:೩೦ ಕಂಪನಿಯ ಯುಕೆ ಶಾಖೆಯ ಜೊತೆ ಕಾಲ್, ೦೩:೦೦-೦೩:೩೦ ಫ್ರಾನ್ಸಿನ ಗ್ರಾಹಕರೊಂದಿಗೆ ಕಾಲ್ ಸಂಜೆ ೦೭:೦೦-೦೭:೩೦ ಕಂಪನಿಯ ಯುಎಸ್ ಶಾಖೆಯ ಜೊತೆ ಕಾಲ್ !!

punಚಾಮೃತ

2009-06-25T10:14:00.000-07:00

¿ Laptop ಬಹಳ ಬಿಸಿಯಾದರೆ.. ?
✔ Lap ತಾಪ !!

punಚಾಮೃತ

2009-06-24T04:00:00.000-07:00

¿ ಕಂಗ್ಲೀಷಿನಲ್ಲಿ ಗೆಳೆಯನ ಮಗನನ್ನು ಏನೆನ್ನುತ್ತಾರೆ ?
✔ Buddy ಮಗ !!

punಚಾಮೃತ

2009-06-23T03:28:00.000-07:00

ಈ ಅಟೋದ ಮೇಲಿನ punಡಿತ್ಯ ಪ್ರದರ್ಶನವನ್ನು ನಾನಂತು ಮೆಚ್ಚಿಕೊಂಡೆ:

ಮಾಲ್ ನಲ್ಲಿ ರೊಟ್ಟಿ ಅಂಗಡಿ ಕಿಟ್ಟಪ್ಪ ..

2009-06-22T03:07:00.000-07:00

ಮಡಿವಾಳದ ಟೋಟಲ್ ಮಾಲಿನಲ್ಲಿ "ಉತ್ತರಕರ್ನಾಟಕ ವಿಶೇಷ ತಿಂಡಿ/ಅಡುಗೆ"ಗಳ ಅಂಗಡಿ ಶುರುವಾಗಿದೆ. ಇದು ಚಿಕ್ಕ ಅಂಗಡಿಯಾಗಿದ್ದು, ಕಡಕ್ ರೊಟ್ಟಿ , ಚಟ್ನಿ, ವಿವಿಧ ಸಿಹಿ ತಿಂಡಿಗಳು ದೊರೆಯುತ್ತವೆ- ಬಿಸಿ ರೊಟ್ಟಿ, ಚಪಾತಿ ಇನ್ನೂ ದೊರೆಯುತ್ತಿಲ್ಲ.

ಆದರೂ, ಇದು ಜೋಳದ ರೊಟ್ಟಿ ಮ್ಯಾಕ್ ಡೋನಾಲ್ಡಿಗೆ ಸಡ್ಡು ಹೊಡೆಯುವ ದಿನಗಳಿಗೆ ಮುನ್ನುಡಿಯಾಗಲಿ ಎಂದು ಆಶಿಸೋಣ !!

ನಾನು , ನನ್ನ ರೂಂಮೇಟುಗಳು

2009-06-20T21:16:00.000-07:00

ನನ್ನ "ನಾನು , ನನ್ನ ರೂಂಮೇಟುಗಳು ಮತ್ತು ಎಪ್ಫೆಮ್"' ಬರಹದ sequel ಇಂದಿನ ವಿಜಯ ಕರ್ನಾಟಕದ ಪುರವಣಿಯಲ್ಲಿ ಬಂದಿದೆ..

punಚಾಮೃತ

2009-06-01T09:55:00.000-07:00

¿ ತೇಜಮ್ಮನವರು ಈ ಸಲ ಚುನಾವಣೆಲಿ ಸೋತಿದ್ದು ಯಾಕೆ ?
✔ ಯಾಕಂದ್ರೆ ಅವರದು ಈ ಸಲ 'ಸೋಲೋ' ಪರ್ಫಾರನ್ಸ್ !!

punಚಾಮೃತ

2009-05-27T18:55:00.001-07:00

ಹಿಂದಿನ ರಾಜಕಾರಣಿಗಳ ಹೋರಾಟ ಒಂದು causeಗಾಗಿ ಇರುತ್ತಿತ್ತು, ಇಂದಿನವರದು ಬರೀ ಕಾಸಿಗಾಗಿ !!

punಚಾಮೃತ

2009-05-06T19:09:00.000-07:00

¿ ಪುಂಡಲೀಕ ಶೇಟ್ : ಹುಬ್ಬಳ್ಯಾಂವ :: ಮುಮ್ಮುಟ್ಟಿ : ?
✔ 'ಮಲ'ಬಾರದವ !

punಚಾಮೃತ

2009-04-24T01:35:00.000-07:00

ಐಪಿಎಲ್ನಲ್ಲಿ ತಮ್ಮ ಸತತ ಸೋಲಿನ ಸ್ಥಿತಿಗೆ ಮರಳಿ ಬಂದಿರುವ ಬಿ.ಆರ್.ಸಿ ತಂಡಕ್ಕೆ Raw L (ಬೋರ್ಡ್) ಚಾಲೆಂಜರ್ಸ್ ಅಂತ ಹೆಸರಿಡ ಬೇಕು ಅನಿಸುತ್ತೆ !!

punಚಾಮೃತ

2009-04-23T10:25:00.000-07:00

ಫೀ ಹೆಚ್ಚಿದೆ ಮಾಡಿದರೆ ಆ ಕಾಲೇಜಿಗೆ 'ಅಮೌಂಟ್ ' ಕಾರ್ಮೆಲ್ ಕಾಲೇಜು ಎನ್ನಬಹುದು !

punಚಾಮೃತ

2009-04-18T03:58:00.000-07:00

ಈಗ ರಾಜಕಾರಣಿಗಳು ತಾವು ತಾವಾಗೆ RoadShow ಮಾಡ್ತಾ ಇದ್ದಾರೆ, ಮಳೆಗಾಲ ಬಂದು ಹೋದ ಮೇಲೆ ನಾವು Road ( ರಸ್ತೆ) ಎಲ್ಲಿದೆ Show( ತೋರಿಸಿ) ಅನ್ನಬೇಕಗುತ್ತೆ !

ಯಾದ ವಶೇಮ್ : ನೂರು ಸಾವಿರ ಸಾವಿನ ನೆನಪು

2009-03-17T10:06:00.000-07:00

ಇದು ನೇಮಿಚಂದ್ರರ ಐತಿಹಾಸಿಕ ಸತ್ಯ ಆಧಾರಿತ ಕಾದಂಬರಿ. ಹಿಟ್ಲರ್‌ನ ಕಾಟತಾಳಲಾರದೇ ಜರ್ಮನಿಯಿಂದ ಭಾರತಕ್ಕೆ ಬಂದ ಯಹೂದಿ ಕುಟುಂಬದ ಹ್ಯಾನಾ ಎಂಬ ಹುಡುಗಿ ಬೆಂಗಳೂರಿನಲ್ಲಿ ಅನಿತಾ ಆಗಿ ಬೆಳೆದು, ಕೊನೆಗಾಲದಲ್ಲಿ ತನ್ನ ಕುಟುಂಬದ ಇತರ ಸದಸ್ಯರನ್ನರಸಿ ಯುರೋಪು, ಅಮೇರಿಕ, ಇಸ್ರೇಲಿಗೆ ಹೋಗುವುದೇ ಇದರ ಕತೆ. ನಾನು ಮೊದಲ ಸಲ ಈ ಪುಸ್ತಕದ ಬಗ್ಗೆ ಕೇಳಿದಾಗ ಇದೆಲ್ಲೋ ಪರದೇಶದಲ್ಲಿ ನಡೆಯುವ ಗೋಳಿನ ಕತೆ ಅಂದುಕೊಂಡಿದ್ದೆ. ಆದರೆ ಇದರಲ್ಲಿ ಮೊದಲರ್ಧ ಕತೆ ಭಾರತದಲ್ಲಿಯೇ, ಬೆಂಗಳೂರಿನಲ್ಲಿಯೇ, ನಡೆಯುತ್ತೆ. ಇನ್ ಫ್ಯಾಕ್ಟ್ ಆ ಭಾಗವನ್ನೇ ನಾನು ಹೆಚ್ಚು ಆನಂದಿಸಿದ್ದೇನೆ.

ಅಂದಿನ ಕಾಲದ ಬೆಂಗಳೂರು-ಮೈಸೂರುಗಳನ್ನು ಲೇಖಕಿ ಕಣ್ಣಿಗೆ ಕಟ್ಟುವಂತೆ ಹೇಳಿದ್ದಾರೆ. ಎಚ್‌ಏಎಲ್ ಕಂಪನಿಯ ಇತಿಹಾಸ ಕತೆಯ ಒಂದು ಭಾಗವಾಗಿ ಬರುತ್ತದೆ, ಬೆಂಗಳೂರಿನ ಸ್ವಾತಂತ್ರ್ಯ ಸಂಗ್ರಾಮದ ಘಟನೆಗಳು, ಮೈಸೂರಿನ ಐತಿಹಾಸಿಕ ಘಟನೆಗಳು ಕತೆಯ ಭಾಗವಾಗಿ ಬರುತ್ತವೆ. ಟೆಕ್ಕಿಗಳಿಗೆ ಕತೆಯೊಂದಿಗೆ ರಿಲೇಟ್ ಆಗಲು ಸ್ವಲ್ಪ ಕಷ್ಟವೆಂದರೆ, ಅದರಲ್ಲಿ ಭಾರತೀಯ ವಿಜ್ಞಾನಮಂದಿರ, ಮುಂದೆ ದೈತ್ಯ ಸಂಸ್ಥೆಗಳಾಗಿ ಬೆಳೆದ ಐಟಿಐ, ಟಿನ್ ಫ್ಯಾಕ್ಟರಿ, ಕಿರ್ಲೋಸ್ಕರ್ ಕಂಪ್ನಿಗಳ ಬಗೆಗೂ ರೆಫೆರೆನ್ಸ್ ಬರುತ್ತವೆ. ಅದಷ್ಟು ಸಾಕಾಗಲ್ಲ ಅಂದರೆ ಒಂದು ಪಿಂಕ್ ಸ್ಲಿಪ್ ಪ್ರಕರಣ ಕೂಡ ಇದೆ!!

ಕತೆಯ ಮೊದಲರ್ಧದಲ್ಲಿ ಕುಂಚಿಟಿಗರ ಮನೆಯ ಸಾಕಷ್ಟು ವಿವರಗಳು ಬರುತ್ತವೆ, ಅವರ ದೇವರು, ಅವರ ನಂಬಿಕೆಗಳು ಇತ್ಯಾದಿ. ಅದಲ್ಲದೇ ಆ ಜನಾಂಗಕ್ಕೆ ಓದುವ ಅನುಕೂಲ ಮಾಡಿಕೊಟ್ಟ ಮೈಸೂರಿನ ಅಲಮೇಲಮ್ಮನವರ ಸ್ಮರಣೆಯೂ ಬರುತ್ತದೆ. ಲೇಖಕಿಯು ಬಹುಷಃ ಹುಟ್ಟಿನಿಂದ ಕುಂಚಿಟಿಗ ಜನಾಂಗದವರು, ಅದಕ್ಕಾಗಿಯೇ ಆ ವಿವರಗಳು ಬಂದಿವೆ. ಹೀಗೆ ಸಾಹಿತ್ಯ ಕೃತಿಗಳಲ್ಲಿ ’ಜಾತಿ’ಯನ್ನು ಎಳೆದು ತರುವುದು ಸರಿಯೇ ? ನನಗೇನು ಅದರಲ್ಲಿ ತಪ್ಪನ್ನಿಸುವುದಿಲ್ಲ. ವಿವಿಧ ಜನಾಂಗ(?)ಗಳ ಜನ ತಮ್ಮ ತಮ್ಮ ಪರಂಪರೆಗಳ ಬಗ್ಗೆ ಬರೆದುಕೊಂಡರೆ, ಉಳಿದವರಿಗೆ ಅದರಿಂದ ಲಾಭವೇ ತಾನೆ ? ಕನ್ನಡ ನಾಡಿನ ವಿವಿಧ ಸಂಪ್ರದಾಯಗಳ ಅರಿವು ಹೊಂದುವುದು ಒಳ್ಳೆಯದೆ.. ಅಂದ ಹಾಗೆ ಜಾತಿ ( ಜನಾಂಗ ಎನ್ನುವುದು ನನಗೆ ಹೆಚ್ಚು ಸರಿ ಅನ್ನಿಸುತ್ತೆ) ಯ ಬಗ್ಗೆ ಈ ಕಾದಂಬರಿಯ ಒಂದು ಪಾತ್ರ ತುಂಬ ಸರಿಯಾದ ಮಾತು ಆಡುತ್ತದೆ - "ಜಾತಿ,ಜನಾಂಗ ಅಂದರೇನು ? ಅದೊಂದು ಗುಂಪು, ಒಂದು ಸಂಕುಲ... ಜಾತಿ ಜನರನ್ನ ಒಡೀದಿದ್ರೆ ಆಯ್ತು, ವಿಷ ಹಂಚದಿದ್ರೆ ಆಯ್ತು."

ಕಾದಂಬರಿಯ ಎರಡನೆ ಭಾಗ ನನಗೆ ಅಷ್ಟೇನು ಹಿಡಿಸಲಿಲ್ಲ. ಅದು ಒಂದು ರೀತಿಯ ಪ್ರವಾಸ ಕಥನ, ಯಹೂದಿಗಳ ಯಾತನೆಯ ಕುರುಹುಗಳಿರುವ ಹಲವು ಸ್ಥಳಗಳ ಪ್ರವಾಸ ಕಥನ. ಕಾಸು ಕೊಟ್ಟು ಪುಸ್ತಕ ಕೊಂಡು, ಅದರಲ್ಲಿ ಇನ್ನೊಬ್ಬರ ಸಂಕಟ ಓದಿ, ನಮ್ಮ ಮನಸನ್ನು ಕಹಿ ಮಾಡಿಕೊಳ್ಳುವುದು ಯಾಕೆ ಎನ್ನುವುದು ನನ್ನ ನಿಲುವು. ಅದರಲ್ಲೂ ಐತಿಹಾಸಿಕ ವಿಷಯಗಳ ಬಗ್ಗೆಯಂತೂ ನನ್ನದು "ಹಿಂದಿನದು ತಗದು, ಹಿತ್ತಲದಾಗ ಅತ್ತರಂತ" ಎಂಬ ತಕರಾರು. ಆದ್ದರಿಂದ ನನಗೆ ಎರಡನೆ ಭಾಗ ಹಿಡಿಸದ್ದು ಸಹಜ.

ತುಸು ಹಿಂಜರಿಕೆಯಿಂದಲೆ, ಈ ಕಾದಂಬರಿಯನ್ನು, ಇತ್ತೀಚೆಗೆ ಬಹು ಚರ್ಚಿತಗೊಂಡ ಇನ್ನೊಂದು ಐತಿಹಾಸಿಕ ಸತ್ಯ ಆಧಾರಿತ ಕಾದಂಬರಿಯೊಂದಿಗೆ ಹೋಲಿಸ ಬೇಕೆನಿಸುತ್ತದೆ. ಕಥನ ಶೈಲಿ, ಪಾತ್ರ ಪೋಷಣೆ(!) ಇತ್ಯಾದಿಗಳ ದೃಷ್ಟಿಯಿಂದ ತುಲನಾತ್ಮಕ(!) ಅಧ್ಯಯನ ಮಾಡಿ (!), ಇದರ ಕಿಮ್ಮತ್ತು ಇಷ್ಟೇ ಎಂದು ಹೇಳುವಷ್ಟು ದೊಡ್ಡವನು ನಾನಲ್ಲ. ಆದರೆ ಈ ಎರೆಡು ಕಾದಂಬರಿಗಳು ಕೊಡುವ ಸಂದೇಶಗಳನ್ನು ನೋಡಿದಾಗ, ಈ ಕಾದಂಬರಿ ನನಗಿಷ್ಟವಾಯಿತು. ಇದರ ಸಂದೇಶ "ಅಲ್ಲೆಲ್ಲೋ ಹಿಂದು ಮುಸ್ಲೀಮರು ಗುದ್ದಾಡಿ ಕೊಳ್ಳಲಿ, ಇನ್ನೆಲ್ಲೋ ಯಹೂದಿ-ಮುಸ್ಲೀಮರು ತಿಕ್ಕಾಡಿ ಕೊಳ್ಳಲಿ, ಇಲ್ಲಿ ಮಾತ್ರ ನಾವು ನೆಮ್ಮzಯಿಂದ ಇರೋಣ" ಅಂತಾದರೆ, ಆ ಕಾದಂಬರಿಯದು "ಅವರ ಮುತ್ತಾತಂದಿರು ನಮ್ಮ ಮುತ್ತಾತಂದಿರ ಮೇಲೆ ಎಸಗಿದ ದೌರ್ಜನ್ಯಕ್ಕೆ ಅವರು ನಮ್ಮ ಕ್ಷಮೆ ಕೇಳಲಿ" ಎಂದೇನೋ ಆಗಿತ್ತು..

ಜರ್ದಾರಿ ಜಗದ್ಗುರುಗಳು..

2009-03-14T02:20:00.000-07:00

¿ ಪಾಕಿಸ್ತಾನದಲ್ಲಿ ಈಗಿನ ಸುಪರ್ ಹಿಟ್ ಹಾಡು ಯಾವುದು?*
✔ "'ಜರ್'ದಾರಿ ಕಾಣದಾಗಿದೆ ರಾಘವೇಂದ್ರನೆ.. "

*conditions apply: ಆ ದೇಶದಲ್ಲಿ ಧಾರ್ಮಿಕ ಕಾನೂನುಗಳು ಜಾರಿಗೆ ಬಂದು, ಹಾಡುಗಳಿಗೆ ನಿಷೇಧವಿಲ್ಲದಿದ್ದರೆ ಮಾತ್ರ !!

ಧಾರವಾಡವೆಂದರೆ...

2009-02-28T22:31:00.000-08:00

punಚಾಮೃತ

2009-02-18T09:11:00.000-08:00

ಬೆಂಬಲಿಸದಿದ್ದರೂ ಶ್ರೀರಾಮ ಸೇನೆ ,
ಹೆಂಡಕ್ಕೆ 'say nay' !

punಚಾಮೃತ

2009-02-17T09:05:00.000-08:00

ಅರೆಬೆತ್ತಲೆ ಚಿತ್ರಗಳನ್ನೇ ಪ್ರಕಟಿಸುವ ಇಂಗ್ಲೀಷು ಪತ್ರಿಕೆಯ ಪುರವಣಿಗೆಗೆ 'items of india' ಅನ್ನಬಹುದು !

punಚಾಮೃತ

2009-02-01T01:04:00.000-08:00

¿ ಯಾವಾಗಲು ಅಂತರ್ ಜಾಲದಲ್ಲಿ ಸರ್ಫ್ ಮಾಡ್ತಾ ಇರೋ ಗೀಳಿಗೆ ಏನೆನ್ನಬಹುದು ?
✔ ಸರ್ಫ್ ದೋಷ !!

punಚಾಮೃತ

2009-01-24T07:01:00.000-08:00

¿ ಬಳೆಗಾರ ಚನ್ನಯ್ಯನಿಗೆ ಮದುವೆ ಸಾಧ್ಯವೇ ಇಲ್ಲ, ಯಾಕೆ ?
✔ ಯಾಕಂದ್ರೆ ಎಲ್ಲ ಹುಡುಗಿಯರೂ ಅವನಿಗೆ *ಕೈ ಕೊಡತಾರೆ *

ಕಾಮಾಲೆ ಕವಿಗಳು.

2009-01-24T06:44:00.000-08:00

ಚಿತ್ರಗೀತೆಗಳನ್ನು ಬರೆಯುವ ಬಹಳಷ್ಟು ಕವಿಗಳು ಕಾಮಾಲೆ ರೋಗದವರಂಬುದು ನನ್ನ ಅನಿಸಿಕೆ. ಕಾಮಾಲೆ ಕಣ್ಣಿಗೆ ಲೋಕವೆಲ್ಲ ಹಳದಿ ಅಂತಾರಲ್ಲಾ ಹಾಗೆ, ಇವರಿಗೆ ಎಲ್ಲಾ ಹಳದಿಯಾಗೆ ಕಾಣುತ್ತೆ ಅನಿಸುತ್ತೆ.

ಯಾರಾದರು ಮನೆಗೆ ವಿಅರ್ಎಲ್ ಬಸ್ಸಿನಂತೆ ಹಳದಿ ಬಣ್ಣ ಹಚ್ಚುತ್ತಾರೆಯೇ ? ಆದರೆ ಈ ಕಾಮಾಲೆ ಕವಿಗಳು ಜೋಗಿ ಸಿನೆಮಾಕ್ಕೆ ಬರದ ಹಾಡು ನೀವು ಕೇಳಿರಬೇಕಲ್ಲಾ - “yellow ಜೋಗಪ್ಪ ನಿನ್ನ ಅರಮನಿ , yellow ಜೋಗಪ್ಪ ನಿನ್ನ ತಳಮನಿ ?”. ಹೇಳಿ ಕೇಳಿ ಅದು ಜೋಗಪ್ಪನ ಮನಿ, ಭಂಡಾರದ ಧೂಳು ಬಿದ್ದೂ ಬಿದ್ದು , ಹಳದಿಯಾಗಿದೆ ಅಂದುಕೊಂಡು ಸುಮ್ಮನಿರೋಣ. ಆದರೆ ಇನ್ನೊಂದು ಗೀತೆ ಇದೆ ನೋಡಿ “ಮಾಮರ yellow, ಕೋಗಿಲೆ yellow, any ಸ್ನೇಹ , ಸಂಬಂಧ ? ” ಅಂತ. ಮಾವಿನ ಮರದ ಹಸಿರೆಲೆಗಳು ಹಣ್ಣಾಗಿ ಹಳದಿಯಾಗಿ ಕಾಣಬಹುದು, ಆದರೆ ಕೋಗಿಲೆ ಎಂದಾದರೂ ಹಳದಿಯಾಗಿರಲು ಸಾಧ್ಯವೇ ? ಕೋಗಿಲೆ ಅಷ್ಟೇ ಅಲ್ಲ, ನವಿಲು ಕೂಡ ಇನ್ನೊಂದು ಹಾಡಿನಲ್ಲಿ ಇವರಿಗೆ ಹಳದಿಯಾಗೆ ಕಾಣಿಸುತ್ತೆ - “ಗಿರಿನವಿಲು yellow, ಕರಿಮುಗಿಲು yellow, ಪ್ರೇಮವೆನಲು..” . ಸಂಗೀತದಂತಹ ಕಲೆ ಕೂಡ ಇವರಿಗೆ ಹಳದಿ ಬಣ್ಣದ್ದಾಗಿಯೇ ಕಾಣುತ್ತದೆ. ಕನಸುಗಾರ ಸಿನೆಮಾದ ಹಾಡನ್ನು ನೋಡಿ - “yellow, ಅದು yellow ಕಿವಿತುಂಬೋ ರಾಗ”.

ನಿಮ್ಮಗಿನ್ನೂ ಇವರ ರೋಗದ ಬಗ್ಗೆ ಸಂಶಯ ಉಳಿದಿದ್ದರೆ “ಗಗನವು yellow, ಭೂಮಿಯು yellow, ಒಂದೂ ಅರಿಯೇ ನಾ” ಅಂತಿರುವ ಗೆಜ್ಜೆಪೂಜೆ ಸಿನೆಮಾದ ಹಾಡನ್ನು ನೆನಪಿಸಿಕೊಳ್ಳಿ. ಈ ಕವಿಗಳಿಗೆ ಅಕಾಶ-ಭೂಮಿ ಎಲ್ಲಾ ಹಳದಿಯಾಗೆ ಕಾಣಿಸುತ್ತೆ ಅಂದಮೇಲೆ ಇವರಿಗೆ ಕಾಮಾಲೆ ಇದೆ ಅಂತೇ ಆಯ್ತು, ಅಲ್ವೇ ?

-PUNಡಿತ

punಚಾಮೃತ

2009-01-16T22:12:00.000-08:00

ರಾತ್ರಿ ಊಟಕ್ಕೆ:
ಕನ್ನಡಿಗರ ಊಟವಾದ ರೊಟ್ಟಿ -ಚಪಾತಿ- ಅನ್ನ ಉಂಡರೆ ಅದು *ಸೌಥ ಇಂಡಿಯನ್* ಊಟ,
ದಪ್ಪ ರೊಟ್ಟಿ , ನಾನ್, ಪರೋಟ ಉಂಡರೆ ಅದು *ನಾರ್ತ್ ಇಂಡಿಯನ್* ಊಟ,
ತಮಿಳರಂತೆ ಇಡ್ಲಿ, ದೋಸೆ ತಿಂದರೆ ಅದು * ತಿಂಡಿಯನ್* ಊಟ !!

ರೊಟ್ಟಿ ಅಂಗಡಿ ಕಿಟ್ಟಪ್ಪಗಳು..

2008-12-28T00:12:00.000-08:00

ಬೆಂಗಳೂರಿನಲ್ಲಿ ಜೋಳದ ರೊಟ್ಟಿ ಸಿಗುವ ಅಂಗಡಿ/ಹೋಟೆಲು/ಖಾನಾವಳಿಗಳ ಪಟ್ಟಿ.

೧. ಉತ್ತರ ಕರ್ನಾಟಕ ಆಹಾರ ಮಳಿಗೆ, ಬಸವನಗುಡಿ ರಸ್ತೆಯ ಮುಂದುವರಿದ ಭಾಗ, ತ್ಯಾಗರಾಜನಗರ
(ಫೋನ್ ನಂ: )
ಇವರ ಇನ್ನೊಂದು ಮಳಿಗೆ ಗಾಂಧಿಬಜಾರ್ ಮುಖ್ಯರಸ್ತೆಯಲ್ಲಿಯೂ ಇದೆ.
೨. ಉತ್ತರ ಕರ್ನಾಟಕ ಆಹಾರ ಮಳಿಗೆ, #೪೯೬, ೫೪ ನೇ ಅಡ್ಡ ರಸ್ತೆ ಭಾಶ್ಯಂ ವೃತ್ತದ ಹತ್ತಿರ, ರಾಜಾಜಿ ನಗರ
(ಫೋನ್ ನಂ: ೨೩೨೦೯೮೪೦,೯೪೪೮೨೬೧೨೦೧, ೨೩೨೩೬೨೩೬ )
ಇವರ ಇನ್ನೊಂದು ಮಳಿಗೆ #೨೭೩, ೩ನೆ ಸ್ಟೇಜ್ ೩ನೇ ಬ್ಲಾಕ್, ೫ನೇ ಮೆನ್, ಬಸವೇಶ್ವರ ನಗರ.
ಇವರ ಇನ್ನೊಂದು ಮಳಿಗೆ ಜಯನಗರ ೯ನೇ ಬ್ಲಾಕಿನಲ್ಲಿಯೂ ಇದೆ(??)
೩. ಕಾಮತ ಯಾತ್ರಿನಿವಾಸ, ಗಾಂಧಿ ನಗರ(೦೮೦-೨೬೭೦೩೮೧೩)
ಕಾಮತ ಬ್ಯೂಗಲ್ ರಾಕ್, ಬಸವನಗುಡಿ (ಬಿಎಮ್ಮೆಸ್ ಇಂಜನೀಯರಿಂಗ್ ಕಾಲೇಜಿನ ಹತ್ತಿರ) (೦೮೦-೨೬೬೦೫೭೩೪)
೪. ಕಾಮತ ಮಿನರ್ವ , ಮಿನರ್ವ ವೃತ್ತ, ಜೆಸಿ ರಸ್ತೆ.
೫. ಕಾಮತ ಲೋಕರುಚಿ, ಜಾನಪದ ಲೋಕದ ಹತ್ತಿರ, ರಾಮನಗರ, ಮೈಸೂರು ರಸ್ತೆ.
೬. ಪೈ ವಿಹಾರ್, ಆನಂದರಾವ್ ವೃತ್ತ,
೭. ವಿಜಯ್ ದರ್ಶನಿ(??) ಸ್ಟೇಟ್ಸ್ ಚಿತ್ರಮಂದಿರದ ಹತ್ತಿರ, ಕೆಂಪೇಗೌಡ ರಸ್ತೆ, ಗಾಂಧಿನಗರ.
೮. ನಮ್ಮೂರ ಹೋಟೆಲ್, ಮಾರೇನಹಳ್ಳಿ, ಜೇಪಿ ನಗರ ( ಇಲ್ಲಿ ಕಡಕ ರೊಟ್ಟಿಗಳು ಮಾತ್ರ ಸಿಗುತ್ತವೆ.)
೯. ಅನ್ನಪೂರ್ಣ ಮೆಸ್ಸ್, ೭ನೇ ಅಡ್ಡರಸ್ತೆ,೧ನೇ ಮುಖ್ಯರಸ್ತೆ, ಮಾರುತಿ ನಗರ, ಮಡಿವಾಳ
(ಇದೊಂದು no-frill ಖಾನಾವಳಿ, ಫೊನ್ ನಂ ೯೯೮೬೧೯೩೬೫೦)
೧೦. ಮಿಶ್ರಾ ಪೇಡಾದ ರೊಟ್ಟಿ ಮೆಸ್ಸು, ಎನ್ನಾರ್ ಕಾಲನಿ ಬಸ್ ನಿಲ್ದಾಣದ ಹತ್ತಿರ. (ಇದೊಂದು no-frill ಖಾನಾವಳಿ)
೧೧. ನಳಪಾಕ, ನವರಂಗ ವೃತ್ತದ ಹತ್ತಿರ, ರಾಜಾಜಿ ನಗರ.
೧೨. ಪಾಟೀಲ್ ಎಂಬ ವ್ಯಕ್ತಿಯೊಬ್ಬರು (ಫೊನ್ ನಂ ೯೯೮೬೨೭೧೧೧೬) ಜೋಳದ ರೊಟ್ಟಿಗಳನ್ನು ಮನೆ-ಮನೆಗೆ ಒದಗಿಸುತ್ತಾರಂತೆ.
೧೩. ನಿಸರ್ಗ, ೧೧೯೭ ,೫ನೇ ಬ್ಲಾಕ್ , ೧೮ ನೇ ಮುಖ್ಯರಸ್ತೆ, ಧೋಬಿ ಘಾಟ್,ರಾಜಾಜಿನಗರ.(ಫೊನ್ ನಂ : ೯೪೪೮೫೪೨೨೯೮ )
೧೪. ಗದಿಗೆಪ್ಪ ಅನ್ನಪೂರ್ಣ ಜೋಳದ ರೊಟ್ಟಿ ಖಾನಾವಳಿ, ಆನಂದರಾವ್ ವೃತ್ತ
೧೫. ಕೋರಮಂಗಲ ಚೈನಾ ಪರ್ಲ್-ವಿಜಯಾ ಬ್ಯಾಂಕ್ ಹತ್ತಿರ ಒಂದು ಅಂಗಡಿ ಇದೆ. (ಫೊನ್ ನಂ : ೯೪೪೮೨೬೧೨೦೧ )

(ಇಲ್ಲಿರುವುದು ನಿಮ್ಮ ಮಾಹಿತಿಗಾಗಿ ಮಾತ್ರ. ತಪ್ಪು/ ಬಿಟ್ಟು ಹೋಗಿರುವ ಮಾಹಿತಿ ಏನಾದರು ಇದ್ದರೆ ದಯವಿಟ್ಟು ತಿಳಿಸಿ.)

List of shops/hotels/khanavaLi’s proving joLada rotti

1. uttara karnATaka AhAra maLige, Bull temple road extension, Tyagarajanagar. (Phone: )
Another branch of this shop is in Gandhibazar main road.
2. uttara karnATaka AhAra maLige, Nr. Bhashyam circle, Rajaji nagara(Phone: )
Bramch : #273,3rd stage,3rd block, 5th Main, BasavEshwara nagar.

Another branch of this shop is in jayanagara 9th block(??)

3. kamat yAtrinivAsa, Gandhi nagara(080-26703813)
4. Kamat Bugle Rock, basavanaguDi (Opp. BMS engineering college) (080-26605734)
4. kAmat minarva , minarva vRutta, JC Road
5. kamat Lokaruci, Nr. jAnapada lOkada, Ramanagara, MaisUru road.
6. pai vihAr, Anand Rao circle.
7. vijay darshani(??) Nr. States cinema talkies, Kempegauda Road, Gamdhinagara.
8. nammUra hOTel, mArEnahaLLi, jEpi nagara ( illi kaDaka roTTigaLu mAtra siguttave.)
9. annapUrNa mess, 7nE aDDaraste,1nE muKyaraste, mAruti nagara, maDivALa
(It’s a No-frill KAnAvaLi, Phone: 9986193650)
10. miSrA pEDAda roTTi messu, ennAr kAlani bas nildANada hattira. (It’s a No-frill KAnAvaLi)
11. NaLapAka, navaraMga vRuttada hattira, rAjAji nagara.
12. pATIl eMba vyaktiyobbaru (Phone: 9986271116) jOLada roTTigaLannu mane-manege odagisuttAraMte.
13, Nisarga,1197,5th block, 18th 'A' main, Near Dobhi Ghat bus stop, Rajaji Nagar Ph: 9448542298
14. Gadigeppa’s Annapoorna Jolada rotti khanavali,Anand Rao circle.
(This list is not complete and is just for your information. If you feel some info is incorrect/missing, please let me know.)
15. A shop is there Opposite to China Pearl/Vijaya Bank there is a road. Contact no of shop is 9448261201

punಚಾಮೃತ

2008-10-17T08:56:00.000-07:00

'Jet'ಟಿಗಳು ಬಿದ್ದರೂ ಮೀಸೆ ಮಣ್ಣಾಗಲಿಲ್ಲ!!

punಚಾಮೃತ

2008-10-16T07:22:00.000-07:00

¿ ಲೇಮನ್ ಬಂಧು ಗಳಿಗೆ ಈ ದೀಪಾವಳಿಯ ಶುಭಾಶಯವನ್ನು punಟರಗಳು ಹೇಗೆ ಹೇಳಬೇಕು ?
✔ ಹ್ಯಾಪಿ 'ದಿವಾಳಿ' !!

punಚಾಮೃತ

2008-10-07T23:20:00.000-07:00

¿ ಪೈರೇಟೆಡ್ ಸಿಡಿಗಳಲ್ಲಿ ಸಿನೆಮಾ ನೋಡಿ ಆನಂದಿಸುವವರನ್ನು ಏನೆನ್ನಬೇಕು ?
✔ 'ಪೈರಸಿ'ಕ

ಪಂಚಮುಖಿ ಆಂಜನೇಯ

2008-09-12T09:40:00.000-07:00

ಆಂಜನೇಯ ಪಂಚಮುಖಿಯಾದದು ಹೇಗೆಂದು ನಿಮಗೆ ಗೊತ್ತಿದೆಯಾ ? ಬಾಲ ಆಂಜನೇಯ ಸೂರ್ಯನನ್ನು ಚೆಂಡು ಎಂದು ಭಾವಿಸಿ ಅದನ್ನು ಹಿಡಿದುಕೊಳ್ಳಲು ಆಗಸಕ್ಕೆ ಹಾರಿದ್ದನಂತೆ. ಅದರಿಂದ ಕಿರಿಕಿರಿಯಾದ ಸೂರ್ಯ ಅವನ ಮುಸುಡಿಗೊಂದು ಪಂಚ್ ಮಾಡಿದ್ದನಂತೆ, ಆವತ್ತಿನಿಂದ ಹನುಮ punchಮುಖಿಯಂದು ಪ್ರಸಿದ್ಧನಾದನಂತೆ..

ವಿಪ್ರೋ ತನ್ನ ನೌಕರರನ್ನು ಓಡಿಸ್ತಾ ಇದೆ..

2008-09-09T09:48:00.000-07:00

ಅಕ್ಷರಶಃ .. ಎರಡು ವಿಧದಲ್ಲಿ :
೧. http://www.prurgent.com/2008-09-08/pressrelease18122.htm
೨. http://infotech.indiatimes.com/News/Software__Services/Wipro_gives_pink_slip_to_1000/articleshow/3457294.cms

ಮುಜಾಹಿದೀನ್

2008-09-08T10:43:00.000-07:00

¿ ಮುಜಾಹಿದೀನ್ ಗಳನ್ನು ಬೆಂಬಲಿಸುವ ಢೋಂಗಿ ಸೆಕ್ಯುಲರ್ ಗಳಿಗೆ ಏನೆನ್ನಬೇಕು ?
✔ 'ಮಜಾ'ಹಿದೀನ್ !!

ಹತ್ತನೇ ರಸ

2008-09-05T09:00:00.000-07:00

¿ ಸಿನೆಮಾ ನಟನೆಯಲ್ಲಿ ಯಾವ ರಸಕ್ಕೆ ಹೆಚ್ಚು ಪ್ರಾಧಾನ್ಯ ?

✔ ಗ್ಲಾಮ'ರಸ' ಕ್ಕೆ !!

ಕೊಳಕು ಮಾಯ

2008-09-04T08:07:00.000-07:00

ನನ್ನ ಬಾಲ್ಯದ ಸ್ನೇಹಿತನೊಬ್ಬನಿದ್ದಾನೆ, ಹೆಸರು ಮಾಯಪ್ಪ. ಚಿಕ್ಕಂದಿನಲ್ಲಿ ಅವನು ಬಹಳ ಕೊಳಕಾಗಿರುತ್ತಿದ್ದರಿಂದ ಅವನಿಗೆ ನಾವು 'ಕೊಳಕು ಮಾಯ' ಎನ್ನುತ್ತಿದ್ದೆವು. ಈ ಸಲ ಊರಿಗೆ ಹೋದಾಗ ಅವನಿಗೆ ಬ್ಯಾಂಗ್ ಎಂದು ಕರೆಯಬೇಕೆಂದಿದ್ದೇನೆ. ಯಾಕಂತೀರಾ ? ಜಾಹಿರಾತು ಕೇಳಿಲ್ವಾ - “ಬ್ಯಾಂಗ್ ಅಂದ್ರೆ ಕೊಳಕು ಮಾಯ”

ನಿಮ್ಮಮಗುವಿನ ಯಶಸ್ಸಿಗಾಗಿ ನಿಮಗೆ ಮೂರು ಸರಳ ಸೂತ್ರಗಳು:

2008-09-02T23:33:00.000-07:00

ಒಂದು ಹಳೆಯ ಜೋಕ್ ಇದೆ, ನೀವು ಕೇಳಿರಬಹುದು : ಒಬ್ಬ ತಂದೆ ತನ್ನ ಉಡಾಳ ಮಗನಿಗೆ ಬುದ್ಧಿ ಹೇಳ್ತಾ ಜಾನ್ ಎಫ್ ಕೆನಡಿ ನಿನ್ನ ವಯಸ್ಸಿನಲ್ಲಿ ಏನು ಮಾಡ್ತಾ ಇದ್ರು ಗೊತ್ತಾ ? ಎಂದು ಕೇಳ್ತಾನೆ. ಅದಕ್ಕೆ ಉಡಾಳ ಮಗ ಹೇಳ್ತಾನೆ "ಗೊತ್ತಿಲ್ಲ.. ಆದರೆ ಅವರು ನಿಮ್ಮ ವಯಸ್ಸಿನಲ್ಲಿ ಅಮೇರಿಕದ ಅಧ್ಯಕ್ಷರಾಗಿದ್ದರು!!"

ಈ ಹನಿಯಲ್ಲಿ ಎಂತಹ ಕಹಿಸತ್ಯ ಇದೆಯಲ್ಲವೇ ? ನಾವು ನಮ್ಮ ಮಕ್ಕಳು ಕವಿಯಾಗಲಿ, ಸಾಹಿತಿಗಳಾಗಲಿ, ಕಲಾವಿದರಾಗಲಿ ವಿಜ್ಞಾನಿಗಳಾಗಲಿ ಎಂದೆಲ್ಲ ಆಶಿಸುತ್ತೇವೆ. ಅಂಥವರ ಜೀವನ ಚೆರಿತ್ರೆಗಳನ್ನು ತಂದು ಕೊಟ್ಟು ಓದಲು ತಲೆತಿನ್ನುತ್ತೇವೆ. ಓದಿದನಂತರ ಅವರು ಅಷ್ಟನೇ ವಯಸ್ಸಿಗೆ ಇಷ್ಟು ಮಾಡಿದ್ದರು, ನೀನು ಅವರಿಗಿಂತ ಹೆಚ್ಚು ಮಾಡು ಎಂದು ಕಿರಿಕಿರಿ ಮಾಡುತ್ತೇವೆ. ನಾವು ಅರ್ಥಮಾಡಿಕೊಳ್ಳದ ಒಂದು ವಿಷಯವೆಂದರೆ ಮಕ್ಕಳು ಪುಸ್ತಕದಲ್ಲಿ ಓದಿದ ಯಾವುದೋ ವ್ಯಕ್ತಿಯ ಆದರ್ಶ ಪಾಲಿಸುವುದಕ್ಕಿಂತ ತಮ್ಮ ಕಣ್ಣೆದುರಿಗಿರುವ ವ್ಯಕ್ತಿಯಯನ್ನು ನೋಡಿ ಅನಾಯಾಸವಾಗಿ ಕಲಿಯುತ್ತವೆ. ಅವುಗಳ ದುರದೃಷ್ಟಕ್ಕೆ ಅವುಗಳ ಕಣ್ಣಿಗೆ ನಿತ್ಯಬೀಳುವವರು ಕೆನಡಿಯೋ, ಟ್ಯಾಗೋರರೋ ಅಥವಾ ಭೀಮಸೇನ್ ಜೋಷಿಯೋ ಆಗಿರದೇ ನಾವಾಗಿರುತ್ತೇವೆ!! ನಾವು ಮೂಗಿನಲ್ಲಿ ಬೆರಳು ಹಾಕಿ ಗಿರಮಿಟ್ಟು ತಿರುವುದನ್ನು ನೋಡಿಯೇ ನಮ್ಮ ಮಗನೂ ಕಲಿಯುವುದು. ನಾವು ಬಿಟ್ಟಗಣ್ಣಿಂದ ಟೀವಿ ನೋಡ್ತಾ ಇರೊದನ್ನು ನೋಡಿಯೇ ಅವನು ಟೀವಿಗೆ ಅಡಿಕ್ಟಾಗುವುದು. ರಸ್ತೆಬದಿಗೆ ನಿಂತು ನಾವು ಮುಂಗಾರು ಮಳೆ ಮಾಡುವುದನ್ನು ನೋಡಿಯೇ ಅವನಿಗೆ ಸಾರ್ವಜನಿಕ ಸ್ವಚ್ಚತೆಯ ಬಗ್ಗೆ ಅಲರ್ಜಿ ಬೆಳೆಯುವುದು!!

ನಾನು ಹೇಳುವ ಮೊದಲ ಸೂತ್ರ ತುಂಬ ಸರಳವಿದೆ: ನಿಮ್ಮ ಮಗು ಏನಾಗಬೇಕೆಂದು ನೀವು ಬಯಸುತ್ತೇರೋ, ಅದಾಗಲು ನೀವು ಮೊದಲು ಪ್ರಯತ್ನಿಸಿ. ನಿಮ್ಮ ಮಗ ಝಕೀರ್ ಹುಸೇನ್ ಆಗಬೇಕಿದ್ದರೆ ನೀವು ಮೊದಲು ಅಲ್ಲಾರಖಾ ಆಗಿ. ಅವನು ತೇಜಸ್ವಿ ಆಗಬೇಕಿದ್ದರೆ ನೀವು ಮೊದಲು ಕುವೆಂಪು ಆಗಿ. ಇಲ್ಲವೇ ಅವನು ಕಿರು ಅಂಬಾನಿಯಾಗ ಬೇಕೆಂದಿದ್ದರೆ, ನೀವು ಧೀರು ಅಂಬಾನಿಯಾಗಿ.

"ರೈತ ಆಗ ಬೇಕಿದ್ದರೆ ರೈತನ ಮಗನೇ ಆಗಿರಬೇಕು, ಅಕ್ಕಸಾಲಿಗನಾಗಬೇಕೆಂದರೆ ಅಕ್ಕಸಾಲಿಗನ ಮಗನೇ ಆಗಬೇಕೆಂದು" ಹೇಳುವ ನವ-ಮನು ಸಿದ್ಧಾಂತ ಇದೆಂದು ತಳ್ಳಿ ಹಾಕಬೇಡಿ. ಆದೆರೆ ನೀವೇ ವಿಚಾರ ಮಾಡಿನೋಡಿ ರೈತ ಗ್ರಾಮ ಪಂಚಾಯತಿಯ ಅಧ್ಯಕ್ಶನಾದದ್ದೇ, ರೈತನ ಮಗ ( ರೈತ ಮತ್ತು ಮಣ್ಣಿನ ನಡುವೆ ಇರುವ ಪ್ಯಾಟರ್ನಿಟಿ ಡಿಸ್‌ಫ್ಯೂಟ್ ಸ್ವಲ್ಪ ಬದಿಗಿಡಿ:-)) ದೇಶದ ಪ್ರಧಾನಿಯಾಗಲು ಮೊದಲ ಸ್ಫೂರ್ತಿಯಲ್ಲವೇ ? ಮಹಾರಾಜ ಸಿಂಗ** ರಣಜಿ ಆಡಿದ್ದೇ ಯುವರಾಜ ಸಿಂಗ್ ಅಂತರಾಷ್ಟ್ರೀಯ ಕ್ರಿಕೆಟ್ಟಿನಲ್ಲಿ ಮಿಂಚಲು ಸ್ಪೂರ್ತಿಯಾಗಿಲ್ಲ ಎನ್ನುತ್ತಿರಾ ?

ಆದ್ದರಿಂದ ನನ್ನ ಎರಡನೆ ಸೂತ್ರ: ಸಾಧನೆಯ ಹಾದಿಯಲ್ಲಿ ಕೆಲವಾದರೂ ಹೆಜ್ಜೆಗಳನ್ನು ನೀವಿಡಿ. ನಂತರ ನಿಮ್ಮ ಮಗು ನಿiದೇ ಹೆಜ್ಜೆಗಳಲ್ಲಿ ನಡೆದು ನಿಮ್ಮನ್ನು ದಾಟಿ ಹೋಗುತ್ತಾನೆ.

ಹಾಗಾದರೆ, ಗಾಂಧಿ ವರ್ಸಸ್ ಗಾಂಧಿಯ ಹರಿಲಾಲನೋ, "ದಾಟ್ ಇಸ್ ರಾಮನ್ಸ್ ಎಫ್ಫೆಕ್ಟ್ ಅಂಡ್ ದಿಸ್ ಇಸ್ ರಾಮನ್ಸ್ ಡಿಫ್ಫೆಕ್ಟ್" ಎಂದು ಹೇಳಿಕೊಂಡ ಸೀವಿರಾಮನ್ನರ ಮಗನೋ ಸಾಧಕರ ಮಕ್ಕಳಾಗಿದ್ದೂ ಯಾಕೆ ವಿಫಲರಾದರು ಎಂದು ನಿಮ್ಮ ಪ್ರಶ್ನೆಯಾಗಿದ್ದರೆ, ನಿಮಗಾಗಿದೆ ನನ್ನ ಮೂರನೆ ಸೂತ್ರ:
ದಯವಿಟ್ಟು ನಿಮ್ಮ ನೆರಳು ನಿಮ್ಮ ಮಗುವಿನ ಮೇಲೆ ಬೀಳದಂತೆ ಎಚ್ಚರವಹಿಸಿ. ಬೆಟ್ಟದಾ ಕೊರಕಲಿನಲಿ ಬಿದ್ದ ಬೀಜ ಭಗವಂತನ ಕೃಪೆಯಿಂದ ಬೆಳೆದು ಹೆಮ್ಮರವಾಗುವಂತೆ, ನಿಮ್ಮ ಮಗುವು ಬೆಳೆದಾನು, ಆದರೆ ನಿಮ್ಮ ನಿರಾಶಾವಾದದ ಪ್ರಭಾವಲಯದಲ್ಲಿ ಅವನು ಬೆಳೆಯುವುದು ಸಾಧ್ಯವಿಲ್ಲ.

ಮಹಾಮಾತೆಯ ಮಾತು..

2008-08-11T09:24:00.000-07:00

'ಮಾತೇಜ್ಯೋತಿರ್ಲಿಂಗ' ಎನ್ನುವುದು ಹಳೆಯದಾಯಿತು. ಈಗ ಅದನ್ನು 'ಮಾತೆ ಜ್ಯೋತಿರ್ ಲಿಂಗದೇವ ' ಎಂದು ತಿದ್ದಲಾಗಿದೆ!!

royal ಸೀಮಾ

2008-08-08T08:33:00.000-07:00

ಕುಂ. ವೀರಭದ್ರಪ್ಪ ತಾವು royal ಸೀಮೆಯಲ್ಲಿ ಪಡೆದ ಅನುಭವಗಳನ್ನು ಇಲ್ಲಿ ದಾಖಲಿಸಿದ್ದಾರೆ. ಈ ಪುಸ್ತಕವನ್ನು ಓದುತ್ತ ಬೆಂಗಳೂರಿನ ಏಸಿ ರೂಮಿನಲ್ಲಿ ಕುಳಿತು ಕೆಲಸ ಮಾಡುವ ನಾವು ಏನು ಕಳೆದು ಕೊಂಡಿದ್ದೇವೆ ಎಂದು ತಿಳಿಯುತ್ತೆ. ಕುಂವೀಯವರ ಭಳಾರೆ ವಿಚಿತ್ರ ಶೈಲಿಯೂ ಪುಸ್ತಕವನ್ನು ಇನ್ನಷ್ಟು ಆಸಕ್ತಿಕರವಾಗಿಸುತ್ತದೆ. ಅಲ್ಲಲ್ಲಿ ಬರುವ ಕುಂವೀಯವರ ಪೂರ್ಣೋಪಮೆಗಳು ಓದಲು ಬಲು ತಮಾಷೆಯಾಗಿರುತ್ತವೆ. ಒಂದು ಉದಾಹರಣೆ ನೋಡಿ:

“ಅಂಗಳದ ಅಷ್ಟ ದಿಕ್ಕುಗಳಲ್ಲಿ ಒಡಮೂಡಿರುತ್ತಿದ್ದ ಮಿಠಾಯಿ ಅಂಗಡಿಗಳ ಉಸ್ತುವಾರಿ ಸಲುವಾಗಿ ತಂಗಾಳಿ ಟೆಂಡರು ಕರೆಯುತ್ತಿದ್ದದೂ, ಅದರೆಳೆಗುಂಟ ಚತುಷ್ಪಾದಿಗಳು ಟಣಕೂ ಟಣಕೂ ಜಿಕ್ಕೋತ, ಚಾಮರ ಸದ್ರಶ ರೀತಿಯಲ್ಲಿ ಬಾಲ ಅಲ್ಲಾಡಿಸುತ್ತ ಓಡೋಡಿ ಬರುತ್ತಿದ್ದುದೂ, ನಾಯಿ, ಹಂದಿಗಳ ನಡುವೆ ವಾಗ್ ಯುದ್ಧ ನಡೆಯುತ್ತಿದೂ, ಇಬ್ಬರ ನ್ಯಾಯ ಮೂರವನೆಯವನಿಗೆ ಆಯ ಎ ಂಬಂತೆ ಕಾಕರಾಜರು ದುಬ್ಬಕ್ಕನೇ ಎಗರಿ ಇಸಿ, ಕಫವೇ ಮೊದಲಾದ ಅಷ್ಟೈಶ್ವರ್ಯವನ್ನು ಲಪಟಾಯಿಸುತ್ತಿದ್ದದೂ - ಇಂಥ ಹತ್ತು ಹಲವು ದ್ಋಶ್ಯಾವಳಿಯ ಪ್ರಭಾವಳಿಯನ್ನು ಅರುಣೋದಯ ಪೂರ್ವದ ಲಲನಾಮಣಿಯಾದ ಉಷೆ ಧರಿಸಿಕೊಂಡಿರುತ್ತಿದ್ದಳು. ಒಡಲಾಳ, ಲುಸುಮಬಾಲೆಗಳೇ ಮೊದಲಾದ ಕಋತಿಗಳು ಅವತಾರವೆತ್ತಿರುವಂಥಾ ಹಾದಿಬೀದಿಗಳಗುಂಟ ಹಂಗ ಹೋಗಿ ಹಿಂಗ ಬಂದವರು ಬ್ರಹ್ಮ ಜ್ಞಾನದಿಂದ ತತ್ತರಿಸದೇ ಇರುವುದಿಲ್ಲಾ!!”

ಇನ್ನೊಂದು ಪ್ಯಾರಾ ನೋಡಿ:

"ಎರಡು ಮೂರು ದಿನಗಳುರುಳಿದರೂ ತಮ್ಮ ಕಂದಯ್ಯ ಲ್ಯಾಟರಿನ್ನನ್ನು ಮಾಡಲಾಗದೇ ರೊಯ್ಯೋ ಎಂದು ಅಳುವುದನ್ನು ನೋಡುತ್ತಾ ತಾಯಂದಿರು ಕೈಕಟ್ಟಿ ಕೂಡುವುದಿಲ್ಲ. ಅದೆಂಗ ಇಸಿ ಮಾಡಲೊಲ್ಲೋ.. ಒಂದ್ ಕೈ ನೋಡೇ ಬುಡುತಿನಿ ಎಂದು ಘನಘೋರ ಸಪತ ಮಾಡುತ್ತಾರೆ. ನಿನ್ ಮಿಂಡನ್ಯಾಕೋ ಎಲ್ಡು ದಿನ್ದಿಂದ ಎಲ್ಡಾಕ ಮಾಡಿಲ್ಲೆಂಗೆ ಅಂತ ಮುದುಕಿಯರನ್ನು ಕೂಗಿ ಕರೆಯುತ್ತಾರೆ. ಅವರಿವರೆಲ್ಲ ಸೇರಿ ಕಂದಯ್ಯನ ಗುದದ್ವಾರದಲ್ಲಿ ಹುಣುಸೆ ಬೋಟನ್ನು ತೂರಿಸುತ್ತಾರೆ. ಪ್ರಪಂಚ ಅಂಡಾವರನವಾಗುವ ರೀತಿಯಲ್ಲಿ ಅಳಲಾರಂಭಿಸುವ ಕಂದಯ್ಯನನ್ನು ಕಿರುಬೆರಳಿಂದ ಎತ್ತೊಯ್ದು ತಮ್ಮ ಅಂಗಾಲ ಇಕ್ಕಳದ ನಡುವೆ ಕೂಡ್ರಿಸಿಕೊಂಡು ಮಾಡಲೋ ಮಾಡು ಎಂದು ಚತುರೋಪಾಯಗಳನ್ನು ಉಪಯೋಗಿಸುತ್ತಾರೆ. ಹೆತ್ತ ತಾಯಿ ಜುಳ್ಳಿ ಝಳಪಿಸಿದೊಡನೆ ...

ಕಂದಯ್ಯನ ಪ್ರಸವ ವೇದನೆ ಪರಾಕಾಷ್ಠೆ ತಲುಪಿ ಬಿಡುತ್ತದೆ. ಆ ವೇದನೆಯನ್ನೇ ಆಮಂತ್ರಣವೆಂದು ಪರಿಗಣಿಸಿ ಶುನಕಗಳು ಅಷ್ಟದಿಕ್ಕುಗಳಿಂದಾಗಮಿಸಿ ಅಚಂದ್ರಾಕ್ಋತಿಯಲ್ಲಿ ಕೂತಿ ಇಸಿಯ ಆಗಮನದ ನೋಂಪಿಯನ್ನಾಚರಿಸುತ್ತವೆ. ಕೆಲ ನಿಮಿಷಗಳಲ್ಲಿ ಪಟಾಕಿ ಸ್ಫೋಟಿಸಿದಂತೆ... ಸಿಕ್ಕವರಿಗೆ ಸಿವಲಿಂಗವೆಂಬಂತೆ, ಕ್ಷಣಾರ್ಧದಲ್ಲಿ.. ಒಳಗೆ ಹೋಗಿ ನೀರು ತರುವಷ್ಟರಲ್ಲಿ ತನ್ನ ಕಂದಯ್ಯನ ಮೇಲೆರಗಿ ಶುನಕಗಳು ತಮ್ಮ ಶತಮಾನದ ಹಸಿವು ತೀರಿಸಿಕೊಂಡಾವೆಂಬ ಭಯದಿಂದ ಆ ಮಾತ್ು ನೀರುನಿಡಿ ಹುಡುಕಿಕೊಂಡು ಒಳಗಡೆ ಹೋಗುವುದಿಲ್ಲ. ಬದಲಿಗೆ ತನ್ನ ಫೆವರೇತ್ ಶುನಕದ ಬಾಯಿ ಎದುರು ತನ್ನ ಕಂದಯ್ಯನ ತ್ಕವೆಂಬ ತಳಿಗೆ ಯನ್ನು ಒಡ್ಡಿಬಿಡುತ್ತಾಳೆ..”

ಕುಂವಿ ಬಗ್ಗೆ ನನ್ನದೊಂದು ಸಣ್ಣ ತಕರಾರು: ಅವರು ಕೆಲವೊಮ್ಮೆ ವಾಕ್ಯಗಳನ್ನು ನಡುನೀರಲ್ಲಿಯೇ ಕೈ ಬಿಡುತ್ತಾರೆ. ಅದು ನನಗೆ ಕಿರಿಕಿರಿ ಉಂಟು ಮಾಡುತ್ತದೆ. ಒಂದು ಉದಾಹರಣೆ ನೋಡಿ:

ಪುಟ ೮೯ : “ನಿಂಗಮ್ಮಜ್ಜಿ ಹಲವು ತಿಂಗಳುಗಳ ಕಾಲ ಗೊಣಗುಟ್ಟುತ್ತಲೇ ಇತ್ತು. ಮುಂದೊಂದು ದಿನ ಬಂದ ಮಲ್ಲೇಪುರಂ ವೆಂಕಟೇಶ್ ಅವರನ್ನಂತೂ... “

ಎಂದು ಅಲ್ಲಿಗೆ ಅಧ್ಯಾಯ ಮುಗಿಸಿಬಿಡುತ್ತಾರೆ. ನಿಂಗಮ್ಮಜ್ಜಿ ವೆಂಕಟೇಶರನ್ನು ನುಂಗಿ ನೀರು ಕುಡಿತಾ ? ಏನು ಕುತ್ತಿಗಿ ಹಿಚುಗಿ ಹಾಕಿತಾ ? ಎಂದು ಓದುಗ ತಲೆ ಚಚ್ಚಿಕೊಳ್ಳುತ್ತಲೆ ಇರಬೇಕಾಗುತ್ತದೆ !!

punಚಾಮೃತ

2008-08-08T04:55:00.000-07:00

¿ ಇತ್ತೀಚಿನ *ವಚನ ಬ್ರಷ್ಟರನ್ನು* ಏನೆನ್ನಬೇಕು ?
✔ ಮಾತೆ ಮಹಾ Devil.

punಚಾಮೃತ

2008-08-05T20:04:00.000-07:00

¿ ಕರ್ನಾಟಕ ಸರಕಾರ corruption ತಡೆಯಲು ಏನು ಕ್ರಮ ಕೈಗೊಂಡಿದೆ ?

✔ ಪವರ್ ಕಟ್. ಯಾಕಂದ್ರೆ power corrupts the man.

ದಂಗೆಯ ದಿನಗಳು.

2008-07-26T01:30:00.000-07:00

ಮನೋಹರ್ ಮಳಗಾವಕರ್ ಇಂಗ್ಲೀಷನಲ್ಲಿ ಬರೆದ ಈ ಕಾದಂಬರಿಯನ್ನು ರವಿ ಬೆಳೆಗೆರೆ ಕನ್ನಡೀಕರಿಸಿದ್ದಾರೆ. ೧೮೫೭ರ ಸ್ವಾತಂತ್ರ ಸಂಗ್ರಾಮದ ನಾಯಕ ನಾನಾಸಾಹೇಬನ ಕಥೆಯೇ ಇದರ ವಸ್ತು. ಸ್ಥಾಪಿತ ಇತಿಹಾಸದಲ್ಲಿ ಕಾಣಸಿಗದ ಕೆಲವು ಅಂಶಗಳು ಇಲ್ಲಿವೆ.

ಮಳಗಾವಕರರ ಕಥನ ಶೈಲಿಯ ಬಗ್ಗೆ, ಬೆಳೆಗೆರೆಯ ಭಾಷಾಂತರದ ಬಗ್ಗೆ ಎರಡು ಮಾತಿಲ್ಲ. ಇತಿಹಾಸದ ಬಗ್ಗೆ ವಿಶೇಷ ಆಸಕ್ತಿ ಇಲ್ಲದವರೂ ಇದನ್ನು ಓದಿ ಆನಂದಿಸಬಹುದು.

ಕೆಲವು ಅನಿಸಿಕೆಗಳು:

ಅಜೀಜ್ ಎನ್ನುವ ನಾನಾಸಾಹೇಬನ ಆಪ್ತ ಕಾರ್ಯದರ್ಶಿಗೆ ಆಂಗ್ಲರ ಬಗೆಗೆ ಒಂದು ಅಂಧಾಭಿಮಾನವಿರುತ್ತದೆ. ಉಡುಗೆ- ತೊಡುಗೆ, ನಡೆ-ನುಡಿಗಳಲ್ಲಿ ಅವರನ್ನು ಅನುಕರಣೆ ಮಾಡುತ್ತಿರುತ್ತಾನೆ. ಒಮ್ಮೆ ನಾನಾಸಾಹೇಬ ಅಜೀಜನನ್ನು ಕೆಲಸ್ನಿಮಿತ್ತವಾಗಿಇಂಗ್ಲಂಡಿಗೆ ಕಳುಹಿಸುತ್ತಾನೆ. ಮರಳಿ ಬಂದ ಅಜೀಜ ಸಂಪೂರ್ಣ ಬದಲಾಗಿರುತ್ತಾನೆ ! ಆಂಗ್ಲರನ್ನು ಅವರನಾಡಲ್ಲಿಯೇ ಕಂಡಅಜೀಜ ಬ್ರಮನಿರಸನಗೊಂಡು, ನಮ್ಮೂರ ನಮಗ ಪಾಡ ಎಂದು ಬದಲಾಗುತ್ತಾನೆ.

=> ನನಗೊಂದು ವಿಚಾರ ಬರುತ್ತಿದೆ. ನಮ್ಮಲ್ಲಿ ಕೆಲ ಜನ ಕರ್ನಾಟಕದಲ್ಲಿಯೇ ಹುಟ್ಟಿ, ಕರ್ನಾಟಕದಲ್ಲಿಯೇ ಬೆಳೆದು ಹಿಂದಿಯ ಬಗೆಗೆ ಒಂದು ಮೂಢಾರಾಧನೆ ಹೊಂದಿರುತ್ತಾರೆ. ಅವರನ್ನು ಯಾವುದಾದರೂ ಬಿಮಾರು ( BiMaRU – ಬಿಹಾರ್, ಮಧ್ಯಪ್ರದೇಶ,ರಾಜಸ್ಥಾನ, ಯುಪಿ) ರಾಜ್ಯಗಳಿಗೆ ಹೊತ್ತುಹಾಕಿದರೆ, ಆವಾಗಲಾದರೂ ಅವರಿಗೆ ಬುದ್ಧಿ ಬರಬಹುದಾ ಅಂತ..

ಕಾನ್ಪುರ ನಗರವನ್ನು ನಾನಾನ ನೇತ್ರತ್ವದ ಪಡೆಗಳು ವಶಪಡಿಸಿಕೊಂಡು ಕೆಲವೇ ದಿನಗಳಾಗಿರುತ್ತವೆ. ದಿಲ್ಲಿಯಿಂದ ಹೊರಟಬ್ರಿಟಿಷ್ಪಡೆಗಳು ಶೀಘ್ರಗತಿಯಿಂದ ಕಾನ್ಪುರದ ಕಡೆಗೆ ನುಗ್ಗುವ ಸುದ್ದಿ ಬರುತ್ತದೆ. ಅದಕ್ಕೆ ನಾನಾ ಅಂದುಕೊಳ್ಳುತಾನೆ - ಇನ್ನುಕೆಲವೇಕೆಲವು ಭಾರತೀಯರು ಬ್ರಿಟಿಷರ ಪರವಾಗಿ ಕೆಲಸಮಾಡದಿದ್ದರೂ - ನಾವಿಕರು ಇಂಗ್ಲೀಷ್ ಸೈನ್ಯ ವನ್ನು ನದಿ ದಾಟಲುಸಹಾಯಮಾಡದಿದ್ದರೆ, ಕೂಲಿಗಳು ಸೈನ್ಯದ ಸರಂಜಾಮನ್ನು ಹೊತ್ತು ಸಾಗಿಸಲು ನಿರಾಕರಿಸಿದ್ದರೆ - ಬ್ರಿಟಿಷರಿಗೆ ಜಯಸಾಧ್ಯವಾಗುತ್ತಿರಲಿಲ್ಲ.

=> ಇದನ್ನು ನನ್ನ 'ಎಡ'ಚ ಸ್ನೇಹಿತನಿಗೆ ಹೇಳಿದಾಗ ಅವನು “ಎಮ್ಮೆನ್ಸಿಗಳಲ್ಲಿ ಕೆಲಸ ಮಾಡುವ ನಾವು ಸಹ ಅಂದಿನ ಅಂಬಿಗ, ಕೂಲಿಗಳಂತೆ ಸಣ್ಣ ಸ್ವಂತ ಲಾಭಕ್ಕೆ ದೇಶದ ಹಿತವನ್ನು ಬಲಿಕೊಡುವವರೆ..” ಎಂದ. ಹೌದಾ ? ಮುಂದಿನ ಇತಿಹಾಸ ನಮ್ಮನ್ನೂ ದೇಶಹಿತಕ್ಕೆ ದ್ರೋಹವೆಸಗಿದ ಸ್ವಾರ್ಥಿಗಳೆಂದೆ ನೆನಪಿಸಿಕೊಳ್ಳುತ್ತದಾ ? ನಾನು ಚಿಂತಿತನಾಗಿದ್ದೇನೆ ..

ಅಂದಿನ ಭಾರತೀಯರ ಮೇಲಾದ ಹಿಂಸೆಯಲ್ಲಿ ಬ್ರಿಟಿಷ್ ಪಡೆಗಳಲ್ಲಿದ್ದ ಬ್ರಿಟಿಷರಷ್ಟೇ ಕ್ರೂರರಾಗಿ ವರ್ತಿಸಿದವರು ಸಿಕ್ಖರು ! ಕೆಲವೇವರುಷಗಳ ಹಿಂದೆ ಬ್ರಿಟಿಷರ ವಿರುದ್ಧ ಹೋರಾಡಿದ್ದ ಸಿಕ್ಖರು ತಮ್ಮ ಹೊಸ ಯಜಮಾನರಿಗೆ ನಿಷ್ಠೆಯನ್ನು ತೋರುವಭರದಲ್ಲಿ ತಮ್ಮಸ್ವದೇಶಿಯರ ವಿರುದ್ಧವೇ ಅತ್ಯಾಚಾರವೆಸಗಿದ್ದರು !

=> ಇದೇ ರೀತಿಯ ಹಲವು ಘಟನೆಗಳನ್ನು ಇಂದಿನ ಕಾಲದಲ್ಲಿಯೂ ನೋಡಬಹುದು - ತಮಿಳುನಾಡಲ್ಲಿ ನೆಲೆ ಕಂಡುಕೊಂಡಿರುವ ಜೈಲಲಿತಾ/ರಜನಿ ಕನ್ನಡಿಗರ ವಿರುದ್ಧ ಘೋಷಣೆ ಹಾಕುವುದರಲ್ಲಿ ತಮಿಳರಿಗಿಂತ ಜೋರು, ನವ-ಕ್ರಿಸ್ತುವರು ಹಿಂದು ಧರ್ಮವನ್ನು ತೆಗಳುವುದರಲ್ಲಿ ಉಳಿದವರಿಗಿಂತ ಒಂದು ಕೈ ಮೇಲು, ಹಾಗೆಯೇ ಸಿದ್ದರಾಮಯ್ಯ, ಪ್ರಕಾಶು ತಮ್ಮ ಹಿಂದಿನ ಧಣಿ ಗೌಡರನ್ನು ಹಣಿಯುವುದರಲ್ಲಿ ಮೂಲ ಕಾಂಗ್ರೆಸ್ಸಿಗರಿಗಿಂತ ಒಂದು ತೂಕ ಹೆಚ್ಚಿಗೆಯೇ !!

('ಪುಸ್ತಕದ ಹುಳು(ಕು)' ಎಂಬುದು ನಾ ಓದಿದ ಪುಸ್ತಕದ ಬಗ್ಗೆ ಬರೆಯುವ ಕಿರು ಬರಹಗಳ ಸರಣಿ.)